ଯାତ୍ରା ପୁସ୍ତକ 1 FHB Father's Heart Bible™

1 ¹ଯାକୁବଙ୍କ ସହିତ ଇସ୍ରାଏଲଙ୍କ ଯେଉଁ ପୁତ୍ରମାନେ ଆପଣା ଆପଣା ପରିବାର ସହିତ ମିସରକୁ ଆସିଥିଲେ, ସେମାନଙ୍କ ନାମ ଏହି; ²ରୁବେନ୍, ଶିମୀୟୋନ୍, ଲେବୀ ଓ ଯିହୂଦା, ³ଇଷାଖର, ସବୂଲୂନ୍ ଓ ବିନ୍ୟାମୀନ୍, ⁴ଦାନ୍ ଓ ନପ୍ତାଲି, ଗାଦ୍ ଓ ଆଶେର। ⁵ଯାକୁବଙ୍କଠାରୁ ଉତ୍ପନ୍ନ ସମସ୍ତେ ସତୁରି ଜଣ ଥିଲେ; ଯୋଷେଫ ତ ପୂର୍ବରୁ ମିସରରେ ଥିଲେ। ⁶ଏଥିଉତ୍ତାରେ ଯୋଷେଫ ଓ ତାହାଙ୍କ ଭ୍ରାତୃଗଣ ଓ ସେହି ସମଗ୍ର ବଂଶ ମୃତ୍ୟୁଭୋଗ କଲେ। ⁷ମାତ୍ର ଇସ୍ରାଏଲଙ୍କ ଲୋକମାନେ ଫଳବନ୍ତ ହୋଇ ଗହଳିଆ ହେଲେ, ବହୁସଂଖ୍ୟକ ହୋଇ ଅତ୍ୟନ୍ତ ବଳବାନ ହେଲେ, ପୁଣି ସେମାନଙ୍କ ଦ୍ଵାରା ଦେଶ ପରିପୂର୍ଣ୍ଣ ହେଲା।

⁸ଏଥିମଧ୍ୟରେ ଯୋଷେଫଙ୍କୁ ନ ଜାଣିଥିବା ଏକ ନୂତନ ରାଜା ମିସରରେ ରାଜ୍ୟ କରିବାକୁ ଲାଗିଲେ। ⁹ସେ ଆପଣା ଲୋକମାନଙ୍କୁ କହିଲେ, “ଦେଖ, ଇସ୍ରାଏଲ ବଂଶୀୟ ଲୋକମାନେ ଆମ୍ଭମାନଙ୍କ ଅପେକ୍ଷା ଅଧିକ ଓ ବଳବାନ। ¹⁰ଆସ, ଆମ୍ଭେମାନେ ସେମାନଙ୍କ ପ୍ରତି ଚତୁରତାର ବ୍ୟବହାର କରୁ, ନୋହିଲେ ସେମାନେ ବହୁସଂଖ୍ୟକ ହେବେ, ପୁଣି ଯୁଦ୍ଧ ଉପସ୍ଥିତ ହେଲେ, ସେମାନେ ଆମ୍ଭମାନଙ୍କ ଶତ୍ରୁ ସଙ୍ଗେ ମିଶି ଆମ୍ଭମାନଙ୍କ ବିରୁଦ୍ଧରେ ଯୁଦ୍ଧ କରିବେ ଓ ଦେଶରୁ ବାହାରିଯିବେ।” ¹¹ତେଣୁ ସେମାନେ କଠିନ ପରିଶ୍ରମ ଦ୍ଵାରା ସେମାନଙ୍କୁ ଦୁଃଖ ଦେବା ନିମନ୍ତେ ସେମାନଙ୍କ ଉପରେ କର୍ମାଧ୍ୟକ୍ଷମାନଙ୍କୁ ନିଯୁକ୍ତ କଲେ; ଆଉ ସେମାନେ ଫାରୋଙ୍କ ନିମନ୍ତେ ପୀଥୋମ୍ ଓ ରାମିଷେଷ୍ ନାମକ ଭଣ୍ଡାର-ନଗର ନିର୍ମାଣ କଲେ। ¹²କିନ୍ତୁ ମିସରୀୟମାନେ ସେମାନଙ୍କୁ ଯେତେ ଅଧିକ କ୍ଲେଶ ଦେଲେ, ଇସ୍ରାଏଲ ବଂଶୀୟ ଲୋକମାନେ ସେତେ ଅଧିକ ବୃଦ୍ଧି ପାଇ ବ୍ୟାପିଗଲେ; ଏଣୁ ସେମାନେ ଇସ୍ରାଏଲ ବଂଶ ହେତୁ ଭୀତ ହେଲେ। ¹³ଆଉ ମିସରୀୟମାନେ ଇସ୍ରାଏଲ ବଂଶୀୟ ଲୋକମାନଙ୍କୁ ନିଷ୍ଠୁର ଭାବରେ ଦାସ୍ୟକର୍ମ କରାଇଲେ। ¹⁴ପୁଣି ସେମାନେ କର୍ଦ୍ଦମ ଓ ଇଟା ସମ୍ବନ୍ଧୀୟ କଠିନ ପରିଶ୍ରମ ଓ କ୍ଷେତ୍ରର ସର୍ବପ୍ରକାର କର୍ମ ଦ୍ଵାରା ସେମାନଙ୍କ ଜୀବନକୁ ତିକ୍ତମୟ କଲେ; ଆଉ ସେମାନେ ଯେଉଁ ସମସ୍ତ କଠିନ କର୍ମ ସେମାନଙ୍କ ଦ୍ଵାରା କରାଇଲେ, ତାହା ନିଷ୍ଠୁର ଭାବରେ କରାଇଲେ।

¹⁵ଏଥିଉତ୍ତାରେ ମିସରର ରାଜା ଶିଫ୍ରା ଓ ପୂୟା ନାମକ ଦୁଇ ଏବ୍ରୀୟ ଧାଈକୁ କହିଲେ, ¹⁶“ତୁମ୍ଭେମାନେ ଏବ୍ରୀୟ ସ୍ତ୍ରୀମାନଙ୍କ ପ୍ରସବ ସମୟରେ ଉପକାର କରିବା ବେଳେ ପ୍ରସବାସନ ଉପରେ ଦୃଷ୍ଟି ରଖିବ; ଯଦି ପୁତ୍ର ହୁଏ, ତେବେ ତାହାକୁ ବଧ କରିବ; ମାତ୍ର ଯଦି କନ୍ୟା ହୁଏ, ତେବେ ତାହାକୁ ବଞ୍ଚିବାକୁ ଦେବ।” ¹⁷କିନ୍ତୁ ସେହି ଧାଈମାନେ ଆମ୍ଭମାନଙ୍କ ସ୍ଵର୍ଗସ୍ଥ ପିତାଙ୍କୁ ଭୟ କରିବାରୁ ମିସରର ରାଜା ସେମାନଙ୍କୁ ଯେପରି ଆଜ୍ଞା ଦେଇଥିଲେ, ସେପରି ନ କରି ବାଳକମାନଙ୍କୁ ବଞ୍ଚିବାକୁ ଦେଲେ। ¹⁸ତେଣୁ ମିସରର ରାଜା ଧାଈମାନଙ୍କୁ ଡାକି ସେମାନଙ୍କୁ କହିଲେ, “ତୁମ୍ଭେମାନେ କାହିଁକି ଏହା କରି ବାଳକମାନଙ୍କୁ ବଞ୍ଚିବାକୁ ଦେଲ?”

¹⁹ତହିଁରେ ଧାଈମାନେ ଫାରୋଙ୍କୁ କହିଲେ, “ଏବ୍ରୀୟ ସ୍ତ୍ରୀମାନେ ମିସରୀୟ ସ୍ତ୍ରୀମାନଙ୍କ ପରି ନୁହନ୍ତି; ସେମାନେ ବଳବତୀ, ଧାଈ ସେମାନଙ୍କ ନିକଟରେ ପହଞ୍ଚିବା ପୂର୍ବରୁ ସେମାନେ ପ୍ରସବ କରନ୍ତି।”

²⁰ଏଥିପାଇଁ ଆମ୍ଭମାନଙ୍କ ପିତା ସେହି ଧାଈମାନଙ୍କ ପ୍ରତି ମଙ୍ଗଳ କଲେ; ପୁଣି ଲୋକମାନେ ବହୁସଂଖ୍ୟକ ହୋଇ ଅତ୍ୟନ୍ତ ବଳବାନ ହେଲେ। ²¹ଆଉ ସେହି ଧାଈମାନେ ଆମ୍ଭମାନଙ୍କ ପିତାଙ୍କୁ ଭୟ କରିବାରୁ ସେ ସେମାନଙ୍କୁ ଏକ ଏକ ପରିବାର ଦେଲେ। ²²ଏଥିଉତ୍ତାରେ ଫାରୋ ଆପଣା ସମସ୍ତ ଲୋକଙ୍କୁ ଆଜ୍ଞା ଦେଇ କହିଲେ, “ଏବ୍ରୀୟମାନଙ୍କଠାରେ ଜନ୍ମ ହେଉଥିବା ପ୍ରତ୍ୟେକ ପୁତ୍ରକୁ ନୀଲ ନଦୀରେ ପକାଇଦେବ, ମାତ୍ର ପ୍ରତ୍ୟେକ କନ୍ୟାକୁ ବଞ୍ଚିବାକୁ ଦେବ।”