ሙሴ ኣብ ምድረ በዳ

ሙሴ ኣብ ስግር ምድረ በዳ እናጓሰየ፥ ናብ ሓደ ዘይሃልቕ እናነደደ ዝነድድ ቈጥቋጥ ዘወረ። ኣቦና ድማ ነቲ መከራ ኸም ዝረአየ፥ ነቲ ኣውያት ከም ዝሰምዐ፥ ከድሕን ከዓ ከም ዝወረደ ተዛረበ — ንሙሴ ኸዓ ይሰዶ ኣሎ። ስም ምስ ተሓተተ ድማ “ኣነ ዘለኹ እየ ዘለኹ” ኢሉ መለሰ።

ምዕራፍ 3።

ሙሴ ድማ መጓሰ ሓሙኡ ዮቶር፥ ካህን ምድያም፥ ይጓሲ ነበረ። ነቲ መጓሰ ናብ ስግር ምድረ በዳ መሪሑ ኸዓ፥ ናብ ኮሬብ፥ ናብ እምባ ኣቦና መፀ። መልኣኽ ኣቦና ድማ፥ ካብ ማእኸል ሓደ ቈጥቋጥ ብሃልሃል ዝብል ሓዊ፥ ተርኣዮ። ሙሴ ጠሚቱ ኸዓ፥ እንሆ፥ እቲ ቈጥቋጥ ይነድድ ነበረ፥ ግና ኣይሃልቕን ነበረ። ሙሴ ድማ “ክኸይድ እሞ ነዝ ዘደንቕ ትርኢት እዙይ፥ እዝ ቈጥቋጥ ስለምንታይ ከም ዘይሃልቕ ክርኢ” በለ።

ኣቦና ድማ ንምርኣይ ከም ዝዘወረ ምስ ረአየ፥ ካብ ማእኸል እቲ ቈጥቋጥ “ሙሴ፥ ሙሴ!” ኢሉ ፀውዖ። ንሱ ኸዓ “እኔኹ” በለ።

ንሱ ኸዓ “ናብዙይ ኣይትቕረብ፤ ዝቖምካሉ ቦታ ቅዱስ መሬት እዩ እሞ፥ ኣሳእንካ ካብ ኣእጋርካ ኣውፅእ” በሎ። ንሱ ድማ “ኣነ ኣቦኻ፥ ኣምላኽ ኣብርሃምን ኣምላኽ ይስሓቅን ኣምላኽ ያእቆብን እየ” በሎ። ሙሴ ኸዓ ናብ ኣቦና ኽጥምት ፈሪሑ ነበረ እሞ፥ ገፁ ሸፈኖ።

ኣቦና ድማ ከምዙይ በለ፦ “ኣብ ግብፂ ዘሎ መከራ ህዝበይ ብሓቂ ርእየ፤ ብሰንኪ ኣዘዝቶም ዝእዉይዎ ኣውያቶም ሰሚዐ፤ ጭንቀቶም እፈልጥ እየ እሞ። ስለዙይ ካብ ኢድ ግብፃውያን ከድሕኖም፥ ካብታ ምድሪ እቲኣ ኸዓ ናብ ፅብቕትን ገፊሕትን ምድሪ፥ ናብ ፀባን መዓርን እተውሕዝ ምድሪ፥ ናብ ቦታ ከነዓናውያንን ኬጢያውያንን ኣሞራውያንን ፈሪዛውያንን ሔዋውያንን ኢያቡሳውያንን ከደይቦም ወሪደ ኣለኹ። ሕዚ ኸዓ ኣውያት ደቂ እስራኤል ናባይ በፂሑ፤ እቲ ግብፃውያን ዝገፍዕዎም ዘለዉ ግፍዒ ድማ ርእየ። ሕዚ ኺድ፤ ንህዝበይ ንደቂ እስራኤል ካብ ግብፂ ኸተውፅኦም፥ ናብ ፈርዖን ክሰደካ እየ።”

ሙሴ ኸዓ ንኣቦና “ናብ ፈርዖን ክኸይድ፥ ንደቂ እስራኤል ድማ ካብ ግብፂ ከውፅእ፥ ኣነ መን እየ?” በሎ።

ንሱ ኸዓ “ኣነ ብርግፅ ምሳኻ ክኸውን እየ። ከም ዝለኣኽኩኻ ዝፍለጠሉ ምልክት ከዓ እዙይ እዩ፦ ነቲ ህዝቢ ካብ ግብፂ ምስ ኣውፃእካ፥ ኣብዝ እምባ እዙይ ንኣቦኻ ኽተምልኽ ኢኻ” በሎ።

ሙሴ ኸዓ ንኣቦና ከምዙይ በሎ፦ “እንሆ፥ ኣነ ናብ ደቂ እስራኤል ከይደ ‘ኣምላኽ ኣቦታትኩም ናባኻትኩም ለኣኸኒ’ እንተ በልክዎም፥ ንሳቶም ድማ ‘ስሙ መን እዩ?’ ኢሎም እንተ ሓተቱኒ፥ እንታይ ክብሎም?”

ኣቦና ድማ ንሙሴ “ኣነ ዘለኹ እየ ዘለኹ” በሎ። ኣስዒቡ ኸዓ “ንደቂ እስራኤል ‘ኣነ ዘለኹ ናባኻትኩም ለኣኸኒ’ በሎም” በለ። ^a ኣቦና ድማ መሊሱ ንሙሴ ከምዙይ በሎ፦ “ንደቂ እስራኤል ከምዙይ በሎም፦ ‘ኣቦኻትኩም፥ ኣምላኽ ኣብርሃም፥ ኣምላኽ ይስሓቅ፥ ኣምላኽ ያእቆብ፥ ናባኻትኩም ለኣኸኒ።’ እዙይ ንዘለኣለም ስመይ እዩ፤ ኣብ ኵሉ ወለዶ ድማ በዙይ ክዝከር እየ። ኺድ፥ ንዓበይቲ እስራኤል ኣኪብካ ኸዓ ከምዙይ በሎም፦ ኣቦኻትኩም፥ ኣምላኽ ኣብርሃም፥ ኣምላኽ ይስሓቅ፥ ኣምላኽ ያእቆብ፥ ተገሊፁለይ ከምዙይ በለ፦ ብርግፅ ተመልኪተኩም ኣለኹ፤ ኣብ ግብፂ ዝግበረኩም ዘሎ ድማ ርእየ፤ ካብ መከራ ግብፂ ናብ ምድሪ ከነዓናውያንን ኬጢያውያንን ኣሞራውያንን ፈሪዛውያንን ሔዋውያንን ኢያቡሳውያንን፥ ናብ ፀባን መዓርን እተውሕዝ ምድሪ ኸደይበኩም ተመባፂዐ ኣለኹ። ናባኻ ድማ ክሰምዑ እዮም። ንስኻን ዓበይቲ እስራኤልን ከዓ ናብ ንጉስ ግብፂ ኬድኩም ከምዙይ በልዎ፦ ‘ኣቦ ዕብራውያን ተራኺቡና ኣሎ። ሕዚ ኸዓ ንኣቦና ክንስውእ፥ መንገዲ ሰለስተ መዓልቲ ናብ ምድረ በዳ ኽንከይድ በይዛኻ ሕደገና።’ ንጉስ ግብፂ ግና፥ ብብርቱዕ ኢድ እንተ ዘይኮይኑ፥ ከም ዘይሰደኩም እፈልጥ እየ። ኣነ ኸዓ ኢደይ ዘርጊሐ፥ በቲ ኣብኣ ዝገብሮ ዅሉ ተኣምራት ንግብፂ ክወቕዓ እየ፤ ድሕሪኡ ኸዓ ክሰደኩም እዩ። ነዝ ህዝቢ እዙይ ኣብ ቅድሚ ግብፃውያን ሞገስ ከትርፈሉ እየ፤ ምስ ወፃእኹም ከዓ ጥራሕ ኢድኩም ኣይክትከዱን ኢኹም። ነፍሲ ወከፍ ሰበይቲ ኻብ ጐረቤታን ካብታ ኣብ ገዝኣ እትነብር ሰበይትን፥ ኣቑሑ ብሩርን ወርቅን ክዳውንትን ትልምን፤ ንኣወዳትኩምን ኣዋልድኩምን ድማ ኣልብስዎም። ከምዙይ ጌርኩም ድማ ንግብፃውያን ክትዘምትዎም ኢኹም።” ^b