په نله کښې پټ شوے بچے
یوه لیوۍ مور خپل زوی درې میاشتې پټوي، بیا یې په یوه قیرجنه ټوکرۍ کې د نیل د نیزارونو منځ کې ږدي، او د فرعون لور د هغه خپلې مور ته پیسې ورکوي چې شیدې ورکړي. موسیٰ چې لوی شي، یو مصري وژني او مدیان ته تښتي. اسرائيل ناله کوي، او زموږ پلار اوري او خپل لوظ یادوي.
2 1د لاوى د کورنۍ نه يو سړے لاړو او د لاوى يوه لور يې واده کړه. 2هغه ښځه اميدواره شوه او يو زوئ يې وزيږولو، او کله چې هغې وليدل چې هلک روغ رمټ دے، نو درې مياشتې يې پټ وساتلو. 3کله چې هغه نور پټ ساتلے نۀ شو، نو هغې د نل يوه ټوکرۍ راواخستله، په قير او رال يې ولمسوله، هلک يې په کښې کېښودو او د دريائ نيل په غاړه يې د نل په مينځ کښې کېښودو. 4د هغۀ خور لرې ودرېده چې وګورى چې په هغۀ باندې به څۀ کيږى. 5د فرعون لور د نيل نه د لمبلو دپاره راکُوزه شوه، او د هغې نوکرانې د نيل په غاړه ګرځېدلې. هغې د نل په مينځ کښې ټوکرۍ وليدله، نو خپله نوکره يې ولېږله چې هغه راوړى. 6هغې ټوکرۍ خلاصه کړه، او هلک يې وليدو، يو وړوکے هلک چې ژړل يې. د هغې زړۀ پرې درد وکړو او هغې ووئيل چې، ”دا د عبرانيانو د بچو نه يو دے.“
7د هغۀ خور د فرعون لور ته ووئيل چې، ”آيا زۀ لاړه شم او ستا دپاره يوه عبرانۍ ښځه راوبلم چې ستا دپاره دې هلک ته تئ ورکړى؟“
8د فرعون لور جواب ورکړو چې، ”هو، لاړه شه.“ نو جينۍ لاړه او د هلک مور يې راوبلله.
9د فرعون لور هغې ته ووئيل چې، ”دا هلک واخله او زما دپاره يې لوئ کړه، زۀ به دې مزدورى درکوم.“ نو ښځې هلک واخستلو او لوئ يې کړو.
10کله چې هلک لوئ شو، نو هغې هغه د فرعون لور ته راوستلو، او هغې هغه د خپل زوئ په شان قبول کړو، او نوم يې موسىٰ کېښودو، ”ځکه چې ما هغه د اوبو نه راوکاږلو.“ a a v10 د موسىٰ نوم د هغه لفظ سره اشاره کوى چې معنىٰ يې ”راکښل“ ده — د هغه وخت په ياد يې نوم کېښودو چې کله هغه د اوبو نه راپورته کړے شو.
موسىٰ د خپلو خلقو په مينځ کښې
11په هغه ورځو کښې کله چې موسىٰ لوئ شو، نو خپلو خلقو ته ورووتو او د هغوئ سخت کارونه يې وليدل، او وئې ليدل چې يو مصرى يو عبرانى، چې د هغۀ د قام نه وو، وهى. 12هغۀ چاپېره وکتل او چې چرته يې هيڅوک ونۀ ليدل، نو هغه مصرى يې ووژلو او په شګو کښې يې پټ کړو.
13بله ورځ هغه بيا ووتو او وئې ليدل چې دوه عبرانيان په خپلو کښې جنګيږى، نو هغۀ هغه ظالم ته ووئيل چې، ”تۀ ولې خپل ملګرے وهې؟“
14هغۀ ووئيل چې، ”تۀ چا زمونږ باندې حاکم او قاضى ټاکلے يې؟ آيا تۀ ما وژل غواړې لکه څنګه چې دې هغه مصرى ووژلو؟“ نو موسىٰ ووېرېدو او په زړۀ کښې يې ووئيل چې، ”خامخا دا خبره معلومه شوه.“
15کله چې فرعون دا واورېدل، نو هغۀ وغوښتل چې موسىٰ ووژنى، خو موسىٰ د فرعون نه وتختېدو او د مديان په مُلک کښې اوسېدو، او د يو کوهى په غاړه کښېناستو.
16د مديان د امام اووۀ لوڼه وې، هغوئ راغلې چې اوبۀ راوکاږى او د خپل پلار د رمې د اوبولو دپاره ناوې ډکې کړى. 17خو شپانۀ راغلل او هغوئ يې وشړلې، نو موسىٰ پاڅېدو، هغوئ يې بچ کړلې او د هغوئ رمه يې اوبۀ کړه. 18کله چې هغوئ خپل پلار رعوايل ته ورغلې، نو هغۀ ووئيل چې، ”نن تاسو ولې دومره ژر راستنې شوئ؟“
19هغوئ ووئيل چې، ”يو مصرى مونږ د شپانو نه بچ کړو، او د اوبو راکښلو کښې يې هم زمونږ مدد وکړو او رمه يې هم اوبۀ کړه.“
20هغۀ خپلو لوڼو ته ووئيل چې، ”هغه چرته دے؟ تاسو هغه سړے ولې پرېښودو؟ راوئې بلئ چې ډوډۍ وخورى.“
21موسىٰ راضى شو چې د هغه سړى سره اوسيږى، او هغۀ خپله لور صفوره موسىٰ ته په نکاح ورکړه. 22هغې يو زوئ وزيږولو، او موسىٰ د هغۀ نوم جرشوم کېښودو، او وئې وئيل چې، ”زۀ په پردى مُلک کښې پردے يم.“ b b v22 د جرشوم نوم د عبرانۍ ژبې د هغه لفظ غوندې اوريدے شى چې معنىٰ يې ”هلته پردے“ ده — موسىٰ د خپل زوئ نوم د خپل هغه ژوند په ياد کېښودو چې د کور نه لرې يې د مسافر غوندې تېرولو.
23ډېر وخت وروستو د مصر بادشاه مړ شو. د اِسرائيل زامنو د غلامۍ له کبله اهونه وکړل او چغې يې کړې، او د هغوئ چغه د غلامۍ له کبله زمونږ پلار ته ورسېده. 24زمونږ پلار د هغوئ اهونه واورېدل، او هغه خپل هغه لوظ په ياد شو چې د اِبراهيم، د اِضحاق او د يعقوب سره يې کړے وو. 25زمونږ پلار د اِسرائيليانو حال ته وکتل، او هغه پوهه شو.
