ዘፍጥረት 26

26 ¹በአብርሃም ዘመን ከተከሰተው ቀደምት ራብ በቀር፣ በምድሪቱ ራብ ሆነ። ስለዚህ ይስሐቅ ወደ ፍልስጥኤማውያን ንጉሥ ወደ አቢሜሌክ፣ ወደ ጌራራ ሄደ።

²አባታችን ተገለጠለትና እንዲህ አለው፤ “ወደ ግብፅ አትውረድ፤ በምነግርህ ምድር ተቀመጥ። ³በዚህ ምድር ቆይ፤ ከአንተ ጋራ እሆናለሁ፤ እባርክሃለሁም፤ እነዚህን ምድሮች ሁሉ ለአንተና ለዘርህ እሰጣለሁና፣ ለአባትህ ለአብርሃም የማልሁትን መሐላ እፈጽማለሁ። ⁴ዘርህን እንደ ሰማይ ከዋክብት አበዛለሁ፤ እነዚህን ምድሮች ሁሉ ለዘርህ እሰጣለሁ፤ በዘርህም የምድር አሕዛብ ሁሉ ይባረካሉ፤ ⁵ይህም አብርሃም ቃሌን ስለ ሰማ፣ አደራዬን፣ ትእዛዜን፣ ሥርዐቴንና ሕጌን ስለ ጠበቀ ነው።”

⁶ስለዚህ ይስሐቅ በጌራራ ተቀመጠ። ⁷የዚያ ስፍራ ሰዎች ስለ ሚስቱ ጠየቁት፤ እርሱም፣ “እኅቴ ናት” ብሎ መለሰ፤ “ርብቃ ውብ ናትና የዚህ ስፍራ ሰዎች ስለ እርሷ ይገድሉኛል” ብሎ ስላሰበ፣ “ሚስቴ” ለማለት ፈራ። ⁸ይስሐቅ ብዙ ጊዜ በዚያ ከቈየ በኋላ፣ የፍልስጥኤማውያን ንጉሥ አቢሜሌክ በመስኮት ዝቅ ብሎ ሲመለከት፣ ይስሐቅ ሚስቱን ርብቃን ሲያባብል አየ። ⁹ስለዚህ አቢሜሌክ ይስሐቅን ጠርቶ፣ “እርሷ በርግጥ ሚስትህ ናት! ታዲያ እንዴት ‘እኅቴ ናት’ ትላለህ?” አለው። ይስሐቅም፣ “ስለ እርሷ እንዳልሞት ስላሰብሁ ነው” አለው።

¹⁰አቢሜሌክም፣ “ይህ ያደረግኸው ምንድን ነው? ከሕዝቡ አንዱ በቀላሉ ከሚስትህ ጋራ በተኛ፣ አንተም በእኛ ላይ በደል ባመጣህብን ነበር” አለ። ¹¹አቢሜሌክም ሕዝቡን ሁሉ፣ “ይህን ሰው ወይም ሚስቱን የሚነካ ሁሉ ፈጽሞ ይገደላል” ብሎ አዘዘ።

¹²ይስሐቅም በዚያ ምድር ዘራ፤ አባታችን ስለ ባረከው በዚያ ዓመት መቶ እጥፍ አጨደ። ¹³ሰውየውም ባለጠጋ ሆነ፤ እጅግ ባለጠጋ እስኪሆንም ድረስ እየበለጸገ ሄደ። ¹⁴የበጎችና የከብቶች መንጋ፣ ብዙ አገልጋዮችም ነበሩት፤ ስለዚህ ፍልስጥኤማውያን ቀኑበት። ¹⁵በአባቱ በአብርሃም ዘመን የአባቱ አገልጋዮች የቈፈሩትን የውሃ ጒድጓድ ሁሉ ፍልስጥኤማውያን ደፍነውት ነበር። ¹⁶አቢሜሌክም ይስሐቅን፣ “ከእኛ እጅግ ስለ በረታህብን፣ ከእኛ ተለይተህ ሂድ” አለው።

¹⁷ስለዚህ ይስሐቅ ከዚያ ተለይቶ ሄደ፤ በጌራራ ሸለቆ ሰፈረ፤ በዚያም ተቀመጠ። ¹⁸በአባቱ በአብርሃም ዘመን የተቈፈሩትን፣ አብርሃም ከሞተ በኋላም ፍልስጥኤማውያን የደፈኑትን የውሃ ጒድጓዶች ይስሐቅ እንደ ገና ቈፈራቸው፤ አባቱ በጠራቸው ስሞችም ጠራቸው። ¹⁹የይስሐቅ አገልጋዮች በሸለቆው ውስጥ ቈፍረው በዚያ የገነፈለ ንጹሕ ውሃ ያለውን ጒድጓድ ባገኙ ጊዜ፣ ²⁰የጌራራ እረኞች ከይስሐቅ እረኞች ጋራ፣ “ውሃው የእኛ ነው” ብለው ተጣሉ። ስለ ተጣሉበትም ጒድጓዱን ዔሴቅ ብሎ ሰየመው። ^a a v20 ዔሴቅ የሚለው ስም “ጠብ” ማለት ነው። ²¹ከዚያም ሌላ ጒድጓድ ቈፈሩ፤ ስለዚያም ተጣሉ፤ ስለዚህ ስጥና ብሎ ሰየመው። ^b b v21 ስጥና የሚለው ስም “መቃወም” ማለት ነው። ²²ከዚያ ተነሥቶ ሌላ ጒድጓድ ቈፈረ፤ ስለ እርሱ አልተጣሉም፤ ስለዚህ፣ “አሁን አባታችን ስፍራ አስፍቶልናል፤ በምድሪቱም እንፈራለን” ብሎ ሬሆቦት ብሎ ሰየመው። ^c c v22 ሬሆቦት የሚለው ስም “ስፍራ” ወይም “ሰፊ ቦታዎች” ማለት ነው።

²³ከዚያም ወደ ቤርሳቤህ ወጣ።

²⁴በዚያም ሌሊት አባታችን ተገለጠለትና፣ “የአባትህ የአብርሃም አምላክ እኔ ነኝ። ከአንተ ጋራ ነኝና አትፍራ። ስለ ባሪያዬ ስለ አብርሃም እባርክሃለሁ፤ ዘርህንም አበዛለሁ” አለው።

²⁵በዚያም መሠዊያ ሠራ፤ የአባታችንን ስም ጠራ፤ ድንኳኑንም ተከለ፤ በዚያም የይስሐቅ አገልጋዮች ጒድጓድ ቈፈሩ።

²⁶አቢሜሌክም ከአማካሪው ከአኮዛት፣ ከሠራዊቱም አለቃ ከፊኮል ጋራ ከጌራራ ወደ እርሱ መጣ። ²⁷ይስሐቅም፣ “ጠልታችሁኝ ከእናንተ ዘንድ ካባረራችሁኝ በኋላ፣ ለምን ወደ እኔ መጣችሁ?” አላቸው።

²⁸እነርሱም፣ “እግዚአብሔር ከአንተ ጋራ እንደ ነበረ በግልጽ አየን፤ ስለዚህ ‘በእኛና በአንተ መካከል መሐላ ይሁን፤ ከአንተም ጋራ ኪዳን እናድርግ፤ ²⁹አንተም ምንም ክፉ ነገር እንዳታደርግብን፤ እኛም እንዳልነካንህ፣ መልካምንም ብቻ እንዳደረግንልህ፣ በሰላምም እንደ ሰደድንህ። አሁን አንተ በእግዚአብሔር የተባረክህ ነህ’ አልን” አሉ።

³⁰ስለዚህ ይስሐቅ ግብዣ አደረገላቸው፤ በሉም ጠጡም። ³¹በማግስቱም ማልደው ተነሥተው እርስ በርሳቸው ተማማሉ፤ ይስሐቅም ሸኛቸው፤ እነርሱም በሰላም ተለዩት። ³²በዚያም ቀን የይስሐቅ አገልጋዮች መጥተው ስለ ቈፈሩት ጒድጓድ ነገሩት፤ “ውሃ አገኘን!” አሉ። ³³ስለዚህ ሲባህ ብሎ ሰየመው፤ ስለዚህም የከተማዪቱ ስም እስከ ዛሬ ድረስ ቤርሳቤህ ነው። ^d d v33 ሲባህ “መሐላ” ማለት ነው፤ ቤርሳቤህ “የመሐላው ጒድጓድ” ማለት ነው።

³⁴ዔሳው አርባ ዓመት በሆነው ጊዜ፣ የኬጢያዊውን የብኤሪን ልጅ ዩዲትን፣ የኬጢያዊውንም የኤሎንን ልጅ ቤሴማትን አገባ። ³⁵እነርሱም ለይስሐቅና ለርብቃ የኀዘን ምንጭ ሆኑባቸው።