ଆଦି ପୁସ୍ତକ 26 FHB Father's Heart Bible™

26 ¹ଅବ୍ରହାମଙ୍କ ସମୟରେ ଯେଉଁ ପୂର୍ବକାଳୀନ ଦୁର୍ଭିକ୍ଷ ଘଟିଥିଲା, ତାହା ଛଡ଼ା ସେହି ଦେଶରେ ଆଉ ଗୋଟିଏ ଦୁର୍ଭିକ୍ଷ ହେଲା। ତେଣୁ ଇସ୍‌ହାକ ପଲେଷ୍ଟୀୟମାନଙ୍କ ରାଜା ଅବୀମେଲକଙ୍କ ନିକଟକୁ ଗରାରକୁ ଗଲେ।

²ପୁଣି ଆମ୍ଭମାନଙ୍କ ପିତା ତାହାଙ୍କୁ ଦର୍ଶନ ଦେଇ କହିଲେ, “ତୁମ୍ଭେ ମିସରକୁ ଓହ୍ଲାଇ ଯାଅ ନାହିଁ; ଆମ୍ଭେ ଯେଉଁ ଦେଶ ବିଷୟ ତୁମ୍ଭକୁ କହିବା, ସେହି ଦେଶରେ ବାସ କର। ³ଏହି ଦେଶରେ ପ୍ରବାସ କର, ଆଉ ଆମ୍ଭେ ତୁମ୍ଭ ସଙ୍ଗରେ ରହି ତୁମ୍ଭକୁ ଆଶୀର୍ବାଦ କରିବା; କାରଣ ଆମ୍ଭେ ତୁମ୍ଭକୁ ଓ ତୁମ୍ଭ ବଂଶକୁ ଏହିସବୁ ଦେଶ ଦେବା, ପୁଣି ତୁମ୍ଭ ପିତା ଅବ୍ରହାମଙ୍କ ନିକଟରେ ଯେଉଁ ଶପଥ କରିଥିଲୁ, ତାହା ସଫଳ କରିବା। ⁴ପୁଣି ଆମ୍ଭେ ଆକାଶର ନକ୍ଷତ୍ର ତୁଲ୍ୟ ତୁମ୍ଭ ବଂଶ ବୃଦ୍ଧି କରିବା ଓ ତୁମ୍ଭ ବଂଶକୁ ଏହିସବୁ ଦେଶ ଦେବା, ପୁଣି ତୁମ୍ଭ ବଂଶ ଦ୍ଵାରା ପୃଥିବୀର ସମସ୍ତ ଗୋଷ୍ଠୀ ଆଶୀର୍ବାଦ ପ୍ରାପ୍ତ ହେବେ; ⁵କାରଣ ଅବ୍ରହାମ ଆମ୍ଭର ବାକ୍ୟ ପାଳନ କଲେ, ପୁଣି ଆମ୍ଭର ଆଦେଶ, ଆମ୍ଭର ଆଜ୍ଞା, ଆମ୍ଭର ବିଧି ଓ ଆମ୍ଭର ବ୍ୟବସ୍ଥା ରକ୍ଷା କଲେ।”

⁶ତେଣୁ ଇସ୍‌ହାକ ଗରାରରେ ବାସ କଲେ। ⁷ସେହି ସ୍ଥାନର ଲୋକମାନେ ତାହାଙ୍କ ଭାର୍ଯ୍ୟା ବିଷୟରେ ପଚାରନ୍ତେ, ସେ ଉତ୍ତର ଦେଲେ, “ସେ ମୋହର ଭଗିନୀ”; କାରଣ “ସେ ମୋହର ଭାର୍ଯ୍ୟା” ବୋଲି କହିବାକୁ ସେ ଭୀତ ହେଲେ, ପୁଣି ମନେ ମନେ ଭାବିଲେ, “ରିବିକା ସୁନ୍ଦରୀ ହେତୁ ଏହି ସ୍ଥାନର ଲୋକମାନେ ତାହା ନିମନ୍ତେ ମୋତେ ବଧ କରିବେ।” ⁸ସେ ସେଠାରେ ବହୁ କାଳ ରହିଲା ଉତ୍ତାରେ ପଲେଷ୍ଟୀୟମାନଙ୍କ ରାଜା ଅବୀମେଲକ ଝରକା ବାଟେ ଅନାଇ ଦେଖିଲେ ଯେ, ଇସ୍‌ହାକ ଆପଣା ଭାର୍ଯ୍ୟା ରିବିକାଙ୍କ ସଙ୍ଗେ କୌତୁକ କରୁଅଛନ୍ତି। ⁹ତେଣୁ ଅବୀମେଲକ ଇସ୍‌ହାକଙ୍କୁ ଡକାଇ କହିଲେ, “ସେ ତ ନିଶ୍ଚୟ ତୁମ୍ଭ ଭାର୍ଯ୍ୟା! ତେବେ ‘ସେ ମୋହର ଭଗିନୀ’ ବୋଲି କିପରି କହିଲ?” ଇସ୍‌ହାକ ତାହାଙ୍କୁ କହିଲେ, “କାରଣ ‘ତାହା ହେତୁ ମୁଁ ମରିବି’ ବୋଲି ମୁଁ ଭାବିଥିଲି।”

¹⁰ଅବୀମେଲକ କହିଲେ, “ତୁମ୍ଭେ ଆମ୍ଭମାନଙ୍କ ପ୍ରତି ଏ କି କର୍ମ କଲ? ଲୋକମାନଙ୍କ ମଧ୍ୟରୁ କେହି ସହଜରେ ତୁମ୍ଭ ଭାର୍ଯ୍ୟା ସହିତ ଶୟନ କରିପାରିଥାʼନ୍ତା, ତହିଁରେ ତୁମ୍ଭେ ଆମ୍ଭମାନଙ୍କ ଉପରେ ଦୋଷ ଘଟାଇଥାʼନ୍ତ।” ¹¹ତେଣୁ ଅବୀମେଲକ ସମସ୍ତ ଲୋକଙ୍କୁ ଆଜ୍ଞା ଦେଇ କହିଲେ, “ଯେ କେହି ଏହି ମନୁଷ୍ୟକୁ କି ତାହାର ଭାର୍ଯ୍ୟାକୁ ସ୍ପର୍ଶ କରିବ, ସେ ନିଶ୍ଚୟ ହତ ହେବ।”

¹²ଅନନ୍ତର ଇସ୍‌ହାକ ସେହି ଦେଶରେ କୃଷିକର୍ମ କଲେ, ଆଉ ସେହି ବର୍ଷ ଶହ ଗୁଣ ଫଳ ପାଇଲେ; କାରଣ ଆମ୍ଭମାନଙ୍କ ପିତା ତାହାଙ୍କୁ ଆଶୀର୍ବାଦ କଲେ। ¹³ପୁଣି ସେହି ମନୁଷ୍ୟ ଧନବାନ ହେଲେ ଓ କ୍ରମଶଃ ଅଧିକ ଅଧିକ ଉନ୍ନତି ପାଇ ଅତ୍ୟନ୍ତ ମହାନ ହେଲେ। ¹⁴ତାହାଙ୍କର ମେଷଗୋଷ୍ଠୀ ଓ ଗୋଷ୍ଠୀ ପୁଣି ବହୁସଂଖ୍ୟକ ଦାସ ଥିଲେ, ଏଣୁ ପଲେଷ୍ଟୀୟମାନେ ତାହାଙ୍କୁ ଈର୍ଷା କଲେ। ¹⁵ତାହାଙ୍କ ପିତା ଅବ୍ରହାମଙ୍କ ସମୟରେ ତାହାଙ୍କ ପିତାଙ୍କ ଦାସମାନେ ଯେଉଁସବୁ କୂପ ଖୋଳିଥିଲେ, ସେହିସବୁ ପଲେଷ୍ଟୀୟମାନେ ବନ୍ଦ କରି ମାଟିରେ ପୂର୍ଣ୍ଣ କରିଥିଲେ। ¹⁶ପୁଣି ଅବୀମେଲକ ଇସ୍‌ହାକଙ୍କୁ କହିଲେ, “ଆମ୍ଭମାନଙ୍କ ନିକଟରୁ ପ୍ରସ୍ଥାନ କର; କାରଣ ତୁମ୍ଭେ ଆମ୍ଭମାନଙ୍କ ଅପେକ୍ଷା ଅତ୍ୟନ୍ତ ବଳବାନ ହୋଇ ଉଠିଅଛ।”

¹⁷ତେଣୁ ଇସ୍‌ହାକ ସେଠାରୁ ଯାଇ ଗରାର ଉପତ୍ୟକାରେ ଛାଉଣି ସ୍ଥାପନ କରି ସେଠାରେ ବାସ କଲେ। ¹⁸ପୁଣି ତାହାଙ୍କ ପିତା ଅବ୍ରହାମଙ୍କ ସମୟରେ ଯେଉଁ ଜଳକୂପ ଖୋଳା ଯାଇଥିଲା, ଅବ୍ରହାମଙ୍କ ମୃତ୍ୟୁ ଉତ୍ତାରେ ପଲେଷ୍ଟୀୟମାନେ ଯାହା ବନ୍ଦ କରିଥିଲେ, ସେହିସବୁ କୂପ ଇସ୍‌ହାକ ପୁନର୍ବାର ଖୋଳିଲେ ଓ ଆପଣା ପିତା ସେହିସବୁର ଯେଉଁ ଯେଉଁ ନାମ ଦେଇଥିଲେ, ସେହି ସେହି ନାମରେ ସେଗୁଡ଼ିକର ନାମ ଦେଲେ। ¹⁹ମାତ୍ର ଇସ୍‌ହାକଙ୍କ ଦାସମାନେ ସେହି ଉପତ୍ୟକାରେ ଖୋଳି ସେଠାରେ ନିର୍ଝର ଜଳର ଗୋଟିଏ କୂପ ପାଇଲେ; ²⁰ତହିଁରେ ଗରାରର ପଶୁପାଳକମାନେ ଇସ୍‌ହାକଙ୍କ ପଶୁପାଳକମାନଙ୍କ ସଙ୍ଗେ ବିବାଦ କରି କହିଲେ, “ଏ ଜଳ ଆମ୍ଭମାନଙ୍କର।” ସେଥିରେ ସେ ସେହି କୂପର ନାମ ଏଷକ ଦେଲେ, କାରଣ ସେମାନେ ତାହାଙ୍କ ସଙ୍ଗେ ବିବାଦ କଲେ। ^a a v20 ଏଷକ ନାମର ଅର୍ଥ “ବିବାଦ”। ²¹ଏଥିଉତ୍ତାରେ ସେମାନେ ଆଉ ଗୋଟିଏ କୂପ ଖୋଳିଲେ, ତାହା ନିମନ୍ତେ ମଧ୍ୟ ବିବାଦ କଲେ; ଏଣୁ ସେ ତାହାର ନାମ ସିଟ୍‌ନା ଦେଲେ। ^b b v21 ସିଟ୍‌ନା ନାମର ଅର୍ଥ “ବିରୋଧ”। ²²ପୁଣି ସେ ସେଠାରୁ ପ୍ରସ୍ଥାନ କରି ଆଉ ଗୋଟିଏ କୂପ ଖୋଳିଲେ; ତାହା ନିମନ୍ତେ ସେମାନେ ବିବାଦ କଲେ ନାହିଁ, ଏଣୁ ସେ ତାହାର ନାମ ରିହୋବୋତ୍‌ ଦେଇ କହିଲେ, “ବର୍ତ୍ତମାନ ଆମ୍ଭମାନଙ୍କ ପିତା ଆମ୍ଭମାନଙ୍କ ନିମନ୍ତେ ସ୍ଥାନ ପ୍ରଶସ୍ତ କଲେ, ଆଉ ଆମ୍ଭେମାନେ ଏହି ଦେଶରେ ବର୍ଦ୍ଧିଷ୍ଣୁ ହେବୁ।” ^c c v22 ରିହୋବୋତ୍‌ ନାମର ଅର୍ଥ “ସ୍ଥାନ” ବା “ପ୍ରଶସ୍ତ ସ୍ଥାନ”।

²³ତହିଁ ଉତ୍ତାରେ ସେ ସେଠାରୁ ବେର୍‌ଶେବାକୁ ଗଲେ।

²⁴ପୁଣି ସେହି ରାତ୍ରିରେ ଆମ୍ଭମାନଙ୍କ ପିତା ତାହାଙ୍କୁ ଦର୍ଶନ ଦେଇ କହିଲେ, “ଆମ୍ଭେ ତୁମ୍ଭ ପିତା ଅବ୍ରହାମଙ୍କ ଈଶ୍ଵର; ଭୟ କର ନାହିଁ, କାରଣ ଆମ୍ଭେ ତୁମ୍ଭ ସଙ୍ଗେ ଅଛୁ, ଆଉ ଆମ୍ଭର ଦାସ ଅବ୍ରହାମଙ୍କ ସକାଶୁ ଆମ୍ଭେ ତୁମ୍ଭକୁ ଆଶୀର୍ବାଦ କରିବା ଓ ତୁମ୍ଭ ବଂଶ ବୃଦ୍ଧି କରିବା।”

²⁵ତହିଁରେ ସେ ସେଠାରେ ଗୋଟିଏ ଯଜ୍ଞବେଦି ନିର୍ମାଣ କରି ଆମ୍ଭମାନଙ୍କ ପିତାଙ୍କ ନାମରେ ପ୍ରାର୍ଥନା କଲେ ଓ ସେଠାରେ ଆପଣା ତମ୍ବୁ ସ୍ଥାପନ କଲେ; ପୁଣି ସେଠାରେ ଇସ୍‌ହାକଙ୍କ ଦାସମାନେ ଗୋଟିଏ କୂପ ଖୋଳିଲେ।

²⁶ଏଥିଉତ୍ତାରେ ଅବୀମେଲକ ଆପଣା ମନ୍ତ୍ରୀ ଅହୁଷତ୍‌ ଓ ସେନାପତି ଫୀଖୋଲଙ୍କ ସହିତ ଗରାରରୁ ତାହାଙ୍କ ନିକଟକୁ ଆସିଲେ। ²⁷ତହିଁରେ ଇସ୍‌ହାକ ସେମାନଙ୍କୁ କହିଲେ, “ଆପଣମାନେ ତ ମୋତେ ଘୃଣା କରି ଆପଣାମାନଙ୍କ ନିକଟରୁ ବିଦାୟ କରିଥିଲେ, ତେବେ କାହିଁକି ମୋʼ ନିକଟକୁ ଆସିଲେ?”

²⁸ସେମାନେ କହିଲେ, “ଈଶ୍ଵର ଯେ ଆପଣଙ୍କ ସଙ୍ଗେ ଅଛନ୍ତି, ଏହା ଆମ୍ଭେମାନେ ସ୍ପଷ୍ଟ ଦେଖିଲୁ, ଏଣୁ ଆମ୍ଭେମାନେ କହିଲୁ, ‘ଆମ୍ଭମାନଙ୍କ ମଧ୍ୟରେ, ଅର୍ଥାତ୍‌ ଆପଣଙ୍କ ଓ ଆମ୍ଭମାନଙ୍କ ମଧ୍ୟରେ ଏକ ଶପଥ ହେଉ, ଆଉ ଆମ୍ଭେମାନେ ଆପଣଙ୍କ ସଙ୍ଗେ ଏକ ନିୟମ ସ୍ଥାପନ କରୁ, ²⁹ଯେପରି ଆପଣ ଆମ୍ଭମାନଙ୍କର କୌଣସି ଅନିଷ୍ଟ କରିବେ ନାହିଁ, ଯେପରି ଆମ୍ଭେମାନେ ଆପଣଙ୍କୁ ସ୍ପର୍ଶ ନ କରି କେବଳ ମଙ୍ଗଳ କଲୁ ଓ ଆପଣଙ୍କୁ କୁଶଳରେ ବିଦାୟ କଲୁ। ଆପଣ ତ ବର୍ତ୍ତମାନ ଈଶ୍ଵରଙ୍କ ଆଶୀର୍ବାଦ-ପ୍ରାପ୍ତ।’”

³⁰ତେଣୁ ଇସ୍‌ହାକ ସେମାନଙ୍କ ନିମନ୍ତେ ଗୋଟିଏ ଭୋଜ ପ୍ରସ୍ତୁତ କଲେ, ଆଉ ସେମାନେ ଭୋଜନ ପାନ କଲେ। ³¹ତହିଁ ଆରଦିନ ପ୍ରଭାତରେ ସେମାନେ ଉଠି ପରସ୍ପର ଶପଥ କଲେ; ପୁଣି ଇସ୍‌ହାକ ସେମାନଙ୍କୁ ବିଦାୟ କରନ୍ତେ, ସେମାନେ କୁଶଳରେ ତାହାଙ୍କ ନିକଟରୁ ପ୍ରସ୍ଥାନ କଲେ। ³²ସେହି ଦିନ ଇସ୍‌ହାକଙ୍କ ଦାସମାନେ ଆସି ଆପଣାମାନଙ୍କ ଖୋଳିଥିବା କୂପ ବିଷୟରେ ତାହାଙ୍କୁ ଜଣାଇ କହିଲେ, “ଆମ୍ଭେମାନେ ଜଳ ପାଇଲୁ!” ³³ତହିଁରେ ସେ ତାହାର ନାମ ଶିବ୍‌ଆ ଦେଲେ; ଏହେତୁ ଆଜି ପର୍ଯ୍ୟନ୍ତ ସେହି ନଗରର ନାମ ବେର୍‌ଶେବା ଅଟେ। ^d d v33 ଶିବ୍‌ଆର ଅର୍ଥ “ଶପଥ”; ବେର୍‌ଶେବାର ଅର୍ଥ “ଶପଥର କୂପ”।

³⁴ଏଷୌ ଚାଳିଶ ବର୍ଷ ବୟସରେ ହିତ୍ତୀୟ ବେରିର କନ୍ୟା ଯିହୂଦୀତ୍‌କୁ ଓ ହିତ୍ତୀୟ ଏଲୋନର କନ୍ୟା ବାସମତ୍‌କୁ ବିବାହ କଲେ। ³⁵ଆଉ ସେମାନେ ଇସ୍‌ହାକ ଓ ରିବିକାଙ୍କ ପ୍ରତି ମନଃପୀଡ଼ାର କାରଣ ହେଲେ।