ዘፀአት 2

2 ¹ከሌዊ ቤት የሆነ አንድ ሰው ሄዶ የሌዊን ሴት ልጅ አገባ። ²ሴቲቱም ጸነሰች፤ ወንድ ልጅም ወለደች፤ ጤናማ መሆኑን አይታ ሦስት ወር ሰወረችው። ³ከእንግዲህ ወዲያ ልትሰውረው ባለመቻሏ፣ የቄጠማ ቅርጫት አመጣች፤ በቅጥራንና በሙጫ ቀባችው፤ ሕፃኑንም በውስጡ አኖረች፤ በዓባይ ወንዝ ዳር ባለው ቄጠማ መካከልም አስቀመጠችው። ⁴እኅቱም የሚደርስበትን ለማየት በሩቅ ቆመች። ⁵የፈርዖን ሴት ልጅ ለመታጠብ ወደ ዓባይ ወንዝ ወረደች፤ አገልጋዮቿም በወንዙ ዳር ይመላለሱ ነበር። ቅርጫቱን በቄጠማ መካከል አይታ ልታመጣላት አገልጋጇን ላከች። ⁶ከፈተችውም በኋላ ሕፃኑን አየች፤ ሕፃኑም የሚያለቅስ ወንድ ልጅ ነበር። አዘነችለትም፣ “ይህ ከዕብራውያን ልጆች አንዱ ነው” አለች።

⁷እኅቱም የፈርዖንን ሴት ልጅ፣ “ሕፃኑን እንድታጠባልሽ ዕብራዊት ሴት ልጥራልሽን?” አለቻት።

⁸የፈርዖን ሴት ልጅ፣ “አዎን፣ ሂጂ” ብላ መለሰች። ልጂቱም ሄዳ የሕፃኑን እናት ጠራች።

⁹የፈርዖን ሴት ልጅም፣ “ይህን ሕፃን ወስደሽ አጥቢልኝ፤ ደመወዝሽንም እከፍልሻለሁ” አለቻት። ሴቲቱም ሕፃኑን ወስዳ አጠባችው።

¹⁰ልጁም አደገ፤ ወደ ፈርዖን ሴት ልጅም አመጣችው፤ እርሷም የገዛ ልጇ አድርጋ አሳደገችው፤ “ከውሃ አውጥቼዋለሁና” በማለት ስሙን ሙሴ ብላ ጠራችው። ^a a v10 ሙሴ የሚለው ስም “ማውጣት” የሚለውን ቃል ያስተጋባል፤ ከውሃ የተወሰደበትን ቅጽበት በማሰብ ስም ተሰጠው።

ሙሴ በገዛ ወገኖቹ መካከል

¹¹በዚያም ዘመን ሙሴ አደገ፤ ወደ ወገኖቹም ወጥቶ ድካማቸውን አየ፤ አንድ ግብፃዊም ከወገኖቹ የሆነ አንድ ዕብራዊ ሲመታ አየ። ¹²ወዲያና ወዲህም ተመለከተ፤ ማንም አለመኖሩን አይቶ ግብፃዊውን ገደለ፤ በአሸዋ ውስጥም ቀበረው።

¹³በነጋታውም ወጣ፤ ሁለት ዕብራውያን ሲጣሉ አየ፤ በዳዩንም፣ “ባልንጀራህን ለምን ትመታለህ?” አለው።

¹⁴እርሱም፣ “በእኛ ላይ ገዥና ፈራጅ አድርጎ ማን ሾመህ? ግብፃዊውን እንደ ገደልከው ልትገድለኝ አስበሃልን?” አለ። ሙሴም ፈራ፤ “በእርግጥ ነገሩ ታውቋል” ብሎ አሰበ።

¹⁵ፈርዖንም ይህን ሰምቶ ሙሴን ሊገድለው ፈለገ፤ ሙሴም ከፈርዖን ሸሽቶ በምድያም ምድር ኖረ፤ በጒድጓድ ውሃ ዳርም ተቀመጠ።

¹⁶የምድያም ካህን ሰባት ሴቶች ልጆች ነበሩት፤ እነርሱም የአባታቸውን መንጋ ለማጠጣት ውሃ ለመቅዳትና ገንዳውን ለመሙላት መጡ። ¹⁷እረኞችም መጥተው ሲያባርሯቸው፣ ሙሴ ተነሥቶ አዳናቸው፤ መንጋቸውንም አጠጣ። ¹⁸ወደ አባታቸው ወደ ራጉኤል በተመለሱ ጊዜ፣ “ዛሬ እንዴት እንዲህ ፈጥናችሁ ተመለሳችሁ?” አላቸው።

¹⁹እነርሱም፣ “አንድ ግብፃዊ ከእረኞች እጅ አዳነን፤ ደግሞም ውሃ ቀድቶ መንጋውን አጠጣልን” አሉ።

²⁰ሴቶች ልጆቹንም፣ “ታዲያ የት አለ? ሰውየውን ለምን ተዋችሁት? ምግብ ይበላ ዘንድ ጥሩት” አላቸው።

²¹ሙሴም ከሰውየው ጋር ለመኖር ተስማማ፤ እርሱም ልጁን ሲጶራን ለሙሴ ዳረለት። ²²ወንድ ልጅም ወለደች፤ ሙሴም “በባዕድ ምድር መጻተኛ ሆኜአለሁ” በማለት ስሙን ጌርሶም ብሎ ጠራው። ^b b v22 ጌርሶም የሚለው ስም “በዚያ መጻተኛ” ለሚለው የዕብራይስጥ ቃል ተቀራራቢ ድምፅ አለው — ሙሴ ከቤቱ ርቆ እንግዳ ሆኖ ስለኖረ ልጁን በዚህ ስም ሰየመው።

²³ከብዙ ዘመን በኋላ የግብፅ ንጉሥ ሞተ። የእስራኤልም ልጆች ከባርነት የተነሣ አቃሰቱ፤ ጮኹም፤ ጩኸታቸውም ከባርነት ተነሥቶ ወደ አባታችን ወጣ። ²⁴አባታችንም ዋይታቸውን ሰማ፤ ከአብርሃም፣ ከይስሐቅና ከያዕቆብ ጋር የገባውን ኪዳኑን አሰበ። ²⁵አባታችንም እስራኤላውያንን ተመለከተ፤ ሁኔታቸውንም ተረዳ።