Eksodu 3

3 ¹Mose ń ṣọ́ agbo ẹran àna rẹ̀, Jetro, àlùfáà Midiani. Ó darí agbo ẹran náà sí ìhà kejì aginjù, ó sì dé Horebu, òkè Baba wa. ²Níbẹ̀ ni ìránṣẹ́ Baba wa fara han án nínú ọwọ́ iná tí ó ń jó láàrin igbó kan. Mose wò ó: igbó náà ń jó ṣùgbọ́n kò jóná run. ³Mose wí pé, “Jẹ́ kí n yà sí ibẹ̀ kí n sì wo ìran ìyanu yìí—ìdí tí igbó náà kò fi jóná run.”

⁴Nígbà tí Baba wa rí i pé ó yà wá wò ó, ó pè é láti inú igbó náà pé, “Mose, Mose!” Mose sì wí pé, “Èmi nìyí.”

⁵Ó wí pé, “Má súnmọ́ bí. Bọ́ bàtà rẹ kúrò ní ẹsẹ̀ rẹ, nítorí ilẹ̀ tí o dúró lé jẹ́ ilẹ̀ mímọ́.” ⁶Ó sì wí pé, “Èmi ni Baba rẹ, Ọlọ́run Abrahamu, Ọlọ́run Isaaki, àti Ọlọ́run Jakọbu.” Mose sì bo ojú rẹ̀, nítorí ó bẹ̀rù láti wo Baba wa.

⁷Nígbà náà ni Baba wa wí pé, “Mo ti rí ìpọ́njú àwọn ènìyàn mi ní Ijipti nítòótọ́, mo ti gbọ́ igbe wọn lábẹ́ àwọn ọ̀gá tí ń lé wọn níṣẹ́, nítorí mo mọ ìnira wọn. ⁸Nítorí náà mo ti sọ̀kalẹ̀ wá láti gbà wọ́n sílẹ̀ kúrò lọ́wọ́ àwọn ará Ijipti, àti láti mú wọn gòkè kúrò ní ilẹ̀ náà lọ sí ilẹ̀ rere tí ó tẹ́jú—ilẹ̀ tí ń ṣàn fún wàrà àti oyin—sí ibi tí àwọn ará Kenaani, àwọn ará Hiti, àwọn ará Amori, àwọn ará Perisi, àwọn ará Hifi, àti àwọn ará Jebusi ń gbé. ⁹Nísinsìnyí, igbe àwọn ọmọ Israẹli ti dé ọ̀dọ̀ mi, mo sì ti rí ìnilára tí àwọn ará Ijipti fi ń ni wọ́n lára. ¹⁰Nísinsìnyí, lọ—mo ń rán ọ sí Farao, láti mú àwọn ènìyàn mi, àwọn ọmọ Israẹli, jáde kúrò ní Ijipti.”

¹¹Mose sì wí fún Baba wa pé, “Ta ni èmi tí n ó fi lọ sọ́dọ̀ Farao, kí n sì mú àwọn ọmọ Israẹli jáde kúrò ní Ijipti?”

¹²Ó sì wí pé, “Dájúdájú èmi yóò wà pẹ̀lú rẹ. Èyí ni àmì rẹ pé èmi ni ó rán ọ: nígbà tí o bá mú àwọn ènìyàn náà jáde kúrò ní Ijipti, ìwọ yóò sin Baba rẹ lórí òkè yìí.”

¹³Nígbà náà ni Mose wí fún Baba wa pé, “Bí mo bá lọ sọ́dọ̀ àwọn ọmọ Israẹli, tí mo sì wí fún wọn pé, ‘Ọlọ́run àwọn baba yín ni ó rán mi sí yín,’ tí wọ́n sì béèrè lọ́wọ́ mi pé, ‘Kí ni orúkọ rẹ̀?’—kí ni èmi yóò wí fún wọn?”

¹⁴Baba wa sì wí fún Mose pé, “ÈMI NI ẸNI TÍ ÈMI Í ṢE.” Ó sì wí pé, “Báyìí ni ìwọ yóò wí fún àwọn ọmọ Israẹli: ‘ÈMI NI ni ó rán mi sí yín.’” ^a a v14 Nígbà tí Jesu wí pé “kí Abrahamu tó wà, ÈMI NI” (Johannu 8:58), orúkọ náà gan-an tí Baba wa fún Mose níhìn-ín ni ó ń sọ. ¹⁵Baba wa sì tún wí fún Mose pé, “Báyìí ni ìwọ yóò wí fún àwọn ọmọ Israẹli: ‘Baba yín—Ọlọ́run Abrahamu, Ọlọ́run Isaaki, àti Ọlọ́run Jakọbu—ni ó rán mi sí yín.’ Èyí ni orúkọ mi títí láé, àti bí a ṣe ń rántí mi láti ìran dé ìran. ¹⁶Lọ, kó àwọn àgbàgbà Israẹli jọ, kí o sì wí fún wọn pé: Baba yín—Ọlọ́run Abrahamu, Ọlọ́run Isaaki, àti Ọlọ́run Jakọbu—fara han mí, ó sì wí pé: Dájúdájú mo ti bójútó yín, mo sì ti rí ohun tí a ń ṣe sí yín ní Ijipti, ¹⁷Mo sì ti ṣèlérí láti mú yín gòkè kúrò nínú ìpọ́njú Ijipti lọ sí ilẹ̀ àwọn ará Kenaani, àwọn ará Hiti, àwọn ará Amori, àwọn ará Perisi, àwọn ará Hifi, àti àwọn ará Jebusi—ilẹ̀ tí ń ṣàn fún wàrà àti oyin. ¹⁸Wọn yóò sì fetí sí ọ. Ìwọ àti àwọn àgbàgbà Israẹli ní láti lọ sọ́dọ̀ ọba Ijipti, kí ẹ sì wí fún un pé, ‘Baba àwọn ará Heberu ti pàdé wa. Nísinsìnyí, jọ̀wọ́ jẹ́ kí a rin ìrìn ọjọ́ mẹ́ta sí inú aginjù láti rú ẹbọ sí Baba wa.’ ¹⁹Ṣùgbọ́n mo mọ̀ pé ọba Ijipti kì yóò jẹ́ kí ẹ lọ, àyàfi nípa ọwọ́ agbára. ²⁰Èmi yóò na ọwọ́ mi, èmi yóò sì kọlu Ijipti pẹ̀lú gbogbo iṣẹ́ ìyanu tí èmi yóò ṣe níbẹ̀; nígbà náà ni yóò jẹ́ kí ẹ lọ. ²¹Èmi yóò sì mú kí àwọn ará Ijipti fi ojúrere wo àwọn ènìyàn yìí, nítorí náà nígbà tí ẹ bá lọ, ẹ kì yóò lọ lọ́wọ́ òfo. ²²Obìnrin kọ̀ọ̀kan ní láti béèrè lọ́wọ́ aládùúgbò rẹ̀ àti lọ́wọ́ obìnrin tí ń gbé ní ilé rẹ̀ fún ohun èlò fàdákà àti wúrà àti aṣọ, kí ẹ sì fi wọ́n wọ àwọn ọmọkùnrin àti ọmọbìnrin yín. Báyìí ni ẹ ó ṣe kó ẹrù àwọn ará Ijipti.” ^b b v22 Israẹli tí ó kúrò ní Ijipti pẹ̀lú ọrọ̀ mú ìlérí Baba fún Abrahamu nínú Genesisi 15:14 ṣẹ.