ዘፍጥረት 25 FHB Father's Heart Bible™

25 ¹ኣብርሃም ድማ ካልእ ሰበይቲ ኣእተወ፤ ስማ ኸዓ ኬጡራ ነበረ። ²ንሳ ኸዓ ንዚምራን፥ ንዮቅሻን፥ ንመዳን፥ ንምድያም፥ ንይሽባቅ፥ ንሹዋ ወለደት። ³ዮቅሳን ድማ ንሳባን ንድዳንን ወለደ። ደቂ ድዳን ከዓ ኣሹራውያንን ለጡሻውያንን ለኡማውያን ነበሩ። ⁴ደቂ ምድያም ከዓ ኤፋ፥ ኤፌር፥ ሄኖህ፥ ኣቢዳዕ፥ ኤልዳዓ እዮም። እዚኣቶም ኵላቶም ውሉድ ኬጡራ እዮም። ⁵ኣብርሃም ዘለዎ ዅሉ ንይስሓቅ ሃቦ። ⁶ኣብርሃም ድማ ነቶም ደቂ እተን ኣንስቲ ወሰኑ ህያብ ሃቦም፤ ገና ብህይወት እንተሎ ኸዓ፥ ካብ ወዱ ይስሓቅ ናብ ምብራቕ፥ ናብ ምድሪ ምብራቕ ኣርሓቖም።

⁷ዕድመ ህይወት ኣብርሃም ድማ ሚእትን ሰብዓን ሓሙሽተን ዓመት ኮነ። ⁸ኣብርሃም ድማ ነፍሱ ሃበ፤ ብፅቡቕ እርጋን ኣሪጉ፥ ዕድመ ፀጊቡ ድማ ሞተ፤ ናብ ወገናቱውን ተኣከበ። ⁹ደቁ ይስሓቅን እስማኤልን ድማ ኣብ በዓቲ ማክጴላ፥ ኣብ ጥቓ መምሬ ኣብ ዘላ ግራት ኤፍሮን ወዲ ፆሓር ኬጢያዊ ቐበርዎ። ¹⁰እታ ግራት ኣብርሃም ካብ ደቂ ኬጢ ዝዓደጋ እያ። ኣብኣ ድማ ኣብርሃም ምስ ሳራ ሰበይቱ ተቐበረ። ¹¹ድሕሪ ሞት ኣብርሃም ድማ ኣቦና ንወዱ ይስሓቅ ባረኾ። ይስሓቅ ከዓ ኣብ ጥቓ እቲ “ናይቲ ዝሪአኒ ህያው ዒላ” ተቐመጠ።

ትውልዲ እስማኤል

¹²ትውልዲ እስማኤል ወዲ ኣብርሃም፥ እታ ግብፃዊት ኣገልጋሊት ሳራ ኣጋር ንኣብርሃም ዝወለደትሉ፥ እዙይ እዩ፦ ¹³ኣስማት ደቂ እስማኤል ድማ ከከም ኣወላልዳኦም በብስሞም እዚኣቶም እዮም፦ እቲ በዅሪ እስማኤል ነባዮት፥ ድሕሪኡ ቄዳር፥ ኣድብኤል፥ ሚብሳም፥ ¹⁴ሚሽማ፥ ዱማ፥ ማሳ፥ ¹⁵ሓዳድ፥ ቴማ፥ የጡር፥ ናፊሽ፥ ቄድማ። ¹⁶እዚኣቶም ደቂ እስማኤል እዮም፤ ብዓድታቶምን ብሰፈራቶምን ዝተፀውዑ ስማቶም ድማ እዚኣቶም እዮም፤ ከከም ነገዳቶም ዓሰርተ ክልተ መሳፍንቲ ኾኑ። ¹⁷ዕድመ ህይወት እስማኤል ድማ ሚእትን ሰላሳን ሸውዓተን ዓመት ኮነ፤ ሽዑ ነፍሱ ሃበ፤ ሞተውን፤ ናብ ወገናቱውን ተኣከበ። ¹⁸ካብ ሓዊላ ኽሳዕ እታ ኣብ መንፅር ግብፂ፥ ናብ ኣሶር ኣቢላ ዘላ ሹር ተቐመጡ፤ እስማኤል ድማ ኣብ ቅድሚ ዅሎም ኣዝማዱ ብፅልኢ ተቐመጠ።

ትውልዲ ይስሓቅ

¹⁹ትውልዲ ይስሓቅ ወዲ ኣብርሃም ድማ እዙይ እዩ፦ ኣብርሃም ንይስሓቅ ወለደ። ²⁰ይስሓቅ ድማ ንርብቃ ጓል ባቱኤል ሶርያዊ በዓል ማእኸል ክልተ ኣፍላጋት፥ ሓፍቲ ላባ ሶርያዊ ምስ ኣእተወ፥ ወዲ ኣርብዓ ዓመት ነበረ። ^a a v20 ማእኸል ክልተ ኣፍላጋት ኣብ መሶጶታምያ ዝርከብ ላዕለዋይ ጐልጐል ኣራም፥ መበቆል ሃገር ስድራ ርብቃ ነበረ። ²¹ይስሓቅ ድማ ሰበይቱ መኻን ስለ ዝነበረት ምእንታኣ ናብ ኣቦና ፀለየ፤ ኣቦና ድማ ተለመነሉ እሞ ሰበይቱ ርብቃ ጠነሰት። ²²እቶም ቈልዑ ግና ኣብ ከብዳ ይቃለሱ ነበሩ፤ ንሳ ድማ “እዝ ነገር እዙይ እንተ ኾይኑስ፥ ስለ ምንታይ ከምዙይ ይኾነኒ ኣሎ?” በለት። ንኣቦና ክትሓትት ድማ ከደት።

²³ኣቦና ድማ ከምዙይ በላ፦ “ኣብ ከብድኺ ኽልተ ህዝብታት ኣለዉ፤ ካብ ከብድኺ ድማ ክልተ ዓሌታት ክፈላለዩ እዮም፤ እቲ ሓደ ካብቲ ሓደ ክሕይል እዩ፤ እቲ ዓብዪ ድማ ነቲ ንእሽተይ ከገልግል እዩ።”

²⁴ክትወልድ ጊዜኣ ምስ ኣኸለ ድማ፥ እንሆ፥ ኣብ ከብዳ ማንታ ህፃናት ነበሩ! ²⁵እቲ ቐዳማይ ቐይሕ ኮይኑ ወፀ፤ ኵሉ ኣካላቱ ኸም ፀጓር ክዳን ነበረ፤ ስለዙይ ከዓ ኤሳው ኢሎም ሰመይዎ። ²⁶ድሕሪኡ ድማ ሓዉ ኢዱ ሸዀና ኤሳው ሒዙ ወፀ፤ ስለዙይ ከዓ ያእቆብ ተብሂሉ ተሰምየ። ይስሓቅ ድማ ምስ ወለደቶም ወዲ ስሳ ዓመት ነበረ። ^b b v26 እቲ ያእቆብ ዝብል ስም “ሸዀና ይሕዝ” ማለት እዩ፤ ከምቲ ታሪኹ ዘርእዮ ድማ “ይትክእ” ወይ “የታልል” ማለት እዩ።

²⁷እቶም ቈልዑ ድማ ዓበዩ። ኤሳው ፈላጥ ሃዳናይ፥ ሰብ በረኻ ኾነ፤ ያእቆብ ግና ህዱእ ሰብ ኮይኑ፥ ኣብ ድንኳናት ይነብር ነበረ።

ያእቆብን ኤሳውን

²⁸ይስሓቅ ድማ ናይ በረኻ ስጋ ይፈቱ ስለ ዝነበረ ንኤሳው የፍቅሮ ነበረ፤ ርብቃ ግና ንያእቆብ ተፍቅሮ ነበረት። ²⁹ያእቆብ ድማ ፀብሒ ይሰርሕ ነበረ፤ ኤሳው ከዓ ካብ በረኻ መፀ፤ ኣዝዩ ጠምዩ ድማ ነበረ። ³⁰ኤሳው ድማ ንያእቆብ “ኣዝዩ ጠምየ ኣለኹ እሞ፥ ካብዝ ቐይሕ ፀብሒ ኣብልዐኒ በይዛኻ!” በሎ። በዙይ ከዓ ኤዶም ተብሃለ። ^c c v30 ኤዶም “ቀይሕ” ማለት እዩ፤ በቲ ኤሳው ብዅርናዩ ዝለወጠሉ ቐይሕ ፀብሒ ኸዓ ተሰምየ።

³¹ያእቆብ ድማ “ብዅርናይካ ሕዚ ሽጠለይ” በሎ። ^d d v31 ብዅርናይ ነቲ በዅሪ ዕፅፊ ርስትን ርእሰ ስድራን ይህብ ነበረ።

³²ኤሳው ድማ “እንሆ፥ ኣነ ክመውት እየ፤ ብዅርናይከ እንታይ ይጠቅመኒ?” በለ።

³³ያእቆብ ድማ “ቅድም ምሐለለይ” በሎ። ንሱ ኸዓ መሓለሉ፤ ብዅርናዩውን ንያእቆብ ሸጠሉ።

³⁴ያእቆብ ድማ ንኤሳው እንጀራን ፀብሒ ብርስንን ሃቦ፤ በልዐ፥ ሰተየ፥ ተሲኡ ድማ ከደ። ኤሳው ከዓ ንብዅርናዩ ነዓቖ።