Kayomiset ne Kiweegunji Isaa
Ki weeksei rubeet ak koloo Isak lembetap kwandanyi agobo kwondonyi, ak kinamei. Ki poor amu koberuur Kwandanyo ineendet, ak kinemei keriingonigap peegyik age tugul age agoi kobal ole ma lugei chii. Yeityo konyo laitoryat ne ki koam ng'etkong' amu ineendet koteebe kayomiset.
Ng'alaali Kwandanyo eng' mustarisyek 2–5, 24
26 1Ki mi rubeet eng' emet, ne terter ak rubeet ne po tai ne ki biitu eng' peetuusyegap Abraham. Kwo anyun Isak ole mi Abimelek laitoryatap Philistiik, Gerar.
2Ki ng'omnategei Kwandanyo ineendet koleenji, “Mawe Misiri; meny eng' emet ne amwaun. 3Meny emoni, si abooten ak aberuurin, amu akoonin landoichu tugul inyee ak keswondeng'ung', ak ayai kosulda kayaneet ne ki ayachi Abraham kwandang'ung'. 4Ates keswondeng'ung' kochang' ko uu kecheigap kipsengwet, ak akoochi keswondeng'ung' landoichu tugul, ak tuun kiberuuri pororyosyek tugul che po ng'wony eng' keswondeng'ung', 5amu kigas iit Abraham kutinnyu, ak koriip charunnyu, ng'atuutikyuk, kaneetisyosyekyuk, ak kirwoogutikyuk.”
6Ki meny anyun Isak Gerar. 7Ki teebe murenigap olooto agobo kwandanyi, ak kowol kole, “Tupchennyu,”—ki aiyweisye komwa kole, “Kwondanyu,” kobwaat kole, “Imuuchi murenichu che mi yu kobara agobo Rebeka, amu karaaran.” 8Ye kingo meny Isak olooto saaisyek che chaang', ki keer Abimelek laitoryatap Philistiik kong'wony kobun tirisyet, ak kogeer Isak koyagei kobooto kwandanyi Rebeka. 9Ki kuur anyun Abimelek Isak ak koleenji, “Iman kwandang'ung'! Amu nee si imwae ile, ‘Tupchennyu’?” Koleenji Isak, “Amu ki abwaat ale abeere amee agobo ineendet.”
10Ki le Abimelek, “Nee ne kaiyaech? Nda kiga koruiyo chii age eng' piik ak kwandang'ung', ak nda kiginyoorsech chalwokto.” 11Ki ng'at Abimelek piik tugul koleenji, “Ne ro chiichi anan ko kwandanyi, kebarei iman.”
12Ki rib Isak eng' emonooto ak koges pogol che siir eng' kenyinooto, amu ki koberuur Kwandanyo ineendet. 13Ki mogoryo chiichooto ak kotesak komogoryo kot koek ne mogoryo miising'. 14Ki tinyei akwotisyek che po keechiirek ak che po tuuga ak otwogik che chaang', si koam ng'etkong' Philistiik ineendet. 15Ki koituuchi Philistiik keriingonik tugul che ki balaat otwogigap kwandanyi eng' peetuusyegap kwandanyi Abraham. 16Ki leenji Abimelek Isak, “Mang'unech, amu kagoeet kimnateng'ung' kosiirech miising'.”
17Ki ng'eet anyun Isak olooto ak koteek kaa eng' goreetap Gerar, ak ki meny olooto. 18Ki wal Isak kobal keriingonigap peek che ki balaat eng' peetuusyegap kwandanyi Abraham, che ki koituuchi Philistiik kingo kame Abraham, ak koguur icheek eng' kainaik che ki kuure kwandanyi. 19Ago ye kingo bal otwogigap Isak eng' goreet ak konyoor olooto keriinget ne po peek che rootei, 20Ki bolyo kiyagiigap Gerar ak kiyagiigap Isak, komwaei koleen, “Nenyo peek.” Ki kuur keriinget Esek, amu kiboryo ak ineendet. a a v20 Kainetap Esek ko mwaei, "suryet." 21Ki bal anyun keriinget age, ak kiboryo agine agobo nooto, si koguur Sitnah. b b v21 Kainetap Sitnah ko mwaei, "weechotet." 22Ki ng'eet eng' olooto ak kobal keriinget age; ma kiboryo agobo nooto, si koguur Rehoboth, koleenji, “Nguno ko kagonech Kwandanyo olda; kesigisye eng' emet.” c c v22 Kainetap Rehoboth ko mwaei, "olta" anan ko "komoswek che yaachen."
23Ki togosta eng' olooto kwo Beer-sheba.
24Ki ng'omnategei ineendet Kwandanyo eng' kemutyonooto koleenji, “Anee Kamuktaindetap kwandang'ung' Abraham. Maiywe, amu abooten. Aberuurin ak ates keswondeng'ung', agobo otwogindennyu Abraham.”
25Ki teek kaptisisyet eng' olooto ak koguur kainetap Kwandanyo, ak kou emainnyi, ak ki bal otwogigap Isak keriinget eng' olooto.
26Ki nyoonji Abimelek ineendet kobun Gerar kobooto Ahusath ne ki ibwaatinji ak Pikol, kiptaiyatap kiplutotinikyik. 27Ki leenji Isak icheek, “Amu nee si onyonjo, amu ki owecha ak omonorisyo eng' ye omi?”
28Ki le icheek, “Kigeer komyee kole miitei Kamuktaindet kobooten, si kemwa keele, ‘Ingoek kayaneet eng' kwenunnyo, kwenutap inyee ak acheek, ak keyai arorutyet kobootok, 29ile mayaech kiy ne ya, ko uu ye ki maginamin ago kiyaun ne myee kityo, ak kigimonorisyin eng' kaalyeet. Inyee ko kiberuuri eng' Kamuktaindet nguno.’”
30Ki yai anyun Isak icheek sagutyet, ak koam ak koe. 31Ye kingo ru karon mornet, ki ayanjigei icheek; ki chamji Isak icheek kowe, ak ki ng'etegei ineendet eng' kaalyeet. 32Ki nyo otwogigap Isak eng' peetuunooto ak komwachi agobo keriinget ne ki bal, ak koleenji, “Kaginyooru peek!” 33Ki kuur Sheba; nooto anyun si koek kainetap nganaseet Beer-sheba agoi ra. d d v33 Shiba ko mwaei "kayanet"; Beer-sheba ko mwaei "keringetap kayanet."
34Ye ki po Esau kenyiisyek artam, ki itun Judit cheptap Beri Hitindet, ak Basemath cheptap Elon Hitindet. 35Ki koek icheek choteet eng' Isak ak Rebeka.