2 Samuel 13

13 ¹Chiwui thili Davidwui naomayara Absalomwui azarva̱ khamathā akha leisai, awui aming Tamar hoi; kala Davidwui naomayara Amnonna ali leishilāka. ²Amnonna awui azarva̱ Tamarwui vang chotlaklak eina akhalatta kazā ngasaka; kaja ava kachingva̱na, kala Amnonna ali nganaida kaji apong matheimana. ³Amnonwui ngasotnao akha leisai, awui aming Jonadab hoi, a Davidwui achinā Shime-ahwui naomayarana; kala Jonadab kachungkha them mina. ⁴Ana Amnonli ngahāna, "Awungawui naomayara, khisāda ngathor kachida na chotlaklakhaokhala? Ili mahāngmala?" Amnonna hānga, "Ina ichinā Absalomwui azarva̱ Tamarli leishi."

⁵Jonadabna hānga, "Nawui petli pida kazā thāda sālu. Navā nali kayangrā tharan, ali hānglu, 'Ina kapona, izarva̱ Tamarna ili zākhavai khamiranu. Ana iwui miktāli zāt chi sāmiranu, chieina ina awui pāng eina zāra.'"

⁶Amnonna pida kazā thāda sāhaowa. Awungana ali kayangrā tharan, Amnonna hānga, "Izarva̱ Tamarna rāda iwui miktāli khamui khani sāmiranu, chieina ina awui pāng eina zāra."

⁷Davidna konungli khalei Tamarli pao chihovā, "Nawui achinā Amnonwui shimli vālu, kala ali zāt sāmilu." ⁸Tamarna awui achinā Amnon pisai shimli vāhaowa. Ana khawok khuida, naikazakzaklaga, awui miktāli khamui sākhui, kala chi naikhuiya. ⁹Ana ham chi khuida ali sangmi, kha ana zākhavai mamayāthuwa. Amnonna hānga, "Mi katonga chi iwui eina chihoshoklu." Chieina mi katongana ali horhaowa. ¹⁰Amnonna Tamarli hānga, "Zāt chi petkāli khuirālu, chieina ina nawui pāng eina zāra." Tamarna ana sākhui khamui chi khuida awui achinā Amnonli petkāli khuirai. ¹¹Ava zāt chi awuili khuirā tharan, ana ali yonkhuida hānga, "Izarva̱, rāda ili ngasopilu."

¹²Ana ngahānkai, "Chi maningmana, ichinā! Ili tandi masāmialu. Israelli hikathā ot masāpaimana. Hiyākha makhangatun ot masālu. ¹³Kala iwui maikashi hi ina kali khuivāra? Kala nala Israelwui ningkakachai mangkhama̱bingwui akha thāra. Ina kapona, awungali hānglu; ana ili nawui eina mahorsangmimara."

¹⁴Kha ana nganā khavai mamayāthuwa; ana ali pangmeida, ali tandi sāda ngasopiya. ¹⁵Chiwui thili Amnonna ali kachangkhat ningkachaiya; ali leishihaokahai leikashili reikhameiya. Ana ali hānga, "Ngakarthuida shoklu!"

¹⁶Ana hānga, "Chi maningmana; ili kashamshok kasā hi, nana ili rida sāhaikahai chili zakshimei khayonna." Kha ana nganā khavai mamayāthuwa.

¹⁷Ana awui rao chi hokhuida hānga, "Hi preiva̱ hili kayāngli chihoshoklu, kala awui thili khāmong chi shungnamhaolu."

¹⁸Chi atam chitharan awungawui naongalāva̱ kachingva̱bingna ngavai kashankachon thāda, Tamarna phahon katuma sāngnā kahai akha ngavai. Awui raona ali kayāngli shokngasaklaga awui thili khāmong shungnamhaira. ¹⁹Tamarna awui kuili hotlā tāhailaga, ana ngavai phahon katuma sāngnā kahai chi serkhāka. Awui pāng awui kuili haihailaga, zatmamānda panglāk eina chapa. ²⁰Agato Absalomna ali hānga, "Nagato Amnonna nala ngasopamhaira? Rida va̱ri kahaila leilu, izarva̱; ana nagatona. Hi chi nawui ningli mathaalu." Chithāda sāda Tamarna agato Absalomwui shimli ngachakyāng sha̱naopava̱ thāda pamsai.

²¹Awunga Davidna hi saikora chi kashā tharan, a malungvātlakhaowa. ²²Absalomna Amnonli shilala phālala khituikha mahāngmana; kaja ana awui izarva̱ Tamarli sākhamāng ngasak chiwui vang eina ali ningkachai.

Absalomna Awui Izarva̱ Tamarwui Vang Athut Khuimi

²³Zingkum khani kāshung thili Ephraimwui nganailakha Baal-hazorli Absalomwui yao kachichāpbing leisai, kala Absalomna awungawui naomayarabing saikorali hoi. ²⁴Absalomna awungawuili vāda hānga, "Yanglu, nawui raona yao kachichāpbing lei; awunga eina awui raobing china nawui raoli ngasovāhaomiranu."

²⁵Kha awungana Absalomli hānga, "Chi mathāmilu, inao; ithum saikora vāakha nali sakkhanā ngasāhaora." Absalomna ali panglāk eina hānghailala, ana mavāmana kha ali somi.

²⁶Absalomna hānga, "Chi masaakha, igato Amnonli ithumla ngasovāhaomilu." "Khisāda ana nathumla vāphalungrakhala?" da awungana ngahānna.

²⁷Kha Absalomna ali pangmeida hānghaida, ana Amnon eina awungawui naomayarabing saikorali ali ngasovā ngasaka. ²⁸Absalomna awui raobingli kasoi, "Ning ngasharlu. Zamna Amnonwui ning mahai tharan kala ina, 'Amnonli kāplu' da hāng tharan, ali shaothatlu. Mangacheealu. Ina khalatta nathumli makasomala? Pingmeida sālu, lungsanmeilu."

²⁹Absalomwui raobingna Absalomna kaso kahai tākam eina Amnonli sāmi. Chieina awungawui naomayarabing saikora ngakarthuida, mi kachiva̱na katong gadhā tongda yāmserhaowa.

³⁰Athum shongfali leilakha, "Absalomna awungawui naomayarabing saikorali shaothathaira; akha eina tangda mataimana" kaji Davidli hānghaowa.

³¹Awungana ngakarthuilaga awui kachon serkhāka, kala ngaleili pihaowa; awui raobing saikora china kachon serkhāklaga nganinga. ³²Kha Davidwui achinā Shime-ahwui naomayara Jonadabna hānga: "Ishamei na awungawui naomayarabing yaronnaobing saikora shaothathaira da mathaalu. Amnon maningla thihaira. Kaja Amnonna awui izarva̱ Tamarli sākhamāng ngasak chiwui zimiksho eina, Absalomna hi khangarānna. ³³Awungawui naomayarabing saikora thihaira da machukta, ishamei awungana hi chi ningli mathaalu. Amnon maningla thihaira."

³⁴Chitharan Absalomna yāmhaira. Raikān yaronnaona mik yangkakā eina, awui khanukwui kaphungpheili shongfali mi kachungkha tungda rāki chi theihaowa. ³⁵Jonadabna awungali hānga, "Yanglu, awungawui naomayarabing kharāhaira. Narao ina hāngkahai thāda leira." ³⁶Ana hāngkup kahai eina, awungawui naomayarabing panglāk eina chapmamānda rāshunga; awunga kala awui rao saikorala wukkhananglāk eina soso chapa.

³⁷Absalomna yāmda Ammihudwui naomayara Geshurwui awunga Talmaiwuili vai. Davidna zimiksho ngaronda awui naowui vang chapngachai. ³⁸Absalomna yāmda Geshurli vākahaiwui thili, chili zingkum kathum apama. ³⁹Kala Awunga Davidwui ning Absalomli zangkhavai theingailak eina leihaowa, kaja ana Amnon thikahaiwui thili ning lumhaira.