Shongzā 3

3 ¹Mosesna awova̱ Midianwui pāngmon Jethrowui yao ashangva̱ homsai. Ana yao ashangva̱ chi lamhāngwui katāva̱li thānvāda, ithumwui Avāwui phungrei Horebli vāshunghaowa. ²Apam chili ithumwui Avāwui kazingrao china thingrong alungwui eina meiwon shokta meili ali rāchithei. Mosesna yanga: thingrong chi mei kachuilakla makānmana. ³Mosesna hānga, "Khisāda thingrong chi makānmakhala, ina vāda hi matakhak kahai ot chi yangkhuira."

⁴Ithumwui Avāna ana yangkhui khavai hanthuihai kaji theilaga, thingrong alungwui eina ali kakhane sāda, "Moses, Moses!" da hānga. Mosesna hānga, "Ina hili lei."

⁵Ana hānga, "Rida marānganaialu. Napheiwui eina napheihop khuishoklu, kaja na nganingpama ngalei chi katharana." ⁶Ana hānga, "Ina nawui Avā, Abrahamwui, Isaacwui kala Jacobwui Varena." Mosesna amai ngathumhaowa, kaja ithumwui Avāli yangkhui khavai ngacheehaowa.

⁷Chieina ithumwui Avāna hānga, "Egypt ngaleili iwui mibingwui sāshilak eina kasā chi kachangkhat eina theihaira, athumwui kashinabingwui azingli athumwui khangakao ina shāhaira, kaja athumwui kachotkachāng ina thei. ⁸Chiwui vang eina ina katāhaira, Egyptnaobingwui pāng eina athumli ngatangkhui khavai kala ngalei chiwui eina seina̱ eina khuira̱ khalonga kaphā kala khamashā ngalei, Canaannaobing, Hitnaobing, Amornaobing, Periznaobing, Hivnaobing kala Jebusnaobingwui apamli thānshok khavai. ⁹Ara Israelnaobingwui khangakao ili samphanghaira, kala Egyptnaobingna athumli rekakharek ngasak chi ina theihaira. ¹⁰Ara rālu; iwui mibing Israelwui naomayarabing chi Egyptwui eina thānshok khavai ina nali Pharaohli chihovāra."

¹¹Mosesna ithumwui Avāli hānga, "Ina khipākha ngasāda Pharaohli vāda, Israelnaobingli Egyptwui eina thānshokrakhala?"

¹²Ana hānga, "Ina kachangkhata nali ngasopamra. Hi ina nali chihovāhaira kaji nawui machutna: nathumna mibing chi Egyptwui eina thānshok tharan, hi phungreili nathumwui Avāli khorumra."

¹³Chieina Mosesna ithumwui Avāli hānga, "Ina Israelnaobingli vāda athumli, 'Nathumwui avā ngarāwui Varena ili nathumli chihovāhaira,' da hāngakha, kala athumna ili, 'Awui aming khikhala?' da ngahānakha ina athumli khi hāngra?"

¹⁴Ithumwui Avāna Mosesli hānga, "INA LEIPA CHI INA." Chieina ana hānga, "Israelnaobingli hānglu: 'INA LEIPAna ili nathumli chihovāhaira.'" ^a a v14 Jishuna "Abraham maleiranglakha, INA LEIPA" (John 8:58) da kahāng tharan, ithumwui Avāna hipamli Mosesli mihai aming chi ana hāngkahaina. ¹⁵Ithumwui Avāna Mosesli latluida hānga, "Israelnaobingli hānglu: 'Abrahamwui, Isaacwui kala Jacobwui Vare, nathumwui Avāna ili nathumli chihovāhaira.' Hi mashimānla iwui mingna, kala thot-thot kachida ili phaningung khavai kajina. ¹⁶Rālu, Israelwui khararnaobing kazipserlaga athumli hānglu: Abrahamwui, Isaacwui kala Jacobwui Vare, nathumwui Avāna ili samphangda hānga: Ina kachangkhata nathumli yangkhamihaira, kala Egyptli nathumli sāhai chi theihaira, ¹⁷Ina ngashithaira, Egyptwui misera eina nathumli seina̱ eina khuira̱ khalonga ngalei, Canaannaobing, Hitnaobing, Amornaobing, Periznaobing, Hivnaobing kala Jebusnaobingwui ngaleili thānshokra. ¹⁸Athumna nawui tui nganāra. Nala Israelwui khararnaobingla Egyptwui awungali vāda ali hānglu, 'Hebrewnaobingwui Avāna ithumli samphanghaira. Ara kathumthangzat lamhāngli vāda ithumwui Avāli pha̱phayā khavai kha-vā ngasakmilu da kapona.' ¹⁹Kha pāngthei kharei chieina maningla Egyptwui awungana nathumli machihomara da ina theihaira. ²⁰Ina ipāng katingshokta chili ina sāki matakhak kahai saikora eina Egyptli shaora; chiwui thili ana nathumli chihora. ²¹Ina Egyptnaobingna mi hili ngahānngai khavai yangmira, chieina nathum kashok tharan khamasai eina mavāmara. ²²Preiva̱ kachiva̱na kachichāshi khongnainaoli kala awui shimli khalei preiva̱li sināwui, lupāsāwui chara̱-chasān kala kashankachon pokhui ngasaklu, kala chi eina nathumwui naomayarabing kala naongalāva̱bingli ngavaimira. Chithāda nathumna Egyptnaobingli sākazamra." ^b b v22 Israelna lan eina Egyptwui eina kashok chi, Avāna Abrahamli Genesis 15:14li ngashithaikasā chi ungshungmina.