Mi eng' bukuit

Taunet 25 FHB Father's Heart Bible™

Kiistoi 15% eng' kiy ne iale korook →
Bukuit

Abraham ak Ketura

Ki me Abraham ak kotup ineendet weeriikyik aeng'u kibagenge. Ki beruur Kwandanyo Isak. Yeityo kopargei sarameegap Rebeka kotomo kesigiis ak koma petei: kong'et Esau kobunu timiin, koalda etunatennyi ne po sigeet agobo sogoryek, ak koma koiit.

Ng'alaali Kwandanyo eng' mustari 23

Sura 25.

Ki tun Abraham kwondo age, ne ki kiguure kainennyi Ketura. Ki sich Zimran, Joksan, Medan, Midian, Isbak, ak Sua. Kigosich Joksan lagok aeng', Sheba ak Dedan. Ko weeriigap Dedan: Ashurik, Letushik, ak Leumik. Weeriigap Midian ko: Epah, Eper, Hanok, Abida, ak Eldaa. Chu tugul ko weeriigap Ketura. Ki kogoochi Abraham Isak tuguuk tugul che tinyei. Ago ki kogoochi Abraham weeriigap chebaigeinikyik kagoochinoik, yeityo koyookto icheek komwei eng' weeriinnyi Isak ye kita kosabei, kong'etee kong'asiis agoi emetap kong'asiis.

Kenyiisyek che ki sabei Abraham tugul ko pogol ak tamanwogik tisap ak muut. Ki ilil Abraham, kome eng' kalilot ne myee, ko poiyo ne kaagoosegitu ne oo kobooto kenyiisyek che chaang', ak koyumgei kobooto piikyik. Ak kitup ineendet weeriikyik Isak ak Ishmael eng' kebeneet ne mi mbareetap Makpela, ne po Epron weeriitap Sohar Hitindet, ne itoorchingei Mamre. Mbareet ne ki al Abraham eng' weeriigap Het. Ki kitup olooto Abraham, kobooto Sarah kwondonyi. Kingo kagome Abraham, koberuur Kwandanyo weeriinnyi Isak. Ak ki meny Isak ye neegitee Beer-lahai-roi.

Ortinwegap Ishmael

Ni ko sireet ne po iyoteetap Ishmael weeriitap Abraham, ne ki sikyi Abraham Hagar Chemisiryot, otwogindetap Sarah. Chu ko kainaigap weeriigap Ishmael, ko uu kainaikwak ak ko uu sigeekwak: Nebaiot weeriitap Ishmael ne po tai, yeityo Kedar, Adbeel, Mibsam, Mishma, Duma, Masa, Hadad, Tema, Jetur, Napish, ak Kedema. Chu ko weeriigap Ishmael, ak chu ko kainaikwak ko uu kooriikwak ak ole teechei, pounik taman ak aeng' ko uu ortinwekwak. Kenyiisyek che ki sabei Ishmael ko pogol ak tamanwogik somok ak tisap, yeityo ko ilil ak kome, ak ki kiyum kobooto piikyik. Ki menyei kobooch Havilah agoi Sur, ne neegit Misiri ye iwendi Assyria; ki meny Ishmael punyondi kwenutap tupchosyekyik tugul.

Iyoteetap Isak

Ni ko sireet ne po iyoteetap Isak weeriitap Abraham: Ki sich Abraham Isak. Ki po Isak kenyiisyek tamanwogik ang'wan ye ki tun Rebeka, cheptap Bethuel Syrianindet ne po Padan-aram, ng'eetap kametap Laban Syrianindet. a a v20 Padan-aram ko ki atebweet ne parak ne po Aram eng' Mesopotamia, emap kaap Rebeka. Ki saa Isak Kwandanyo agobo kwondonyi, amu ki soon; ak ki igoochi Kwandanyo soomennyi, ak komanach Rebeka kwondonyi. Ago ki obargei lagok eng' moennyi, ak kole, “Ngo uu ni, amu nee si kiyaiywo niito?” Kwo anyun koteep Kwandanyo.

Ak ki leenji Kwandanyo ineendet, “Mi pororyosyek aeng' moeng'ung'; ak pichoogap piik aeng' che punu eng' inyee kopcheigei; age koek ne kimnotin kosiir age, ak otwoget ne oo ne ming'in.”

Ye kingo it sait ne po sigisyet, kooro, ki mi sarameek moennyi! Ki mong' ne po tai ko piriir, poortanyi komugul ko uu ngoroik che sabul; koguure anyun kainennyi Esau. Yeityo komong' ng'eetap kamennyi, ko nam eunnyi aginyetap Esau, koguure anyun kainennyi Jakobo. Ki po Isak kenyiisyek tamanwogik lo ye ki sich icheek. b b v26 Kainet Jakobo kole “ne namei aginye” — ak nooto kole “ne rebei let” anan “ne ng'aalei,” ko uu ne itoorunoit teteennyi.

Ki kagoiten lagok. Ki ek Esau kiplogotyot ne ng'oom, chiitap logeet; ago Jakobo ko ki chiito ne nyalil, ne menyei emait.

Jakobo ak Esau

Ki cham Isak Esau, amu ki chamei pendo ne punei logeet; ago ki cham Rebeka Jakobo. Ki yaei Jakobo lelutyet ye kingo nyo Esau kobun logeet, ko rube miising'. Koleenji Esau Jakobo, “Chamwo aam lelutyet ne piriir ni, amu arube miising'!” Amu nooto anyun keguure kainennyi Edom. c c v30 Kainet Edom kole “piriir” — ki keguure amu lelutyet ne piriir ne ki wal Esau imandap sigennyi.

Kole Jakobo, “Aldawa nguno imandap sigeeng'ung'.” d d v31 Imandap sigeet ko igoochi weeriit ne po tai kebeberwek aeng' eng' porotet ak kiptaiyetap kaa.

Kole Esau, “Keero, neegit amei; koterterennwo-ne imandap sigeet?”

Kole Jakobo, “Iyasyowa taindo.” Ki iyasyo anyun ineendet, ak kialdochi imandap sigennyi Jakobo.

Ki kogoochi Jakobo Esau amitwogik ak lelutyetap ng'endek; ko am, kiee, king'eet, ak kwo—ki sas Esau imandap sigennyi.