ኣምኖን ንሓብቱ ትዓማር የነውራ

ኣምኖን ንሓብቱ ትዓማር በይና ምእንቲ ኽረኽባ ሕሙም መሰለ፥ ገደዳ፥ ደሓር ፀልኣ፥ ድሕሪኣ ኸዓ ኣፍደገ ዓፀወ። ትዓማር ክዳና ቐደደት፥ ኣብ ቤት ኣቤሴሎም ከዓ ፅምምቲ ኮይና ተቐመጠት። ዳዊት ተቘጥዐ እምበር ገለ ኣይገበረን፤ ድሕሪ ኽልተ ዓመት ኣቤሴሎም ኣብ በዓል ቅርፀት ኣባጊዕ ንኣምኖን ኣቕቲሉ ሃደመ።

ምዕራፍ 13።

ድሕሪ እዝ፥ ኣቤሴሎም ወዲ ዳዊት ትዓማር እትብሃል ፅብቕቲ ሓብቲ ነበረቶ፤ ወዲ ዳዊት ኣምኖን ከዓ ኣፍቀራ። ኣምኖን ድማ ብዛዕባ ሓብቱ ትዓማር የመና ተጨነቐ ክሳዕ ዝሓመመ፤ ንሳ ድንግል ነበረት እሞ፥ ናብኣ ዝቐርበሉ መንገዲ ኣይረኸበን። ኣምኖን ከዓ ዮናዳብ ዝስሙ ፈታዊ ነበሮ፥ ንሱ ወዲ ሺምዓ ሓው ዳዊት እዩ፤ ዮናዳብ ድማ የመና ብልሂ ሰብ ነበረ። ንኣምኖን ድማ “ኣታ ወዲ ንጉስ፥ ስለ ምንታይ ኢኻ ንግሆ ንግሆ ከምዙይ እትኸስም? ኣይትነግረንንዶ?” በሎ። ኣምኖን ከዓ “ንትእማር ሓብቲ ሓወይ ኣቤሴሎም ኣፍቅር ኣለኹ” በለ።

ዮናዳብ ድማ “ኣብ ዓራትካ ደቂስካ ሕሙም መሲልካ ተፀነ። ኣቦኻ ኽርእየካ ምስ መፀ ድማ ‘በይዛኻ፥ ሓብተይ ትዓማር ትምገበኒ፤ ኣነ እናረኣኹ ድማ እቲ ምግቢ ትስራሕ፥ ካብ ኢዳ ምእንቲ ኽበልዕ’ በሎ” በለ።

ኣምኖን ድማ ደቂሱ ሕሙም መሰለ። እቲ ንጉስ ክርእዮ ምስ መፀ ድማ ኣምኖን “ሓብተይ ትዓማር መፂኣ፥ ኣነ እናረኣኹ ክልተ ቕጫ ትስራሕ፥ ካብ ኢዳ ምእንቲ ኽበልዕ” በለ።

ዳዊት ድማ ናብ ትዓማር ናብ ቤተ መንግስቲ ልኢኹ “ናብ ቤት ሓውኪ ኣምኖን ኪዲ፥ ምግቢውን ስርሐሉ” በላ። ትዓማር ድማ ናብ ቤት ሓዋ ኣምኖን ከደት፤ ንሱ ኣብኡ ደቂሱ ነበረ። ብሑቕ ወሲዳ ለዊሳ፥ ኣብ ቅድሚኡ ቕጫ ገይራ ኸዓ ሰንከተት። እቲ ሸሓነ ወሲዳ ድማ ኣቕረበትሉ፤ ንሱ ግና ክበልዕ ኣበየ። ኣምኖን ከዓ “ኵሉ ሰብ ካባይ ኣውፅኡ” በለ። ኵሉ ሰብ ድማ ካብኡ ወፀ። ኣምኖን ድማ ንትእማር “እቲ ምግቢ ናብ መደቀሲ ኣእትውዮ፥ ካብ ኢድኪ ምእንቲ ኽበልዕ” በላ። ትዓማር ከዓ ነቲ ዝሰንከተቶ ቕጫ ወሲዳ፥ ናብ ሓዋ ኣምኖን ናብ መደቀሲ ኣእተወትሉ። ክበልዕ ከተቕርበሉ እንተላ ድማ ሓዛ፥ “ሓብተይ፥ ንዒ ምሳይ ደቅሲ” በላ።

ንሳ ድማ “ኣይፋልካን ሓወይ! ኣይተገድደኒ፤ ኣብ እስራኤል ከምዙይ ዝበለ ነገር ከቶ ኣይግበርን እዩ፤ እዝ ነውሪ እዙይ ኣይትግበር። ኣነ ኸዓ ነዝ ውርደተይ ናበይ እወስዶ? ንስኻ ድማ ከም ሓደ ኻብቶም ኣብ እስራኤል ዘለዉ ፅዩፋት ዓያሹ ክትከውን ኢኻ። በይዛኻ፥ ንንጉስ ተዛረቦ፤ ንሱ ኻባኻ ኣይከልክለንን እዩ” በለት።

ንሱ ግና ክሰምዓ ኣበየ፤ ካብኣ ስለ ዝሓየለ ድማ ገደዳ፥ ምስኣ ኸዓ ደቀሰ። ሽዑ ኣምኖን የመና ፀልኣ፤ እቲ ፅልኢ ኸዓ ካብቲ ቅድም ኣፍቂርዋ ዝነበረ ፍቕሪ ይዓቢ ነበረ። “ተሲእኪ ኪዲ!” ድማ በላ።

ንሳ ኸዓ “ኣይፋልካን፤ እዝ ምስዳደይ ካብቲ ዝገበርካኒ ዝገደደ ኽፉእ ነገር እዩ” በለት። ንሱ ግና ክሰምዓ ኣበየ።

ነቲ ዘገልግሎ ጊልያ ፀዊዑ ድማ “ነዛ ሰበይቲ እዚኣ ካብዙይ ኣውፅኣ፥ ድሕሪኣ ኸዓ ማዕፆ ዕፆ” በሎ።

ንሳ ድማ ነዊሕ ዝተወቀበ ቀሚሽ ተኸዲና ነበረት፤ እዙይ ከዓ ኣብቲ ዘመን እቲ ደቂ ንጉስ ድንግላት ዝኽደናኦ ኽዳን ነበረ። እቲ ዘገልግሎ ድማ ናብ ደገ ኣውፅኣ፥ ድሕሪኣ ኸዓ ማዕፆ ዓፀወ። ትዓማር ድማ ሓመድ ኣብ ርእሳ ነስነሰት፤ ነቲ ተኸዲናቶ ዝነበረት ነዊሕ ዝተወቀበ ቀሚሽ ቀደደቶ፤ ኢዳ ኣብ ርእሳ ገይራ ኸዓ፥ እናበኸየት ከደት። ሓዋ ኣቤሴሎም ድማ “ሓውኪ ኣምኖን ምሳኺ ነይሩ? ሕዚ ስቕ በሊ ሓብተይ፤ ንሱ ሓውኪ እዩ፤ ነዝ ነገር እዙይ ኣብ ልብኺ ኣይተእትውዮ” በላ። ትዓማር ከዓ ኣብ ቤት ሓዋ ኣቤሴሎም ጥፍእቲ ኾይና ተቐመጠት።

ንጉስ ዳዊት ድማ ነዝ ዅሉ ምስ ሰምዐ፥ የመና ተቘጥዐ። ኣቤሴሎም ድማ ንኣምኖን ሰናይ ኮነ ኽፉእ ገለ እኳ ኣይበሎን፤ ንሓብቱ ትዓማር ስለ ዘነወራ ይፀልኦ ነበረ እሞ።

ኣቤሴሎም ምእንቲ ሓብቱ ትዓማር ሕነ ይፈዲ

ድሕሪ ክልተ ምሉእ ዓመት ድማ ኣቤሴሎም ኣብ በዓል ሓሶር ኣብ ጥቓ ኤፍሬም ቈረፅቲ ፀጕሪ ኣባጊዕ ነበርዎ፤ ንዅሎም ደቂ ንጉስ ከዓ ዓደመ። ኣቤሴሎም ድማ ናብ ንጉስ ከይዱ “እንሆ፥ ሓሽከርካ ቈረፅቲ ፀጕሪ ኣለዎ፤ ንጉስን ኣገልገልቱን ምስ ሓሽከርካ ይኺዱ” በለ።

እቲ ንጉስ ድማ ንኣቤሴሎም “ኣይፋሉን ወደይ፤ ከይነኽብደካ ኵልና ኣይንኺድን” በሎ። ኣቤሴሎም ግዲ እኳ እንተ በሎ፥ ክኸይድ ኣይደለየን፤ ባረኾ ደኣ እምበር።

ኣቤሴሎም ድማ “እንተ ዘይኮነ፥ በይዛኻ ሓወይ ኣምኖን ምሳና ይምፃእ” በለ። እቲ ንጉስ ከዓ “ስለ ምንታይ ምሳኻ ይኸይድ?” በሎ።

ኣቤሴሎም ግና ግዲ በሎ፤ ስለዙይ ንኣምኖንን ንዅሎም ደቂ ንጉስን ምስኡ ክኸዱ ፈቐደሎም። ኣቤሴሎም ድማ ነገልገልቱ “ኣጸቢቕኩም ተመልከቱ፤ ልቢ ኣምኖን ብወይኒ ምስ ተሓጐሰ፥ ‘ንኣምኖን ውቅዕዎ’ ኢለ ምስ በልኩኹም ድማ ቅተልዎ፤ ኣይትፍርሑ፤ ኣነ ባዕለይ ኣይኣዘዝኩኹምን? ፅንዑን ትብዑን” ኢሉ ኣዘዞም።

ኣገልገልቲ ኣቤሴሎም ድማ ነኣምኖን ከምቲ ኣቤሴሎም ዝኣዘዞም ገበርዎ። ሽዑ ኵሎም ደቂ ንጉስ ተሲኦም፥ ነፍሲ ወከፎም ኣብ በቕሉ ተቐሚጡ ሃደሙ።

ኣብ መንገዲ እንተለዉ ድማ ዳዊት “ኣቤሴሎም ንዅሎም ደቂ ንጉስ ቀቲልዎም፤ ሓደ እኳ ኣይተረፈን” ዝብል ወረ ሰምዐ።

እቲ ንጉስ ድማ ተሲኡ ክዳኑ ቀደደ፤ ኣብ ምድሪ ኸዓ ተገምሰሰ፤ ኵሎም ኣገልገልቱ ድማ ክዳውንቶም ቀዲዶም ኣብ ጥቓኡ ደው በሉ። ዮናዳብ ወዲ ሺምዓ ሓው ዳዊት ግና ከምዙይ በለ፦ “ጐይታይ፥ ንዅሎም እቶም መንእሰያት ደቂ ንጉስ ቀቲሎምዎም ኢሉ ኣይሕሰብ፤ ኣምኖን ጥራሕ እዩ ዝሞተ። ኣምኖን ንሓብቱ ትዓማር ካብ ዘነወረላ መዓልቲ ጀሚሩ፥ ኣቤሴሎም ነዙይ ሓሲቡ ነበረ እዩ እሞ። ስለዙይ ጐይታይ ንጉስ ኵሎም ደቂ ንጉስ ሞይቶም ኢሉ ኣብ ልቡ ኣየእትዎ፤ ኣምኖን ጥራሕ እዩ ዝሞተ” በለ።

ኣቤሴሎም ድማ ሃዲሙ ነበረ። እቲ መንእሰይ ሓላዊ ድማ ቋሕ ኢሉ እንተ ጠመተ፥ ብመንገዲ ጎቦ እቲ ዀረብታ ደድሕሪኡ ዝመፅእ ብዙሕ ህዝቢ ረአየ። ዮናዳብ ድማ ንንጉስ “እንሆ፥ ደቂ ንጉስ መፂኦም፤ ከምቲ ሓሽከርካ ዝበሎ ኾይኑ” በሎ። እዙይ ክዛረብ ምስ ወድአ ድማ ደቂ ንጉስ ዓው ኢሎም እናበኸዩ መፁ፤ እቲ ንጉስን ኵሎም ኣገልገልቱን ከዓ የመና ብምሪር ብኽያት በኸዩ።

ኣቤሴሎም ድማ ሃዲሙ ናብ ታልማይ ወዲ ዓሚሁድ ንጉስ ጌሹር ከደ። ዳዊት ከዓ ምእንቲ ወዱ ኵሉ መዓልቲ ይሓዝን ነበረ። ኣቤሴሎም ድማ ሃዲሙ ናብ ጌሹር ምስ ከደ፥ ኣብኡ ሰለስተ ዓመት ተቐመጠ። ልቢ ንጉስ ዳዊት ድማ ናብ ኣቤሴሎም ክኸይድ ይናፍቕ ነበረ፤ ብዛዕባ ሞት ኣምኖን ተፀናኒዑ ነበረ እሞ።