Haokaphok 43

43 ¹Ara ngaleili zāt kasak kateokha maningmana. ²Athumna Egyptwui eina khuirā kashakazā chi zākuphaira tharan avāva̱na hānga, "Latungda ithumwui vang zāt kasha̱kha aloluilu."

³Kha Judahna ali hānga, "Mipa china ithumli titlak eina kasoi: 'Nachinā maleila nathumna iwui azak mayangmara.' ⁴Nana ithumwui achinā ithum sangda chihoakha, ithum kakhuilaga nawui vang kashakazā talokhuira. ⁵Kha nana ali machihoakha, ithum mavāmara, khikhalajila mipa china hānga, 'Nachinā maleila nathumna iwui azak mayangmara.'"

⁶Israelna hānga, "Khisāda nathumna mipali nachinā khangatei akha khalei da hānglaga ili ka̱lāshi sāhaokhala?"

⁷Athumna hānga, "Mipa china ithum khalatta eina ithumwui shimkhurwui pongli khangahān kachungkha sai: 'Nathumwui avā ringda khalei leikhala? Nathumwui nachinā khangatei akha leila?' Ithumna chi athishurda ngahānkai. Ana 'Nachinā thānrālu' da hāngra kaji ithumna kathada theirakhala?"

⁸Judahna avā Israelli hānga, "Nao chi ili ngasovāmilu; ithum, na, kala ithumwui naoshinao ringlaga mathi khavai zatusa. ⁹Ina awui vang khalatta nganingkhui; iwui eina ali kapolu. Ina ali mathānunglaga nawui mangāli mashuakha, nawui mangāli katang makhavai ina kaphen phungra. ¹⁰Khikhalajila ithum makharā huilakha, ara tangda ithum khani shida latungluilapai."

¹¹Avāva̱ Israelna athumli hānga, "Chi hithāda sāphalungakha, hithāda sālu: ngaleiwui mathāmeikap lan chi nathumwui khaoli phungda, balm kasha̱kha, khuira̱ kasha̱kha, nganamkaphā thao, myrrh, pistachio, kala almond chi mipali khami akha sāda khuivāmilu. ¹²Lupā khani shida khuiphunglu, kala nathumwui khaoli khāmongli hanmihaikahai lupā chila thanung khuiphunglu; chi malai eina shokkahailapai. ¹³Nathumwui nachinā chila khuiphunglaga mipali latunglu. ¹⁴Pangshap sāshapa ithumwui Avāna mipā chiwui mangāli nathumli lukhamashan chitheimiranu, chithākha ana nathumwui khangatei nachinā kala Benjamin chi chihomira. Kala iwui vanga, ina inaongarā makhaleiana, makhalei ngasakhaira."

¹⁵Mibingna khami chi, lupā khani shida, kala Benjamin chi khuilaga Egyptli kakhum eina Josephwui mangāli nganinga.

¹⁶Josephna Benjamin athum sangda leikahai kathei eina awui shim ngatha̱khameli hānga, "Mibing chi shimshong khuirālu, sā akha taithatlaga khangarān sālu, kaja athum pung katharukali ili sangda phazāra." ¹⁷Mipa china Josephna hāngkahai athishurda sai, kala ana mibing chi Josephwui shimli khuirai. ¹⁸Mibing china Josephwui shimli khuizangda eina ngacheenā. Athumna hānga, "Hi khare shida ithumwui khaoli latunga pheisā chiwui vang, ithumli attai khavai, ithumtungli rāngarar khavai, ithumli raonao sāda tukkhui khavai, kala ithumwui gadhābing khuikhavai, ithumli shimli khuizanga." ¹⁹Chieina athumna Josephwui shimwui kashina chili nganaida khāmongli ali hānga, ²⁰kala hānga, "Amei, kachangkhat eina ithum khare shida kashakazā lokhavai rāhaira. ²¹Ithumwui shimzunpamli akhao pheikhayang chitharān, mi kachiva̱wui pheisā akhamorli khān pemtha̱ eina zangsāsera. Chi ithum eina khuilatungrāhaina. ²²Kashakazā lokhavai pheisā kateila ithumna khuirāhaira, kha khipāna chi ithumwui khaoli sangmikhala ithumna matheimana."

²³Ana hānga, "Chingrihairanu, mangacheealu. Nathumwui Avāna kala nathumwui avāwui Varena nathumwui khaoli lan mihaira; nathumwui aman iwuili rākachangkhata." Chieina ana Simeonli athumshong khuishoklaga mi. ²⁴Mipā china athumli Josephwui shimli khuizanglaga tara̱ mi, kala athumna phei pheowa; kala ana athumwui gadhā zātla khuimi. ²⁵Chieina Josephwui ngashunung atamli rā khavai athumna run khangarān sai, kaja athumna chili phazāra da theihaira. ²⁶Josephna shimli ung tharan athumna apāngli khalei run chi ali khuirālaga ngaleili kui mashunzangda ali khoruma. ²⁷Ana athum kathada leikhala da ngahānda hānga, "Nathumna kahāng kasarapa nathumwui avā chi mashungla? Aru kharing chiralā?"

²⁸Athumna hānga, "Nawui rao ithumwui avā mashunga, kala aru ringda lei." Chieina athumna kui mashunzangda mai ngakhumshām eina khoruma. ²⁹Ana mik yangkakā eina, achinā Benjamin, ava̱wui nao chi theilaga hānga, "Hi nathumna ili kahāng nathumwui agato paisho achinā chilā?" Chieina ana hānga, "Ithumwui Avāna nali lumashanmiranu, inao." ³⁰Josephna achināwui vang lumashana pemtinghaoda, chapa khavai apam phāda hengsāda kayāngli shoka; kala awui kā chili zangda chili chapa. ³¹Chieina ana amai ra̱vailaga shoka; kala khalatta ningtarngasakda hānga, "Kashakazā sangmilu."

³²Athumna alila amāng sangmi, achinābing chila amāng, kala ali ngasoda phazā Egyptnaobinglila amāng sangmi, kaja Egyptnaobingna Hebrewnaobing ngasoda kashakazā mashaipaimana, chi athumli ningkakachai otna. ³³Naochizai chi awui khararpam athishurda, paisho chi awui nganuilak athishurda athumna awui mangāli pama; kala mibing china akha eina akha matakhakhaowa. ³⁴Ana awui table eina yar khuilaga athumli chihovāmi, kha Benjaminwui yar chi khangateibingwui yarwui eina phangāshi mataimeikapa. Chieina athumna ali ngasoda manglaga mathāna.