Thakdu Laaka Hubü Nashou
Levi saonyu cheei haoeibü nashou lit sem huan bukkukei, kheijinei kam che bunaiei naanglepan Nail thakdu laaka phokei, hoba Farao nouyangnyuei nashoueibü nyu lolo mu kuan hao ngaakei. Yaangan, Mosaei Ijepbü müt che haitikei hoba Midian to sepeikei. Israel haapbei, hoba seneibü Bouei ditan hao theyolanyobü damenkei.
2 1Hobaje Levi chemdang yoka müt che haukei hoba haoei Levi nouyangnyu che lekei. 2Hobaje yaksanyu mangakongko apbei hoba bousushou che bukkukei; hoba hao maibü nashou dogo hapan, saoei hao lit sem huan phokei. 3Hobaje hao touje huletla athükko, saoei kam che louan, kho bunaiei naanglepbei, hoba nashou kho khoka jinan, hoba kho Nail yungkoa thakdu laaka phokei. 4Hobaje hao na, hao to ai loushadlabü dogo chühla shanga, saabüa loan kikei. 5Hobaje Farao nouyangnyu Nail to mang yula louyenkei, hoba saoeibü sambü sao shuong Nail yungkoa paiko kikei. Hobaje saoei thakdu laaka kam kho hapbei, hoba kho leibala shanga saoeibü samnyu hautikei. 6Hobaje saoei kho ipan, nashou kho hapbei—bousushou na, ngekko kikei. Hobaje saoei hao to onoukei, hoba saoei laukei, “Ho Ibri shousi yoka che ki.”
7Hobaje hao naei Farao nouyangnyu to phekei, “Nashou kho ka la yopbula shanga, ngei Ibri yaksa che ngalabü lo?”
8Farao nouyangnyuei jongaikei, “Haü, hauashi.” Kheijinei medeinyu haukei hoba nashoueibü nyu ngaakei.
9Farao nouyangnyuei sao to laukei, “Ho nashou leian ngei ka la yopbushi; ngei kaibü mu kulabü.” Hobaje yaksanyuei nashou leian senyopbei.
10Hobaje nashou kho chingkei; hoba saoei hao Farao nouyangnyu jungto leian loukei, hoba saoei hao jembü shou tegü sungletkei, hoba hao nyen Mosa nyenkukei; hoba saoei laukei, “Aishanga ngei hao dei ka yaüankei.” a a v10 Mosa dogo nyen kho “yaüanla” dogo ngüh yoa sepeida; hao dei ka sungletbü jiha shanga hao nyenkukei.
Mosa Jembü Mütli Yoa
11Kho chalou shuonga Mosa chingan, haoei hao mütshuong jungto haukei, hoba haoeneibü on hapbei, hoba Ijepbü cheei haoeibü phang yoka Ibribü che to ngümbo hapbei. 12Hobaje haoei kaijembo chühsi, müt aki dogo hapan, Ijepbü to haitikei hoba kho tan ka huan phokei.
13Nyibounyet haoei koukei, hoba Ibribü müt nyi ngümeiko hapbei, hoba amaibou to laukei, “No aila kaibü maangjambou to ngümda?”
14Haoei laukei, “Aoei no sen thüka songdakbou hoba matjembou yeitikei? No Ijepbü to haitibü tegü ngo to haitila dambü lo?” Hobaje Mosa hatkei hoba dambei, “Maimaitham, ngüh hibü ngekenan kia.”
15Hobaje Faraoei kho ditkei hoba Mosa haitila lambei; lausikei Mosa Farao jungka satkei, hoba Midian kaonyeka settikei, hoba deikhün nyangko setkei.
16Midianbü ungshedboueibü nouyangnyu nyet kikei; hoba haoen, haoeneibü bou sanshuong la dei yungtian shanga, dei khula louan dangshang shentikei. 17Hobaje sanlombü shuong louan haoen shian sattikei, lausikei Mosa meimeian haoen khümenkei, hoba haoeneibü sanshuong la dei yungtikei. 18Ladang haoen haoeneibü bou Reuel jungto ngaikei, haoei phekei, “Aila tat kanei tongde sepeinyu ngaikei?”
19Haoenei laukei, “Ijepbü cheei sanlombü shuong ka kün khümenkei, hoba kün shanga dei sungan hoba sanshuong la dei yungtikei.”
20“Hao laka ki?” haoei haoeibü nouyangshou shuong to phekei. “Kanei aila müt kho tephokukei? Hao ngaan shauashi.”
21Mosaei müt kho yoa kila maang haikei, hoba haoei haoeibü nouyangshou Zippora Mosa la yakla lela kukei. 22Saoei bousushou che bukkei; Mosaei hao la Gershom nyenkukei, hoba laukei, “Ngo kükathanga yenla lean kikei.” b b v22 Gershom nyen kho Hebru ngüha "khünei yenbou" dogo laubü yoa semchühda; Mosaei haoeibü chem nei küka longan yenbou tegü langkei shangabü haoshou la kho nyen nyenkukei.
23Chalou lounyu kian phaia, Ijep chobaei haikei. Israel shousi shuongei aaola lebü shangabü wiyokei, hoba ngekkei; hoba haoeneibü ngühlang aaola ka seneibü Bou jungto lotkei. 24Seneibü Bouei haoeneibü wiyobü ditkei, hoba haoei Abraham to, Isak to, hoba Jakob to haoeibü theyolanyobü damenkei. 25Seneibü Bouei Israel shousi shuong to chühkei, hoba haoei ditenkei.
