ጥሜት ነታ ምድሪ ገቲርዋ

ጥሜት ጥራሕ እዩ ንያእቆብ ንብንያም ክፈትሕ ዝደረኾ፥ ናብቲ ዅሉ ዝኽእል ኣቦና ኣማሕፂኑ፥ ይሁዳ ኸዓ ህይወቱ ኣብ ክንድኡ ኣትሓዘ። ኣብ ግብፂ ኣሕዋት ማእሰርቲ ተፀበዩ፥ ኣብ ክንድኡ ግና ኸም ቅደም ልደቶም ተቐሚጦም ድራር ረኸቡ። ዮሴፍ ንብንያም ምስ ረአየ ኽበኪ ኻብቲ ክፍሊ ክወፅእ ኣድለዮ።

ምዕራፍ 43።

እቲ ጥሜት ድማ ኣብታ ምድሪ በርቲዑ ነበረ። እቲ ኻብ ግብፂ ዝመፀ እኽሊ በሊዖም ምስ ወድኡ፥ ኣቦኦም “ተመሊስኩም ቑሩብ ብልዒ ግዝኡልና” በሎም።

ይሁዳ ግና ከምዙይ በሎ፦ “እቲ ሰብኣይ ‘ብዘይ ሓውኩም ገፀይ ኣይክትርእዩን ኢኹም’ ኢሉ ኣፅኒዑ ኣጠንቂቑና እዩ። ንሓውና ምሳና እንተ ለኣኽካዮ፥ ወሪድና ብልዒ ክንገዝኣልካ ኢና። እንተ ዘይለኣኽካዮ ግና ኣይንወርድን ኢና፤ እቲ ሰብኣይ ‘ብዘይ ሓውኩም ገፀይ ኣይክትርእዩን ኢኹም’ ኢሉና እዩ እሞ።”

እስራኤል ድማ “ካልእ ሓው ከም ዘለኩም ነቲ ሰብኣይ ብምንጋርኩም ስለ ምንታይ ጐዳእኩምኒ?” በለ።

ንሳቶም ከዓ ከምዙይ በሉ፦ “እቲ ሰብኣይ ብዛዕባ ርእስና፥ ብዛዕባ ቤተ ሰብና ኸዓ ‘ኣቦኹም ገና ብህይወት ኣሎዶ? ካልእ ሓውከ ኣለኩምዶ?’ ኢሉ ኣፀቢቑ ጠየቐና፤ ንሕናውን ከምኡ መለስናሉ። ‘ንሓውኩም ኣውርድዎ’ ከም ዝብል ኸመይ ኢልና ኽንፈልጦ ንኽእል?”

ይሁዳ ድማ ነቦኡ እስራኤል ከምዙይ በሎ፦ “ንሕናን ንስኻን ደቅናን ምእንቲ ኽንነብር እምበር ከይንመውት፥ ነቲ ቘልዓ ምሳይ ልኣኾ፤ ንበገስ ድማ። ኣነ ኣብ ክንድኡ ውሕስ እኸውን፤ ካብ ኢደይ ድለዮ። እንተ ዘይመሊሰዮ፥ ኣብ ቅድሜኻውን እንተ ዘየቕመጥክዎ፥ ንዘለኣለም ኣብ ቅድሜኻ በዳሊ ክኸውን እየ። ኣይደንጐናን እንተ ንኸውን፥ ክሳዕ ሕዚ ብርግፅ ክልተ ሻዕ ምተመለስና ኔርና።”

እስራኤል ኣቦኦም ድማ ከምዙይ በሎም፦ “እንተ ኾይኑ እሞ ከምዙይ ግበሩ፦ ካብ ፅቡቕ ፍርያት እታ ምድሪ ኣብ ኣቑሑኹም ኣእትዉ፤ ነቲ ሰብኣይ ድማ ገፀ በረከት ውሰዱ፦ ቑሩብ ሽቱ፥ ቑሩብ መዓር፥ ቀመማት፥ ከርበን፥ ፉል፥ ለውዝ። ዕፅፊ ገንዘብ ድማ ውሰዱ፤ እቲ ኣብ ኣፍ ለቛቱኹም ተመሊሱ ዝነበረ ገንዘብ ከዓ ብኢድኩም መሊስኩም ውሰድዎ፤ ምናልባሽ ጌጋ ይኸውን። ንሓውኩምውን ውሰዱ፤ ተልዒልኩም ድማ ናብቲ ሰብኣይ ተመለሱ። እቲ ዅሉ ዝኽእል ኣቦና ድማ ኣብ ቅድሚ እቲ ሰብኣይ ምሕረት ይሃብኩም፤ ነቲ ኻልእ ሓውኩምን ንብንያምን ድማ ይፈትሓልኩም። ኣነ ኸዓ ውሉደይ እንተ ተቐዝፍኩ፥ ይቐዘፍ።”

እቶም ሰባት ድማ ነቲ ገፀ በረከትን ዕፅፊ ገንዘብን ንብንያምን ወሲዶም፥ ናብ ግብፂ ወረዱ፤ ኣብ ቅድሚ ዮሴፍ ድማ ደው በሉ።

ዮሴፍ ድማ ንብንያም ምሳታቶም ምስ ረአየ፥ ነቲ ኣዛዚ ቤቱ “ነዞም ሰባት ናብ ገዛ ኣእትዎም፤ እንስሳ ሓሪድካ ድማ ኣሰናድዎ፤ እዞም ሰባት ኣብ ፍርቂ መዓልቲ ምሳይ ክበልዑ እዮም እሞ” በሎ። እቲ ሰብኣይ ድማ ከምቲ ዮሴፍ ዝበሎ ገበረ፤ ነቶም ሰባትውን ናብ ቤት ዮሴፍ ኣእተዎም። እቶም ሰባት ድማ ናብ ቤት ዮሴፍ ስለ ዝኣተዉ ፈርሑ፤ ከምዙይ ከዓ በሉ፦ “እዝ ዝኣቶናስ፥ ብምኽንያት እቲ ቐዳማይ ሻዕ ኣብ ለቛቱና ተመሊሱ ዝነበረ ገንዘብ እዩ፤ ምእንቲ ኽወቕዑናን ኣብ ልዕሌና ኽወድቑን ባሮት ገይሮም ኽሕዙናን ኣእዱግናውን ክወስዱን እዩ።” ስለዙይ ነቲ ኣዛዚ ቤት ዮሴፍ ቐሪቦም፥ ኣብ ኣፍ ደገ ተዛረብዎ፤ ከምዙይ ድማ በሉ፦ “ኣታ ጐይታይ! በይዛኻ፥ ቅድም ብልዒ ኽንገዝእ ብርግፅ ወሪድና ኔርና። ኣብቲ ዝሓደርናሉ ቦታ፥ ለቛቱና ምስ ፈታሕና፥ እንሆ ናይ ነፍሲ ወከፍ ገንዘብ ምሉእ ብምሉእ ብሚዛን ኣብ ኣፍ ለቘታኡ ነበረ፤ ንሕናውን መሊስናዮ ኣለና። ብልዒ ኽንገዝእ ድማ ካልእ ገንዘብ ኣምፂእና ኣለና፤ መን ኣብ ለቛቱና ኸም ዘንበሮ ግና ኣይንፈልጥን ኢና።”

ንሱ ድማ “ሰላም ምሳኻትኩም ይኹን፤ ኣይትፍርሑ። ኣቦኻትኩምን ኣምላኽ ኣቦኹምን ኣብ ለቛቱኹም መዝገብ ሃበኩም፤ ገንዘብኩም ናባይ መፂኡ እዩ” በሎም። ንስምኦንውን ኣውፅአሎም። እቲ ሰብኣይ ድማ ነቶም ሰባት ናብ ቤት ዮሴፍ ኣእተዎም፤ ማይ ድማ ሃቦም እሞ ኣእጋሮም ተሓፀቡ፤ ንኣእዱጎምውን ዝብላዕ ሃበን። ዮሴፍ ኣብ ፍርቂ መዓልቲ ኽመፅእ ከሎ ድማ፥ ኣብኡ ኸም ዝበልዑ ሰሚዖም ስለ ዝነበሩ፥ ነቲ ገፀ በረከት ኣሰናደዉ። ዮሴፍ ናብ ገዛ ምስ መፀ፥ ነቲ ኣብ ኢዶም ዝነበረ ገፀ በረከት ኣእትዮም ሃብዎ፤ ናብ ምድሪ ድማ ሰገዱሉ። ብዛዕባ ደሓንነቶም ድማ ሓተቶም፤ ሽዑ “እቲ ዝነገርኩምኒ ሽማግለ ኣቦኹም ደሓንዶ ኣሎ? ገና ብህይወት ኣሎዶ?” በሎም።

ንሳቶም ድማ “ሓሽከርካ ኣቦና ደሓን ኣሎ፤ ገና ብህይወት ኣሎ” በሉ፤ ደፊኦም ድማ ሰገዱ። ኣዒንቱ ቋሕ ኣቢሉ ኸዓ ንሓዉ ብንያም፥ ወዲ እኖኡ ረአየ እሞ “እዝ እቲ ዝነገርኩምኒ ንእሽተይ ሓውኩም እዩዶ?” በለ። ሽዑ ድማ “ወደይ፥ ኣቦና ፀጋ ይሃብካ” በለ። ዮሴፍ ድማ ንሓዉ ራህሪሁሉ ስለ ዝነበረ፥ ክበኽየሉ ዝኽእል ቦታ እናደለየ ቀልጢፉ ወፀ፤ ናብ ክፍሉ ኣትዩ ኸዓ ኣብኡ በኸየ። ሽዑ ገፁ ተሓፂቡ ወፀ፤ ነፍሱ ገቲሩ ድማ “ብልዒ ኣቕርቡ” በለ።

ንእኡ ንበይኑ፥ ነሕዋቱ ንበይኖም፥ ነቶም ምስኡ ዝበልዑ ግብፃውያንውን ንበይኖም ኣቕረቡሎም፤ ግብፃውያን ምስ ዕብራውያን እንጀራ ኽበልዑ ኣይኽእሉን እዮም፤ እዙይ ንግብፃውያን ፅያፍ እዩ እሞ። ኣብ ቅድሚኡ ድማ፥ እቲ በዅሪ ኸም ብዅርናኡ፥ እቲ ንእሽተይ ድማ ከም ንእስነቱ ኾይኖም ተቐመጡ፤ እቶም ሰባትውን ንሓድሕዶም ተገረሙ። ካብ ቅድሚኡ ድማ ገግደኦም ሰደደሎም፤ ግደ ብንያም ግና ኻብ ግደ ኵሎም ሓሙሽተ ዕፅፊ በዝሐ። ምስኡ ድማ ሰትዮም ተሓጐሱ።