Ishak ke aru ekbar diya vachan
Akal aru ahise aru Isaac pora tar baba nisena tar maiki laga kotha te misa koise, aru dhora khai. Amar Pitri pora tai ke asirbad kora karne tai dhoni hoi jai, aru tar kuwa khan ek-ek kori kene loi loi, jitia tak tai kunba bhi jhogra nokora jaga te nakhande. Titia tai ke hingsa kora raja pora mitrota laga vachan mangibole ahe.
26 1Etiya hei desh te ekta akaal ahhise, juntu Abraham laga homoi te huwa poila akaal bade aru ekta asele. Etu karne Ishak Philistine khan laga raja Abimelek usorte, Gerar te jaise.
2Amar Pitri tar ke dikhai dise aru koise, “Misar te na-jabi; Moi tumi ke kobole thaka desh te thaki jabi. 3Eitu desh te thakibi, aru Moi tumi logot thakibo aru tumi ke asirbad dibo, kilemane eitu sob desh khan Moi tumi ke aru tumi laga bongsho ke dibo, aru tumi laga pitri Abraham ke Moi kha kosom tu Moi purah koribo. 4Moi tumi laga bongsho ke akas laga tara khan nisena bisi koribo aru tumi laga bongsho ke eitu sob desh khan dibo, aru tumi laga bongsho pora prithibi laga sob desh khan asirbad pabo, 5kilemane Abraham pora Moi laga awaj mani loise aru Moi laga hukum, Moi laga adesh khan, Moi laga niyom khan, aru Moi laga ain khan rakhi loise.”
6Etu karne Ishak Gerar te thaki jaise. 7Hei jagah laga manuh khan pora tar maiki laga kotha hudise, aru tai jawab dise, “Tai moi laga bhoini ase”—“moi laga maiki” kobole bhoi lagise, kilemane tai bhabise, “Ribika nimite yate thaka manuh khan pora moi ke morai dibo, kilemane tai sundur ase.” 8Ishak ta te bisi din thaka pichete, Philistine khan laga raja Abimelek pora khirki pora nichete saise aru Ishak pora tar maiki Ribika ke morom korithaka dikhise. 9Etu karne Abimelek pora Ishak ke matise aru koise, “Tai hosa bhi tumar maiki ase! Tumi kineka kobole paribo, ‘Tai moi laga bhoini ase’?” Ishak pora tar ke koise, “Kilemane moi bhabise tai nimite moi mori jabo.”
10Abimelek pora koise, “Tumi amikhan ke ki korise? Manuh khan majot te ekjon pora asani se tumar maiki logot ghumai lobole parise, aru tumi amikhan uporte dosh ani dibo thakise.” 11Abimelek pora sob manuh khan ke hukum dise, “Kun manuh pora eitu manuh ke nahole tar maiki ke choi lobo, tai ke hosa bhi morai dibo.”
12Ishak pora hei desh te kheti korise aru hei saal te ekxo guna kati loise, kilemane amar Pitri pora tar ke asirbad dise. 13Hei manuh dhoni hoise aru bisi dhoni hoi thakise jiman tak tai bisi dhoni manuh hoi jaise. 14Tar logot mer khan aru goru khan aru bisi nokor khan asele, etu karne Philistine khan tar uporte suku joli jaise. 15Tar pitri laga nokor khan pora tar pitri Abraham laga homoi te khuna sob kuwa khan Philistine khan pora mati di kene bondh kori disele. 16Abimelek pora Ishak ke koise, “Amikhan pora jai jabi—tumi amikhan pora bisi takikar hoi jaise.”
17Etu karne Ishak ta te pora jaise aru Gerar laga ghati te tombu lagaise, aru ta te thaki jaise. 18Tar pitri Abraham laga homoi te khuna pani laga kuwa khan, juntu Abraham mori juwa pichete Philistine khan pora bondh kori disele, Ishak pora aru ekbar khundise, aru tar pitri pora rakha nam khan pora taikhan ke matise. 19Kintu Ishak laga nokor khan pora ghati te khundise aru ta te taja jhorna pani laga ekta kuwa paise, 20Gerar laga goru-mer rokhiya khan pora Ishak laga goru-mer rokhiya khan logot te jhagara korise, koi kene, “Eitu pani amikhan laga ase.” Taikhan pora tar logot jhagara kora karne tai hei kuwa laga nam Esek rakhise. a a v20 Esek nam laga ortho “jhagara” ase. 21Tetiya taikhan pora aru ekta kuwa khundise, aru hei uporte bhi jhagara korise, etu karne tai eitu laga nam Sitnah rakhise. b b v21 Sitnah nam laga ortho “birodh” ase. 22Ta te pora tai sorise aru aru ekta kuwa khundise; hei uporte taikhan jhagara kora nai, etu karne tai eitu laga nam Rehoboth rakhise, koi kene, “Etiya amar Pitri pora amikhan nimite jagah khuli dise; amikhan desh te phol-phul koribo.” c c v22 Rehoboth nam laga ortho “jagah” nahole “dangor khula jagah khan” ase.
23Ta te pora tai Beer-sheba te uthi jaise.
24Hei rati amar Pitri tar ke dikhai dise aru koise, “Moi tumar pitri Abraham laga Isor ase. Bhoi na-koribi, kilemane Moi tumi logot ase. Moi tumi ke asirbad dibo aru Moi laga nokor Abraham nimite tumi laga bongsho ke bisi koribo.”
25Ta te tai ekta bedi bonaise aru amar Pitri laga nam loise, tar tombu lagaise, aru ta te Ishak laga nokor khan pora ekta kuwa khundise.
26Abimelek pora Gerar pora tar salah-dia manuh Ahujjath aru tar sipahi khan laga cholawta Phikol logot te tar usorte ahhise. 27Ishak pora taikhan ke koise, “Tumikhan moi ke ghin korise aru tumikhan pora moi ke hatai disele, tinehoile kile tumikhan moi usorte ahhise?”
28Taikhan koise, “Isor tumi logot ase koikena amikhan sapha dikhise, etu karne amikhan koise, ‘Amikhan majot te—tumi aru amikhan majot te—ekta kosom thaki bole dibi, aru amikhan tumi logot ekta vachan bonabo, 29tumi amikhan ke eku dukh nadibi—jineka amikhan pora tumi ke choi diya nai kintu tumi ke bhal he korise—aru santi te tumi ke pathai dise. Tumi etiya Isor pora asirbad pa-a manuh ase.’”
30Etu karne Ishak pora taikhan nimite ekta bhoj bonaise, aru taikhan khaise aru piise. 31Dusera din phojur te taikhan ekjon-ekjon ke kosom khaise; Ishak pora taikhan ke pathai dise, aru taikhan santi te tar pora jaise. 32Hei din Ishak laga nokor khan ahhise aru taikhan khunda kuwa laga kotha tar ke koise aru koise, “Amikhan pani paise!” 33Etu karne tai eitu laga nam Shibah rakhise; etu karne aji tak hei sahar laga nam Beer-sheba ase. d d v33 Shibah laga ortho ‘kosom’ ase; Beer-sheba laga ortho ‘kosom laga kuwa’ ase.
34Chalis saal umur te, Esau pora Hitti manuh Beeri laga swali Judith, aru Hitti manuh Elon laga swali Basemath ke shadi korise. 35Aru taikhan Ishak aru Ribika nimite mon-dukh laga ekta karon asele.