Koweekta Joab Absalom Jerusalem
Ki iyookto Joab kwondo age ne po Tekoa ak ng'olyoo ne utaat agobo weeriit ne ki bar tupchennyi, kosoomei laitoryat kobwaate Kwandanyi ak kolewen keweekyi kaa ne ki kioon. Ki weeksei Absalom ago ma kogeerchi togeetap laitoryat kenyiisyek aeng', agoi kobeel mbareetap sairigap Joab.
14 1Nguno ko konai Joab weeriitap Zeruiah kole kimach muguleldap laitoryat Absalom. 2Ki iyookto Joab Tekoa ak koip kwondo age ne utaat eng' olooto. Koleenji, “Isoom iyaigei iigei chii ne tei: ilaach kilo che po kateiyet, amat inde mwaita, ak iyaigei ko uu kwondo ne kagoriirchi chii ne kome peetuusyek che chaang'. 3Iwe ole mi laitoryat ak imwachi ng'aleechu.” Ki inde Joab ng'aleechooto kutit.
4Ki nyo kwondap Tekoa ole mi laitoryat, ak kong'uruuk kot koit ng'wony togeennyi ak kogutung'ji, ak kole, “Toreto, laitoryat!”
5Ki teebee laitoryat koleenji, “Nee ne yaamaat?” Kole, “Anee ko kwondo ne kaame; kagome manong'otyonnyu.
6Ki tinye otwogindeng'ung' weeriik aeng'. Ki pirgei eng' mbareet, ma mi chii ne saaei icheek, ak kobar age ne age. 7Ki ng'eetyo ooreet komugul agaigai otwogindeng'ung', kole, ‘Igoochech chiito ne kiga kobar tupchennyi; kibar agobo saboondap tupchennyi ne ki kobar, ak keng'em namindet kityo.’ Machei koibutyi maadanyu ne ng'etyi agenge, kot koma kobagakyi manong'otyonnyu kainet anan ne ng'et eng' ng'wony.”
8Koleenji laitoryat kwondo, “Togoste ui kaa, ago agoonu ng'atuutyet agobo inyee.”
9Koleenji kwondap Tekoa laitoryat, “Kiptaiyandennyu laitoryat, ingomi tengek eng' anee ak eng' kootap kwandanyu; ingoek laitoryat ak ng'echerennyi che ma tinyei tengek.”
10Kole laitoryat, “Age tugul ne ng'alaalun, iibu ole ami—ma konyonjin kogeny.”
11Kole, “Isoom ingoiburu laitoryat Kwandang'ung', si matun kotesak yaaktaindetap korotiik kobar kogeny, ak si matun keng'em weeriinnyu.” Kole, “Ko uu ye sabei Kwandanyo, ma kobutyin eng' ng'wony agot suumeek agenge ne po metitap weeriing'ung'.” a a v11 Yaaktaindetap korotiik ko ki chiitap oret ne ki tinyei boisyet ne po kaataam kobar rumiindet ne kiga kobar chiitap koonnyi.
12Kole kwondo, “Isoom ingong'alaalji otwogindeng'ung' ng'olyoo agenge kiptaiyandennyu laitoryat.” Kole, “Ng'alaal.”
13Kole kwondo, “Amu nee anyun si ibwaat niito agaigai piigap Kwandanyo? Eng' mwaetap niito, igikyin laitoryat ineegei, amu ma koweekta ineendet ne ki kiisto. 14Kebegu kiy agobo tugul, ko uu peek che kimandae ng'wony che ma kimuuchi keyoktaige kogeny. Ago ma iip Kwandanyo saboondo—ibwaati ortinwek si matun koter ne ki kiisto kobun ineendet. b b v14 Agoi yu, kaboorunot Kwandanyo kochobei ortinwek koweekta ne ki kiisto kaa koma koip saboondo — muguleldo ne kergei ne osup chii age tugul ne ki kiisto koweek ole mi ineendet. 15Nguno kanyo amwachi niito kiptaiyandennyu laitoryat amu ki ichutch itit piik. Ki bwaatei otwogindeng'ung' ale: Ang'alaalji laitoryat; tamangap kochamji soometap otwogindennyi. 16Tamangap kogas laitoryat ak kosar otwogindennyi eng' eutap chiito ne machei koing'et anee ak weeriinnyu eng' poroteetap Kwandanyo.’” 17Ki bwaatei otwogindeng'ung' ale: “Ingoitu ng'olyootap kiptaiyandennyu laitoryat kamuung'et, amu kiptaiyandennyu laitoryat ko uu malaikaiyatap Kwandanyo, ne kobiit abesyo ne myee ak ne ya. Ingotep Kwandang'ung' kobooten.”
18Koleenji laitoryat kwondo, “Amat iung'ak eng' anee kiy age tugul ne ateebee.” Kole, “Ingong'alaal kiptaiyandennyu laitoryat.”
19Ki teebee laitoryat koleenji, “Tos mi eutap Joab eng' let po tuguuchu tugul?” Kowol kwondo kole, “Ko uu ye isabe, kiptaiyandennyu laitoryat, ma mi chii ne imuuchi koweeksei eutap tai anan eutap kaataam eng' kiy age tugul ne kagomwa kiptaiyandennyu laitoryat. Ki ang'at otwogindeng'ung' Joab; ki inde ng'aleechu tugul kutitap otwogindeng'ung'.
20Ki yai niito otwogindeng'ung' Joab si kowal ko uu borunetap tuguuk. Ago utaat kiptaiyandennyu ko uu malaikaiyatap Kwandanyo, ne ngen tugul che mi emet.”
21Yeityo koleenji laitoryat Joab, “Komyee, ayaei niito. Ui, iweekyi murenyonindet Absalom.”
22Ki ng'uruuk Joab kot koit ng'wony togeennyi, ak kogutung'ji, ak koberuur laitoryat. Kole, “Rani ngen otwogindeng'ung' kole kaanyooru chamyet eng' taing'ung', kiptaiyandennyu laitoryat, amu kagochamji laitoryat soometap otwogindennyi.”
23Ki ng'eet anyun Joab kwo Gesur ak koweekta Absalom Jerusalem. 24Kole laitoryat, “Ingowo koonnyi, ago amat koger tainnyu.” Ki we anyun Absalom koonnyi ak koma koger taitap laitoryat. 25Ma mi chii eng' Israel komugul ne ki kochoi agobo korooronindo ko uu Absalom; kobooch keldebesyet agoi metit parak, ma mi ineendet ne ma libwoop. 26Ye kochoogu metinnyi—kochoogei kenyiit age tugul, amu kinyigiisen—koweigei suumeek che po metinnyi: ne weigei ko uu paundisyek muut eng' kereetap laitornatet. 27Ki kisich Absalom weeriik somok, ak chepto age ne kigoguure Tamar. Ki kwondo ne karaaran.
28Ki meny Absalom Jerusalem kenyiisyek aeng' kowolu ak koma koger taitap laitoryat. 29Ki iyookto Absalom koguur Joab, si kosaaei agobo ineendet eng' taitap laitoryat, ago ma chamei Joab konyo ole mi. Koyookto kora konyil ne po aeng', ago ma chamei Joab konyo kogeny. 30Koleenji Absalom otwogikyik, “Keero, itoorchingei mbareetap Joab mbareennyu, ak mi baale eng' olooto. Owe, obeel.” Ki beel otwogigap Absalom mbareet.
31Ki ng'eet Joab kwo kootap Absalom, ak koteebee, “Amu nee si kobeelji otwogiguk mbareennyu maat?”
32Kowolji Absalom Joab kole, “Ki ayookten ng'olyoo ale: ‘Nyoo yu, si aiyokten iteebe laitoryat amu nee si kanyo eng' Gesur—nda komyee atebi olooto.’ Nguno ageer taitap laitoryat; ngot atinye tengek eng' kiy age tugul, ingobara.”
33Ki we Joab ole mi laitoryat ak komwachi. Ki guur laitoryat Absalom, ne ki nyo ak kogutung'ji togeennyi ng'wony eng' taitap laitoryat. Yeityo komoot laitoryat Absalom.