ائسحاقا تزه‌لنن وعده
قحطلیق گئنه قاییدیر و ائسحاق آروادی حاقّیندا آتاسینین یالانینی تکرار ادئر و توتولور. آتامیز اونا برکت وئردئکجه وارلانیر، و قویولاری بئر-بئر اَلئندن آلینیر، تا کی هچ کسئن اونونلا دعوا اتمه‌دئیی یرده قازیر. سونرا اونا پاخیلّیق ادن پادشاه بئر عهد ائسته‌مَیه گلئر.
26 1ائندی بو تورپاقدا بئر قحطلیق اولدو، ائبراهئمئن گونلرئنده اولان اوّلکی قحطلئکدن علاوه. اونا گؤره ائسحاق فئلئسطلی‌لرئن پادشاهی اَبئمِلِکئن یانینا، گِرارا گتدی.
2آتامیز اونا گؤروندو و ددی: «مئصئره گتمه؛ سنه دیئجیئم تورپاقدا ساکئن اول. 3بو تورپاقدا قال، و من سنئنله اولاجاغام و سنه برکت وره‌جیم، چونکی بوتون بو تورپاقلاری سنه و سنئن نسلئنه وره‌جیم، و آتان ائبراهئمه ائچدئیئم آندی یرئنه یتئره‌جیم. 4نسلئنی گؤیده‌کی اولدوزلار کئمی چوخالداجاغام و بوتون بو تورپاقلاری سنئن نسلئنه وره‌جیم، و سنئن نسلئن واسئطه‌سی‌ائله دونیانین بوتون مئلّتلری برکت آلاجاق، 5چونکی ائبراهئم منئم سؤزومه قولاق آسدی و منئم تاپشیریغیما، امرلرئمه، قایدالاریما و قانونلاریما عمل اتدی.»
6بله‌جه ائسحاق گِراردا ساکئن اولدو. 7اورانین آداملاری اونون آروادی حاقّیندا سوروشدولار، او دا جاواب وردی: «بو منئم باجیمدیر.» چونکی «آروادیمدیر» دِمَیه قورخوردو، دوشونوب ددی: «اورانین آداملاری رئبقایا گؤره منی اؤلدوره‌جکلر، چونکی او گؤزلدئر.» 8ائسحاق اورادا اوزون مودّت قالاندان سونرا، فئلئسطلی‌لرئن پادشاهی اَبئمِلِک پنجره‌دن باخاندا، ائسحاقین اؤز آروادی رئبقانی اوخشادیغینی گؤردو. 9اَبئمِلِک ائسحاقی چاغیریب ددی: «بو قطعن سنئن آروادیندیر! نجه دیه‌بئلدئن ”بو منئم باجیمدیر“؟» ائسحاق اونا ددی: «چونکی دوشوندوم کی، اونا گؤره اؤله بئلرم.»
10اَبئمِلِک ددی: «بو نه ائشدئر باشیمیزا گتئردئن؟ خالقدان بئری آسانلیقلا سنئن آروادینلا یاتا بئلردی و سن بئزئم اوستوموزه تقصئر گتئررَردئن.» 11اَبئمِلِک بوتون خالقا امر ادئب ددی: «بو آداما یا دا اونون آروادینا توخونان هر کس حتمن اؤلدورولسون.»
12ائسحاق او تورپاقدا اَکدی و همن ائل یوز قات محصول بئچدی، چونکی آتامیز اونا برکت وردی. 13او آدام وارلاندی و گتدئکجه داها دا وارلانیب، آخیردا چوخ وارلی بئر آدام اولدو. 14اونون سورولری، ناخیری و چوخلو نؤکری وار ائدی، اله کی، فئلئسطلی‌لر اونا پاخیلّیق اتدئلر. 15آتاسی ائبراهئمئن گونلرئنده، آتاسینین نؤکرلرئنئن قازدیغی بوتون قویولاری فئلئسطلی‌لر دولدورموشدولار. 16اَبئمِلِک ائسحاقا بله ددی: «بئزئم یانیمیزدان گت، چونکی سن بئزئم اوچون حددن آرتیق گوجلو اولوبسان.»
17بله‌جه ائسحاق اورادان کؤچوب، گِرار دره‌سئنده دوشَرگه سالدی و اورادا ساکئن اولدو. 18ائسحاق، آتاسی ائبراهئمئن گونلرئنده قازیلان و ائبراهئم اؤلَندن سونرا فئلئسطلی‌لرئن دولدوردوغو سو قویولارینی تزه‌دن قازدی و اونلارین آدینی آتاسینین قویدوغو کئمی قویدو. 19آمّا ائسحاقین نؤکرلری دره‌ده قازاندا، اورادا آخار سو قویوسو تاپدیلار، 20گِرار چوبانلاری ائسحاقین چوبانلاری ائله موباحئثه ادئب ددئلر: «بو سو بئزئمکی‌دئر.» او قویونون آدینی عِسِق قویدو، چونکی اونونلا موباحئثه اتمئشدئلر. a a v20 عِسِق آدینین معناسی «موباحئثه»دئر. 21سونرا آیری بئر قویو قازدیلار و اونون اوستونده ده داعوا اتدئلر، اونا گؤره اونون آدینی سئطنا قویدو. b b v21 سئطنا آدینین معناسی «ضئدّئیّت»دئر. 22اوردان کؤچدو و آیری بئر قویو قازدی؛ بو قویونون اوستونده داعوا اولمادی، اونا گؤره اونا رِخوبوت آدینی قویوب بله ددی: «ائندی آتامیز بئزه یِر آچدی و بئز بو اؤلکه‌ده ثمره‌لی اولاجاغیق.» c c v22 رِخوبوت آدینین معناسی «یِر» یا دا «گِنئش یرلر»دئر.
23اورادان قالخیب بئرشئبایا گتدی.
24همن گجه آتامیز اونا گؤرونوب بله بویوردو: «من سنئن آتان ائبراهئمئن تاریسی‌یام. قورخما، چونکی من سنئن یانیندایام. سنه برکت وره‌جیم و قولوم ائبراهئمئن خاطئرئنه نسلئنی چوخالداجاغام.»
25اورادا بئر قوربانگاه تئکدی و آتامیزین آدینی چاغیردی، چادیرینی قوردو و اورادا ائسحاقین نؤکرلری بئر قویو قازدیلار.
26اَبئمِلِک، مصلحتچئسی اَخوزّات و قوشون باشچیسی فئکول ائله گِراردان اونون یانینا گلدی. 27ائسحاق اونلارا ددی: «نئیه منئم یانیما گلئبسئنئز؟ آخی سئز مندن نئفرت ادئب، منی یانینیزدان قوودونوز.»
28اونلار ددئلر: «بئز آیدین گؤردوک کی، تاری سنئنله‌دئر، اونا گؤره ددئک: ”قوی آرامیزدا — سنئنله بئزئم آرامیزدا — بئر آند اولسون و سنئنله عهد باغلایاق، 29کی، بئزه هچ بئر پئسلئک اتمیه‌سن، نجه کی، بئز سنه توخونمادیق و سنه آنجاق یاخشیلیق اتدئک و سنی صولح ائله یولا سالدیق. ائندی سن تاری طرفئندن موبارکسن.“»
30بله‌جه ائسحاق اونلار اوچون بئر ضئیافت دوزَلتدی و یئیئب ائچدئلر. 31صاباحیسی گون سحر تئزدن بئر-بئرلرئنه آند ائچدئلر؛ ائسحاق اونلاری یولا سالدی و اونلار اوندان صولح ائله آیریلدیلار. 32همن گون ائسحاقین نؤکرلری گلئب، قازدیقلاری قویو حاقّیندا اونا خبر ورئب ددئلر: «سو تاپدیق!» 33او قویونون آدینی شئبعا قویدو، اونا گؤره بو گونه قدر او شهرئن آدی بئرشئبادیر. d d v33 شئبعا «آند» دئمکدئر؛ بئرشئبا «آند قویوسو» دئمکدئر.
34عئسو قیرخ یاشیندا ائکن خئتلی بِاِرئنئن قیزی یهودئتی و خئتلی اِیلونون قیزی باسمَتی آرواد آلدی. 35اونلار ائسحاقلا رئبقا اوچون بئر قوصّه سببی اولدولار.
