ஆதியாகமம் 26

26 ¹ ஆபிரகாமின் நாட்களில் உண்டான முந்தின பஞ்சத்தைத் தவிர, தேசத்தில் வேறொரு பஞ்சம் உண்டாயிற்று. ஆகையால் ஈசாக்கு கேராருக்குப் பெலிஸ்தரின் ராஜாவாகிய அபிமெலேக்கினிடத்திற்குப் போனான்.

² எங்கள் பிதா அவனுக்குத் தரிசனமாகி, “எகிப்திற்குப் போகாதே; நான் உனக்குச் சொல்லும் தேசத்தில் குடியிரு.” என்றார். ³ இந்தத் தேசத்தில் தங்கியிரு; நான் உன்னோடே இருந்து உன்னை ஆசீர்வதிப்பேன்; இந்தத் தேசங்கள் யாவையும் உனக்கும் உன் சந்ததிக்கும் தருவேன்; உன் தகப்பனாகிய ஆபிரகாமுக்கு நான் இட்ட ஆணையை நிறைவேற்றுவேன். ⁴ நான் உன் சந்ததியை வானத்தின் நட்சத்திரங்களைப்போலப் பெருகப்பண்ணி, இந்தத் தேசங்கள் யாவையும் உன் சந்ததிக்குத் தருவேன்; உன் சந்ததிக்குள் பூமியிலுள்ள சகல ஜாதிகளும் ஆசீர்வதிக்கப்படும்; ⁵ ஏனெனில், ஆபிரகாம் என் சத்தத்திற்குக் கீழ்ப்படிந்து, என் காவலையும், என் கற்பனைகளையும், என் கட்டளைகளையும், என் நியாயப்பிரமாணங்களையும் கைக்கொண்டான்.

⁶ அப்படியே ஈசாக்கு கேராரில் குடியிருந்தான். ⁷ அவ்விடத்து மனிதர் அவனுடைய மனைவியைக் குறித்து விசாரித்தபோது, அவன், “இவள் என் சகோதரி” என்றான்; “என் மனைவி” என்று சொல்ல அவன் பயந்தான்; ஏனெனில், “ரெபெக்காள் அழகுள்ளவளாய் இருக்கிறபடியால், அவளினிமித்தம் இவ்விடத்து மனிதர் என்னைக் கொன்றுபோடுவார்கள்” என்று நினைத்தான். ⁸ ஈசாக்கு அங்கே அநேக நாள் தங்கியிருந்தபின், பெலிஸ்தரின் ராஜாவாகிய அபிமெலேக்கு ஒரு பலகணி வழியாய்ப் பார்த்து, ஈசாக்கு தன் மனைவியாகிய ரெபெக்காளை அணைத்துக் கொஞ்சுகிறதைக் கண்டான். ⁹ அப்பொழுது அபிமெலேக்கு ஈசாக்கை அழைப்பித்து, “இவள் நிச்சயமாய் உன் மனைவியே! ‘இவள் என் சகோதரி’ என்று நீ எப்படிச் சொன்னாய்?” என்றான். அதற்கு ஈசாக்கு அவனை நோக்கி, “அவளினிமித்தம் நான் சாகநேரிடும் என்று நினைத்தேன்” என்றான்.

¹⁰ அப்பொழுது அபிமெலேக்கு, “நீ எங்களுக்கு இப்படிச் செய்தது என்ன? ஜனங்களில் ஒருவன் சுலபமாய் உன் மனைவியோடே சயனித்திருக்கலாமே; அப்பொழுது எங்கள்மேல் குற்றம் சுமத்தியிருப்பாயே” என்றான். ¹¹ பின்பு அபிமெலேக்கு எல்லா ஜனங்களையும் நோக்கி, “இந்த மனிதனையாவது இவன் மனைவியையாவது தொடுகிறவன் நிச்சயமாய்க் கொலைசெய்யப்படுவான்” என்று கட்டளையிட்டான்.

¹² ஈசாக்கு அந்தத் தேசத்தில் விதைத்து, அந்த வருடத்திலே நூறுமடங்கு பலனை அறுத்தான்; எங்கள் பிதா அவனை ஆசீர்வதித்தார். ¹³ அந்த மனிதன் செல்வந்தனாகி, மிகுந்த ஐசுவரியவானாகுமட்டும் மேன்மேலும் விருத்தியடைந்தான். ¹⁴ அவனுக்கு ஆட்டுமந்தைகளும், மாட்டுமந்தைகளும், அநேக வேலைக்காரரும் இருந்தார்கள்; அதினால் பெலிஸ்தர் அவன்மேல் பொறாமைகொண்டார்கள். ¹⁵ அவனுடைய தகப்பனாகிய ஆபிரகாமின் நாட்களில் அவனுடைய தகப்பனுடைய வேலைக்காரர் வெட்டியிருந்த கிணறுகளையெல்லாம் பெலிஸ்தர் தூர்த்து, மண்ணினால் நிரப்பியிருந்தார்கள். ¹⁶ அபிமெலேக்கு ஈசாக்கை நோக்கி, “நீ எங்களைப்பார்க்கிலும் மிகவும் பலத்தவனானபடியால், எங்களைவிட்டுப் போய்விடு” என்றான்.

¹⁷ அப்படியே ஈசாக்கு அவ்விடத்தைவிட்டுப் போய், கேரார் பள்ளத்தாக்கிலே கூடாரம்போட்டு, அங்கே குடியிருந்தான். ¹⁸ தன் தகப்பனாகிய ஆபிரகாமின் நாட்களில் வெட்டப்பட்டு, ஆபிரகாம் மரித்தபின் பெலிஸ்தர் தூர்த்துப்போட்டிருந்த கிணறுகளை ஈசாக்கு திரும்பத் திறந்து, தன் தகப்பன் அவைகளுக்கு இட்டிருந்த பேர்களின்படியே அவைகளுக்குப் பேரிட்டான். ¹⁹ ஈசாக்கின் வேலைக்காரர் அந்தப் பள்ளத்தாக்கிலே வெட்டி, ஊறுகிற நீரூற்றுள்ள ஒரு கிணற்றைக் கண்டார்கள். ²⁰ அப்பொழுது கேராரின் மேய்ப்பர் ஈசாக்கின் மேய்ப்பரோடே, “இந்தத் தண்ணீர் எங்களுடையது” என்று வாக்குவாதம்பண்ணினார்கள்; அவர்கள் தன்னோடே வழக்காடினபடியால், அவன் அந்தக் கிணற்றுக்கு ஏசேக் என்று பேரிட்டான். ^a a v20 ஏசேக் என்னும் பேருக்கு ‘வாக்குவாதம்’ என்று அர்த்தம். ²¹ பின்பு அவர்கள் வேறொரு கிணற்றை வெட்டினார்கள்; அதைக்குறித்தும் வாக்குவாதம்பண்ணினார்கள்; ஆகையால் அவன் அதற்குச் சித்னா என்று பேரிட்டான். ^b b v21 சித்னா என்னும் பேருக்கு ‘விரோதம்’ என்று அர்த்தம். ²² அவன் அவ்விடத்தைவிட்டுப் போய், வேறொரு கிணற்றை வெட்டினான்; அதைக்குறித்து அவர்கள் வாக்குவாதம்பண்ணவில்லை; ஆகையால் அவன், “இப்பொழுது எங்கள் பிதா நமக்கு இடமுண்டாக்கினார்; இத்தேசத்தில் நாம் பலுகுவோம்” என்று சொல்லி, அதற்கு ரெகொபோத் என்று பேரிட்டான். ^c c v22 ரெகொபோத் என்னும் பேருக்கு ‘இடம்’ அல்லது ‘விசாலமான இடங்கள்’ என்று அர்த்தம்.

²³ அவ்விடத்தைவிட்டு அவன் பெயெர்செபாவுக்குப் போனான்.

²⁴ அன்று ராத்திரியிலே எங்கள் பிதா அவனுக்குத் தரிசனமாகி, “நான் உன் தகப்பனாகிய ஆபிரகாமின் பிதா; பயப்படாதே, நான் உன்னோடே இருக்கிறேன்; என் ஊழியக்காரனாகிய ஆபிரகாமினிமித்தம் நான் உன்னை ஆசீர்வதித்து, உன் சந்ததியைப் பெருகப்பண்ணுவேன்” என்றார்.

²⁵ அங்கே அவன் ஒரு பலிபீடத்தைக் கட்டி, எங்கள் பிதாவின் நாமத்தைத் தொழுதுகொண்டு, அங்கே தன் கூடாரத்தைப் போட்டான்; அவ்விடத்திலே ஈசாக்கின் வேலைக்காரர் ஒரு கிணற்றை வெட்டினார்கள்.

²⁶ அப்பொழுது அபிமெலேக்கு தன் ஆலோசகனாகிய அகுசாத்தையும், தன் சேனாபதியாகிய பிகோலையும் கூட்டிக்கொண்டு, கேராரிலிருந்து அவனிடத்திற்கு வந்தான். ²⁷ ஈசாக்கு அவர்களை நோக்கி, “நீங்கள் என்னைப் பகைத்து, உங்களிடத்திலிருந்து என்னை அனுப்பிவிட்டீர்களே; பின்னை ஏன் என்னிடத்தில் வந்தீர்கள்?” என்றான்.

²⁸ அதற்கு அவர்கள்: “சர்வவல்லமையுள்ள பிதா உம்மோடே இருக்கிறார் என்பதை நாங்கள் தெளிவாய்க் கண்டோம்; ஆகையால், ‘நமக்குள்ளே, அதாவது உமக்கும் எங்களுக்கும் நடுவே இப்பொழுது ஒரு ஆணை உண்டாயிருப்பதாக; உம்மோடே ஒரு உடன்படிக்கைபண்ணுவோம்’ என்று சொன்னோம்; ²⁹ நாங்கள் உம்மைத் தொடாமல், உமக்கு நன்மையையே செய்து, உம்மைச் சமாதானத்தோடே அனுப்பிவிட்டதுபோல, நீரும் எங்களுக்குப் பொல்லாப்புச் செய்யாதிருப்பீராக; நீர் இப்பொழுது சர்வவல்லமையுள்ள பிதாவினால் ஆசீர்வதிக்கப்பட்டவர்” என்றார்கள்.

³⁰ அப்பொழுது அவன் அவர்களுக்கு ஒரு விருந்துபண்ணினான்; அவர்கள் புசித்துக் குடித்தார்கள். ³¹ மறுநாள் அதிகாலமே அவர்கள் ஒருவருக்கொருவர் ஆணையிட்டுக்கொண்டார்கள்; பின்பு ஈசாக்கு அவர்களை அனுப்பிவிட்டான்; அவர்கள் அவனிடத்திலிருந்து சமாதானத்தோடே போனார்கள். ³² அன்றையதினமே ஈசாக்கின் வேலைக்காரர் வந்து, தாங்கள் வெட்டின கிணற்றைக்குறித்து அவனுக்கு அறிவித்து, “எங்களுக்குத் தண்ணீர் கிடைத்தது” என்றார்கள். ³³ அவன் அதற்குச் சேபா என்று பேரிட்டான்; ஆகையால் அந்தப் பட்டணத்திற்கு இந்நாள்வரைக்கும் பெயெர்செபா என்று பேர். ^d d v33 சேபா என்பதற்கு ‘ஆணை’ என்றும், பெயெர்செபா என்பதற்கு ‘ஆணையின் கிணறு’ என்றும் அர்த்தம்.

³⁴ ஏசா நாற்பது வயதானபோது, ஏத்தியனாகிய பேரியின் குமாரத்தியாகிய யூதீத்தையும், ஏத்தியனாகிய ஏலோனின் குமாரத்தியாகிய பஸ்மத்தையும் விவாகம்பண்ணினான். ³⁵ இவர்கள் ஈசாக்குக்கும் ரெபெக்காளுக்கும் மனத்துக்கமாய் இருந்தார்கள்.