2 Samuel 14

14 ¹Chitharan Zeruiahwui nao Joabna awungawui ningli Absalomwuili vangaishunhaowa da theihaowa. ²Joabna Tekoali mi chihoda apam chiwui eina thangkhamei sha̱nao akhali khuivai. Ana ali hānga, "Chapkhangachā mi thāda sākhaninglu: chapngachāwui kachon sanglu, thao maneolu, kala kasāngkha zimiksho a kathiwui vang chapngachā kahai sha̱nao akha thāda sālu. ³Awungali vāda tui hi ali hānglu." Kala Joabna tui chi awui khamorli thāmi.

⁴Tekoawui sha̱nao chi awungali rāda, ngaleili mai mashunzangda khoruma, kala hānga, "O awunga, ngachonmilu!"

⁵Awungana ali ngahāna, "Naning khi chotlakhaoda?" Ana hānga, "I ra̱meinaona; igahara thihaira.

⁶Narao iwui naomayara khani leisai. Athum luili shokngarara, athumli kānthui khipānakha maleimana, kala akhana akhali shaothata. ⁷Ara shimkhur katonga narao ili mai ngakarhaira, hithāda hānga, 'Achinā shaothat kahai mi chi horsanglu; ithumna achinā shaothat kahaiwui vang alila shaothatra, kala shimluikatpalila sāshimānra.' Chithāda ngaleitungli igaharawui aming maningakha ara̱-azā akhala mavai khavai, athumna iwui naomeikapta mei chi mit ngasak khavai ningchang."

⁸Awungana sha̱nao chili hānga, "Shimli ungulu, kala ina nawui vang kaso sāmira."

⁹Tekoawui sha̱nao chi awungali hānga, "Iwui amei awunga, khayonkhamāng chi ili kala iwui avāva̱wui shimli leiranu; awunga kala awui wungpamkhong khayon makhalei ngasāranu."

¹⁰Awungana hānga, "Kachikathāna nali hānga china, ili rāhorlu; ana nali masingluimara."

¹¹Ana hānga, "Asheewui athut khuiki kajipana ashee lāng matākhavai kala iwui naomayara mashimān khavai, awungana nawui Avāli phaningunglu." Ana hānga, "Ithumwui Avā kharinga da, nawui naomayarawui kuisam akha eina tangda ngaleili mapitāmara." ^a a v11 Asheewui athut khuiki kajipa chi, shimlak mi akha shaokathata mili sāthat khavai kharāk eina mikahai achinā mina.

¹²Sha̱nao chi hānga, "Narao ina iwui amei awungali tui akha hāngmi khavai kapona." Ana hānga, "Hānglu."

¹³Sha̱nao chi hānga, "Chithākha khisāda nana ithumwui Avāwui mibingtungli hi khangarān sāhaokhala? Hi kahāng eina, awungana khalattali yonngasaka, kaja awui kasham kahai mi chi khuiungmiluimana. ¹⁴Ngaleili tāngasak tara̱ lāng kazipkhui makhavai thāda, ithum kachangkhat thira. Kha ithumwui Avāna mirin makhuimana; ana kasham kahaibing awui eina makatathui khavai apong khangarān mi. ^b b v14 Apam hilila, ithumwui Avā chi kharing khui mahutli banikahai mi chi shimli latung khavai apong khangarān kasā thāda chitheihaira—bani kahai kachiva̱li awui eina rāhorluikhavai phāzata chikathā ning chitākamna. ¹⁵Ara ina iwui amei awungali hi hāngmi khavai raihaira, kaja mibingna ili ngachee ngasaka. Narao ina phaninga: Ina awungali hāngsi; awungana narao iwui pokhangai mayāmipaira. ¹⁶Awungana nganāda, ili kala iwui naomayara khanini chi ithumwui Avāwui shimluiwui eina katattā ngasak khavai kasā mipa akhawui pangwui eina, rao ili kanshokmira.'" ¹⁷Narao ina phaninga: "Iwui amei awungawui tuina ning mathān ngasakranu, kaja iwui amei awunga chi shiya kajila phāya kajila theishingkakhui ithumwui Avāwui kazingrao kathāna. Nawui Avā nali ngasomiranu."

¹⁸Awungana preiva̱ chili hānga, "Ina nali ngahānkahai ot akhanidala iwui eina mathummihaialu." Preiva̱ china hānga, "Iwui proho awunga hāngranu."

¹⁹Awungana ngahāna, "Saikora hi Joabwui pāng khanukli leila?" Preiva̱ china ngahānkai, "Iwui proho awunga, na ringda lei kajina, iwui proho awungana hāngkahai ot akhanidawui eina khipānakha yāshongla uishongla makārsangphapaira. Nawui rao Joabna ili kasoi; narao iwui khamorli tui saikora hi sangmi.

²⁰Ot kakhalat chi ngachei khavai narao Joabna hi sai. Kha iwui proho hiya ithumwui Avāwui kazingrao kathāna thangkhamana, ngaleili khalei ot saikora chi theikahaina."

²¹Chieina awungana Joabli hānga, "Ka̱lā mahai, ina hi sāra. Vālu, yaronnao Absalomli khuiunghaolu."

²²Joabna ngaleili mai mashunzangda khorumhaowa, kala awungali somi. "Aja narao ina thei, iwui proho awunga, ina nawui mikli ngahānkhangai mi ngasāhaira," da ana hānga, "kaja awungana awui raowui pokhangai chi mihaira."

²³Chieina Joabna ngakarthuida Geshurli vāhaowa, kala Absalomli Jerusalemli khuiungrāhaowa. ²⁴Awungana hānga, "Ana awui shimli latungra, kha iwui mai matheiranu." Chithāda Absalomna awui shimli unghaida awungawui mai matheithuwa. ²⁵Israel saikorali Absalom thai khamathāwui vang sochikatpa mikumo maleimana; awui pheimayā eina thuilaga kuitungli shangshungda, awuili khavāt maleimana. ²⁶Awui kuisam kuili ritlak ngasak tharan a kumkhali akui shaokhui. Akui shaomi tharan awui kuisam chi khān, awungawui chākwui athishurda kharit pound phangā sha̱khana. ²⁷Absalomli naomayara kathum pharāmi, kala naongalāva̱ akha, aming Tamar hoi. Ava khamathā kachangkhata sha̱nao akhana.

²⁸Absalomna Jerusalemli zingkum khani katonga apamhaowa, kala awungawui mai matheimana. ²⁹Absalomna Joabli awungawui mangāli awui vang ngacham khavai chihovai, kha Joabna awuili rāvai mamayāthuwa. Ana kakhane chihovāluishita, kha Joabna aruila rāvai mamayāthuwa. ³⁰Absalomna awui raobingli hānga, "Yanglu, Joabwui lam iwui lamwui ngalemli lei, kala chili awui yaoyi lei. Vālaga chi mei eina riktāhaolu." Chithāda Absalomwui raobingna lam chi mei eina riktāhaowa.

³¹Joabna ngakarthuida Absalomwui shimli vāda hānga, "Khisāda nawui raobingna iwui lam mei eina sa̱thathaokhala?"

³²Absalomna Joabli ngahānkai, "Ina nali pao chihovai: 'Hili rālu, chithākha khisāda ina Geshurwui eina rāhaokhala da awungali ngahān khavai ina nali chihovāra; chili apamsanga leiakha phamei.' Ara ina awungawui mai theisangngasaklu; kalikhada iwui morei akhanida leiakha, ana ili shaothatharanu."

³³Joabna awungawuili vāda ali unghānga. Awungana Absalomli hokhui, kala ana kārāda awungawui mangāli ngaleili mai mashunzangda khayākashi mi. Chieina awungana Absalomli maya̱ya.