ኢዮኣብ ንኣቤሴሎም ናብ ኢየሩሳሌም መለሶ

ኢዮኣብ ካብ ቴቆዓ ሓንቲ ሰበይቲ፥ ብዛዕባ ንሓዉ ዝቐተለ ወዲ ዝተፈጠረ ነገር ሒዛ፥ ናብ ንጉስ ለኣኻ፥ ንጉስ ንኣቦኡ ኽዝክርን እቲ ዝተሰጐ ናብ ገዝኡ ኽምለስ ክፈርድን ክትሓትት። ኣቤሴሎም ተመለሰ፥ ግና ክልተ ዓመት ገፅ ንጉስ ተኸልከለ፥ ክሳዕ ነቲ ናይ ኢዮኣብ ግራት ስገም ዘንድዶ።

ምዕራፍ 14።

ወዲ ፅሩያ ዝኾነ ኢዮኣብ ድማ ንጉስ ብልቡ ናብ ኣቤሴሎም ከም ዝናፈቐ ኣስተውዓለ። ኢዮኣብ ድማ ናብ ቴቆዓ ልኢኹ፥ ካብኡ ሓንቲ ብልሂ ሰበይቲ ኣምፅአ። ከምዙይ ድማ በላ፦ “በይዛኺ ከም ዝሓዘንኪ ምሰሊ፤ ናይ ሓዘን ክዳን ተኸደኒ፥ ዘይቲ ኣይትልከዪ፥ ከምታ ንብዙሕ መዓልቲ ንምዉት ዝሓዘነት ሰበይቲ ኩኒ። ናብ ንጉስ ኬድኪ ነዝ ቃላት እዚ ተዛረብዮ።” ኢዮኣብ ድማ ነቲ ቓላት ኣብ ኣፋ ኣንበሮ።

እታ ሰበይቲ ቴቆዓ ድማ ናብ ንጉስ መፂኣ፥ ብገፃ ናብ ምድሪ ተደፊኣ ኢድ ነሰአትሉ፤ “ኦ ንጉስ፥ ርድአኒ!” ድማ በለት።

ንጉስ ድማ “እንታይ ኮይንኪ?” ኢሉ ጠየቓ። ንሳ ኸዓ “ኣነ መበለት እየ፤ ሰብኣየይ ሞይቱ።

ኣነ ገረድካ ኽልተ ኣወዳት ነበሩኒ። ንሳቶም ድማ ኣብ መሮር ተባኢሶም፥ ዝፈላልዮም ሰብ ስለ ዘይነበረ፥ ሓደ ነቲ ሓደ ቐተሎ። እንሆ ድማ ኵሉ እቲ ዘመድ ኣብ ልዕሊ ኣነ ገረድካ ተንሲኡ፥ ‘ነቲ ሓዉ ዝወቕዐ ኣሕሊፍካ ሃበና፤ በቲ ዝቐተሎ ሓዉ ኽንቀትሎ ኢና፥ ነቲ ወራሲ እውን ከነጥፍኦ ኢና’ ይብሉ ኣለዉ። ከምዙይ ገይሮም ድማ ነታ ዝተረፈትኒ ጓህሪ ከጥፍእዋ፥ ንሰብኣየይ ድማ ኣብ ገፅ ምድሪ ስም ኮነ ተረፍ ከይገድፉሉ ይደልዩ ኣለዉ።”

ንጉስ ድማ ነታ ሰበይቲ “ናብ ገዛኺ ኺዲ፥ ኣነ ኸዓ ብዛዕባ እዙይ ክእዝዝ እየ” በላ።

እታ ሰበይቲ ቴቆዓ ድማ ነቲ ንጉስ “ኣታ ጐይታይ ንጉስ፥ እቲ በደል ኣባይን ኣብ ቤት ኣቦይን ይኹን፤ ንጉስ ምስ ዙፋኑ ግና ንፁህ ይኹን” በለቶ።

ንጉስ ድማ “ዝዛረበኪ ዝኾነ ሰብ ናባይ ኣምፅእዮ፤ ደጊም ኣይክነክአክን እዩ” በለ።

ንሳ ድማ “በይዛኻ፥ እቲ ፈዳዪ ደም ዝያዳ ደም ከየፍስስ፥ ወደይ ድማ ከይጠፍእ፥ ንጉስ ንኣቦኻ ይዘክር” በለት። ንሱ ኸዓ “ኣቦና ህያው እዩ፥ ካብ ፀጕሪ ርእሲ ወድኺ ሓንቲ እኳ ኣብ ምድሪ ኣይትወድቕን እያ” በለ። ^a

እታ ሰበይቲ ድማ “በይዛኻ፥ ኣነ ገረድካ ንጐይታይ ንጉስ ሓንቲ ቃል ክዛረብ” በለት። ንሱ ኸዓ “ተዛረቢ” በለ።

እታ ሰበይቲ ድማ ከምዙይ በለት፦ “እንታይ ደኣ ኣብ ልዕሊ ህዝቢ ኣቦና ከምዙይ ዝበለ ነገር ሓሲብካ? ንጉስ ነቲ ዝተሰጐ ናቱ ሰብ ስለ ዘይመለሶ፥ ከምዙይ ብምባል ንርእሱ ይዅንን ኣሎ። ብርግፅ ክንመውት ኢና፤ ከምቲ ኣብ ምድሪ ዝፈሰሰ፥ መሊሱ ኽእከብ ዘይኽእል ማይ ኢና። ኣቦና ግና ህይወት ኣይወስድን እዩ፤ እቲ ዝተሰጐ ኻብኡ ምእንቲ ኸይርሕቕ ደኣ፥ መገዲ ይሓስብ። ^b ሕዚ ኸዓ እቶም ህዝቢ ስለ ዘፍርሑኒ፥ እዙይ ንጐይታይ ንጉስ ክነግር መፂአ ኣለኹ። ኣነ ገረድካ ድማ ‘ንጉስ ክዛረቦ፤ ምናልባሽ ልመና ገረዱ ክገብረለይ ይኽእል’ ኢለ ሓሰብኩ። ምናልባሽ ንጉስ ክሰምዕ፥ ካብ ኢድ እቲ ንኣይን ንወደይን ካብ ርስቲ ኣቦና ከጥፍእ ዝደሊ ሰብ ድማ ንገረዱ ከድሕን ይኽእል እዩ።’” ኣነ ገረድካ ድማ ከምዙይ ኢለ ሓሰብኩ፦ “ጐይታይ ንጉስ ከምቲ መልኣኽ ኣቦና ፅቡቕን ክፉእን ዝፈሊ እዩ እሞ፥ ቃል ጐይታይ ንጉስ ዕረፍቲ የምፅአለይ። ኣቦኻ ድማ ምሳኻ ይኹን።”

ንጉስ ድማ ነታ ሰበይቲ “ዝሓተኩኺ ዝኾነ ነገር ኣይትሕብእለይ” በላ። ንሳ ኸዓ “ጐይታይ ንጉስ ይዛረብ” በለት።

ንጉስ ድማ “ኣብ ኵሉ እዙይዶ ኢድ ኢዮኣብ ኣላ?” ኢሉ ጠየቓ። እታ ሰበይቲ ኸዓ ከምዙይ ኢላ መለሰትሉ፦ “ኣታ ጐይታይ ንጉስ፥ ነፍስኻ ህያው እያ፥ ጐይታይ ንጉስ ካብ ዝበሎ ዝኾነ ነገር፥ ንየማን ኮነ ንፀጋም ዝዝንብል የለን። ባርያኻ ኢዮኣብ እዩ ዝኣዘዘኒ፤ ንሱ ኸዓ እዝ ኵሉ ቃላት ኣብ ኣፍ ገረድካ ኣንበሮ።

ባርያኻ ኢዮኣብ ነቲ ኩነታት ንምቕያር እዩ ከምዙይ ዝገበረ። ጐይታይ ግና ከምቲ መልኣኽ ኣቦና ጥበበኛ እዩ፤ ኣብ ምድሪ ዘሎ ዅሉ ድማ ይፈልጥ።”

ሽዑ ንጉስ ንኢዮኣብ “ሕራይ፥ ነዙይ ክገብሮ እየ፤ ኪድ፥ ነቲ መንእሰይ ኣቤሴሎም መሊስካ ኣምፅኣዮ” በሎ።

ኢዮኣብ ድማ ብገፁ ናብ ምድሪ ተደፊኡ ሰገደ፤ ንንጉስ ከዓ ባረኾ። “ኦ ጐይታይ ንጉስ፥ ንጉስ ልመና ባርያኡ ገይሩ እዩ እሞ፥ ባርያኻ ሎሚ ኣብ ቅድሜኻ ሞገስ ከም ዝረኸብኩ ፈሊጠ ኣለኹ” በለ።

ኢዮኣብ ድማ ተሲኡ ናብ ጌሹር ከደ፤ ንኣቤሴሎም ከዓ ናብ ኢየሩሳሌም መለሶ። ንጉስ ድማ “ናብ ገዛኡ ይኺድ እምበር፥ ገፀይ ኣይረአ” በለ። ኣቤሴሎም ከዓ ናብ ገዛኡ ኸደ፤ ገፅ ንጉስ ድማ ኣይረአየን። ኣብ ብዘላ እስራኤል፥ ከም ኣቤሴሎም ብፅባቐኡ ዝተደነቐ ሰብ ኣይነበረን፤ ካብ ከብዲ እግሩ ክሳዕ መንበስበስታ ርእሱ ጐደሎ ኣይነበሮን። ርእሱ ኽላፀ እንተሎ፥ ፀጕሪ ይኸብዶ ስለ ዝነበረ ዓመት ዓመት ይላፀ ነበረ፤ ነቲ ዝላፀዮ ፀጕሪ ርእሱ ድማ ይምዝኖ ነበረ፤ ብሚዛን ንጉስ ከዓ ኣስታት ክልተ ኪሎ ግራም ይኸውን ነበረ። ንኣቤሴሎም ድማ ሰለስተ ኣወዳትን ትዕማር ዝተባህለት ሓንቲ ጓልን ተወለዱሉ። ንሳ ኸዓ ፅብቕቲ ሰበይቲ ነበረት።

ኣቤሴሎም ድማ ገፅ ንጉስ እንተይረአየ፥ ኣብ ኢየሩሳሌም ክልተ ምሉእ ዓመት ተቐመጠ። ኣቤሴሎም ድማ ናብ ንጉስ ምእንቲ ኽልእኾ ኢሉ ንኢዮኣብ ለኣኸሉ፤ ኢዮኣብ ግና ናብኡ ክመፅእ ኣበየ። ካልኣይ ጊዜ መሊሱ ለኣኸሉ፤ ኢዮኣብ ግና ደጊምውን ክመፅእ ኣበየ። ኣቤሴሎም ድማ ንኣገልገልቱ “እንሆ፥ ግራት ኢዮኣብ ምስ ግራተይ ይዳወብ፥ ኣብኡ ኸዓ ስገም ኣለዎ፤ ኪዱ፥ ኣንድድዎ” በሎም። ሓሻኽር ኣቤሴሎም ከዓ ነታ ግራት ኣንደድዋ።

ኢዮኣብ ድማ ተሲኡ ናብ ገዛ ኣቤሴሎም ከደ፤ “ኣገልገልትኻ ስለ ምንታይ ንግራተይ ሓዊ ኣቃፀልዋ?” ኢሉ ኸዓ ጠየቖ።

ኣቤሴሎም ድማ ንኢዮኣብ ከምዙይ ኢሉ መለሰሉ፦ “‘ናብዙይ ንዓ፥ ንምንታይ ካብ ጌሹር ከም ዝመፃእኹ ንጉስ ክሓትተለይ ናባኻ ክልእኽ ደልየ ነይረ፤ ኣብኡ እንተ ዝተርፍ ምሓሸኒ ነይሩ’ ኢለ ናባኻ ለኣኽኩ። ሕዚ ኸዓ ገፅ ንጉስ ክርኢ ሕደገኒ፤ ገለ በደል እንተ ገይረ ድማ ይቕተለኒ።”

ኢዮኣብ ድማ ናብ ንጉስ ከይዱ ነገሮ። ንጉስ ከዓ ንኣቤሴሎም ፀውዖ፤ ንሱ ድማ ኣትዩ ኣብ ቅድሚኡ ብገፁ ናብ ምድሪ ተደፊኡ ሰገደ። ሽዑ ንጉስ ንኣቤሴሎም ሰዓሞ።