Amunoni Anochinya Hanzvadzi Yake Tamari
Amunoni anonyepera kurwara kuti ave oga nehanzvadzi yake Tamari, anomubata nechisimba, ozomuvenga okiya musuwo shure kwake. Tamari anobvarura nguo yake ogara akasurukirwa mumba maAbhusaromu. Dhavhidhi anotsamwa zvikuru asi haaiti chinhu; makore maviri gare gare Abhusaromu anourayisa Amunoni pamutambo wokuveura makwai otiza.
13 1Shure kwaizvozvi, Abhusaromu mwanakomana waDhavhidhi akanga aine hanzvadzi yakanaka yainzi Tamari, uye Amunoni mwanakomana waDhavhidhi akamuda. 2Amunoni akatambudzika kwazvo pamusoro pehanzvadzi yake Tamari zvokuti akazvirwarisa; iye akanga ari mhandara, uye Amunoni akashaya nzira yokuswedera kwaari. 3Amunoni akanga aine shamwari yainzi Jonadhabhi, mwanakomana waShimea mukoma waDhavhidhi; Jonadhabhi akanga ane njere kwazvo. 4Akabvunza Amunoni akati, “Nei uchionda kudai mangwanani namangwanani, mwanakomana wamambo? Haundiudzi here?” Amunoni akati, “Ndinoda Tamari, hanzvadzi yomununʼuna wangu Abhusaromu.”
5Jonadhabhi akati, “Rara pamubhedha uite sounorwara. Kana baba vako vachiuya kuzokuona, uvaudze kuti, ‘Ndapota regai hanzvadzi yangu Tamari indipe zvokudya. Ngaagadzire chokudya ipo pandinoona, kuti ndidye zvinobva muruoko rwake.’”
6Amunoni akarara akanyepedzera kurwara. Mambo vakati vachiuya kuzomuona, Amunoni akati, “Regai hanzvadzi yangu Tamari auye azondibikira zvingwa zviviri ndichizviona, kuti ndidye zvinobva muruoko rwake.”
7Dhavhidhi vakatuma shoko kuna Tamari kumuzinda vachiti, “Enda kumba yomukoma wako Amunoni undomubikira zvokudya.” 8Tamari akaenda kumba yomukoma wake Amunoni, uko akanga arere. Akatora furawa akaikanya, akaumba zvingwa pamberi pake, akazvibika. 9Akatora gango akamupakurira, asi akaramba kudya. Amunoni akati, “Budisai munhu wose pano.” Saka vanhu vose vakabva paari. 10Amunoni akati kuna Tamari, “Uya nechokudya muimba yokurara, kuti ndidye zvinobva muruoko rwako.” Tamari akatora zvingwa zvaakanga agadzira akazviuyisa kumukoma wake Amunoni muimba yokurara. 11Paakaswededza kuti adye, akamubata akati, “Uya, urare neni, hanzvadzi yangu.”
12Iye akati, “Aiwa, mukoma wangu! Usandimanikidza. Chinhu chakadai hachiitwi muIsraeri. Usaita chinhu ichi chinonyadzisa. 13Uye ini, ndichaendesa kupi nyadzi dzangu? Newe, uchafanana nerimwe ramapenzi anozvidzwa muIsraeri. Ndapota, taura namambo; havazondirambidzi kwauri.”
14Asi akaramba kuteerera; zvaakanga akasimba kumupfuura, akamumanikidza akavata naye. 15Ipapo Amunoni akamuvenga noruvengo rukuru—rukuru kupfuura rudo rwaakanga ainarwo kwaari. Akati kwaari, “Simuka ubve pano!”
16Iye akati, “Aiwa, kundidzinga uku kutadza kukuru kupfuura zvawakatoita kwandiri.” Asi akaramba kuteerera.
17Akadana muranda wake akati, “Budisa mukadzi uyu pano, uye upfige mukova shure kwake.”
18Iye akanga akapfeka nguo refu yakashongedzwa, ndiyo nguo yaipfekwa navanasikana vamambo vaiva mhandara panguva iyoyo. Muranda wake akamubudisa akapfiga mukova shure kwake. 19Tamari akaisa madota mumusoro make akabvarura nguo refu yakashongedzwa yaakanga akapfeka. Akabata musoro wake noruoko akaenda, achichema zvikuru paakanga achienda. 20Mukoma wake Abhusaromu akati, “Amunoni mukoma wako akanga anewe here? Zvino nyarara, hanzvadzi yangu; mukoma wako. Usazviisa pamwoyo.” Saka Tamari akagara ari mukadzi akasuruvara mumba momukoma wake Abhusaromu.
21Mambo Dhavhidhi vakati vanzwa zvose izvi, vakatsamwa kwazvo. 22Abhusaromu haana chaakataura kuna Amunoni, chakanaka kana chakaipa, nokuti akamuvenga nokuda kwokuchinya kwaakaita hanzvadzi yake Tamari.
Abhusaromu Anotsiva Hanzvadzi Yake Tamari
23Makore maviri azere akati apera, Abhusaromu akanga aine vaveuri vamakwai paBhaari Hazori pedyo neEfuremu, akakoka vanakomana vose vamambo. 24Abhusaromu akaenda kuna mambo akati, “Muranda wenyu ane vaveuri vamakwai. Mambo navaranda vavo vangaende neni here?”
25Mambo vakati kuna Abhusaromu, “Aiwa, mwanakomana wangu, hatifaniri kuenda tose, kuti tirege kukuremedza.” Kunyange Abhusaromu akavagombedzera, havana kuda kuenda asi vakamuropafadza.
26Abhusaromu akati, “Kana zvisina kudaro, ndapota regai mukoma wangu Amunoni aende nesu.” Mambo vakabvunza vakati, “Nei achifanira kuenda newe?”
27Asi Abhusaromu akavamanikidza, saka vakarega Amunoni navanakomana vose vamambo vachienda naye. 28Abhusaromu akarayira varanda vake akati, “Cherechedzai zvakanaka. Kana waini yafadza mwoyo waAmunoni uye ndikati, ‘Rovai Amunoni muwisire pasi,’ mumuuraye. Musatya. Handisi ini pachangu ndakurayirai here? Simbai mutsunge mwoyo.”
29Varanda vaAbhusaromu vakaita kuna Amunoni sezvavakanga varayirwa naAbhusaromu. Ipapo vanakomana vose vamambo vakasimuka, mumwe nomumwe akakwira chidhongi chake, vakatiza.
30Vari munzira, Dhavhidhi vakanzwa shoko richiti, “Abhusaromu auraya vanakomana vose vamambo; hapana kana mumwe asara.”
31Mambo vakasimuka, vakabvarura nguo dzavo, vakavata pasi; varanda vavo vose vakamira pedyo, nguo dzavo dzakabvaruka. 32Asi Jonadhabhi mwanakomana waShimea, mukoma waDhavhidhi, akati, “Ishe wangu ngavarege kufunga kuti vauraya majaya ose, vanakomana vamambo. Amunoni oga ndiye afa. Abhusaromu akanga aronga izvi kubva pazuva Amunoni paakachinya hanzvadzi yake Tamari. 33Ishe wangu mambo ngavarege kuzviisa pamwoyo, vachifunga kuti vanakomana vose vamambo vafa. Amunoni oga ndiye afa.”
34Panguva iyoyo Abhusaromu akanga atiza. Murindi wechidiki akatarira kumusoro akaona vanhu vazhinji vachiburuka nenzira iri parutivi rwechikomo shure kwake. 35Jonadhabhi akati kuna mambo, “Tarirai, vanakomana vamambo vasvika. Zvaita sezvakanga zvataurwa nomuranda wenyu.” 36Achangopedza kutaura, vanakomana vamambo vakasvika vachichema zvikuru; mambo navaranda vavo vose vakachemawo zvikuru kwazvo.
37Abhusaromu akatiza akaenda kuna Taramai mwanakomana waAmihudhi, mambo weGeshuri. Dhavhidhi vakachema mwanakomana wavo mazuva ose. 38Abhusaromu akati atiza akaenda kuGeshuri, akagarako makore matatu. 39Mwoyo waMambo Dhavhidhi wakashuva kuenda kuna Abhusaromu, nokuti vakanga vanyaradzwa pashure porufu rwaAmunoni.