Kichoor Absalom Mugulelwegap Israel
Kotonone Absalom eng' kurgeet, koleenji chii age tugul ne tinye tiyet kole ma mi ne kogasyin, ak kochoor mugulelwegap Israel. Kingo kiito laitoryat eng' Hebron, koyookto Daudi komwee kota ma tinye kwenutik eng' keldoyek, kong'eetyee Tulweetap Oliik. Koweekyi Daudi moinget koba, ak kosoom Kwandanyo si kowech ng'alaalutyetap Ahitopel.
15 1Yeityo kochopchigei Absalom kariit ak paraisisyek, ak murenik konom che korwai kondoe ineendet. 2Ng'eetei Absalom karon ak kotonone ole neegit ooreet ne itei kurgeet. Ye konyo chii age tugul ne tinye tiyet koba laitoryat si korwoogot, koguure Absalom koleenji, “Ii po nganaseet ne ano inyee?” Kowolji chiichooto koleenji, “Aa otwogindeng'ung' po age eng' ortinwegap Israel.”
3Yeityo komwachi Absalom koleenji, “Keero, karaaran ng'aleeguk ak imanda, ago ma kiit laitoryat chiito age ne kogasyin.” 4Komwa kora Absalom kole, “Ngot akiiti kirwoogindet eng' emet! Konyoonjo chii age tugul ne tinye tiyet anan kirwooget, ak arwookyi imanda.” 5Ye konyoonjo chii age tugul si kogutung'ji ineendet, koriipto Absalom eunnyi ak konam ineendet ak komwoti. 6Kiyai Absalom niito piigap Israel tugul che konyoonji laitoryat si korwoogot, ak kichoor amu nooto mugulelwegap Israel.
7Ye kingo siir kenyiisyek ang'wan, komwachi Absalom laitoryat koleenji, “Asaain amwa awendi Hebron si ayai kayasyoet ne ka ayasyo Kwandanyo. 8Amu ye kita amenye Gesur eng' Aram, kaayasyo kole, ‘Ngot koweektowo Kwandanyo Jerusalem, ko atoreti ineendet.’”
9Komwachi laitoryat ineendet koleenji, “Ui eng' kaalyeet.” Kong'eet anyun Absalom kwo Hebron.
10Ki yookto Absalom piik che ibei ng'aleek koitabaan eng' ortinwegap Israel tugul, koleenji, “Ye ogas iryageet, omwa ole, ‘Kagolaitoran Absalom eng' Hebron!’”
11Ki wo piik pogol aeng' kobooto Absalom che ki kiguur eng' Jerusalem, eng' tiliilindo, ama ngen kiy age tugul agobo ng'olyoonooto. 12Ye kita kobeel Absalom tiseiywek, koyookto chii kwo Gilo koguur Ahitopel Gilonindet, kaneetindetap Daudi. Ki nyiigu chopsanooto, ak ki tesak piik che isupchini Absalom.
Kimwei Daudi eng' Weeriinnyi Absalom
13Konyo sendimita koleenji Daudi, “Kagoweek mugulelwegap piigap Israel ole mi Absalom.”
14Komwachi Daudi otwogik tugul che ki mi ak ineendet eng' Jerusalem koleenji, “Ong'eet! Nyolu kemwei, amu ngo ma uu nooto, ko ma kochilil agot agenge eng' echeek eng' Absalom. Ochakte, amu kobiit konam echeek soon, ak koipchech yaityet, ak kobar nganaseet eng' rotweet.”
15Kowolji otwogigap laitoryat ineendet koleenji, “Kiy age tugul ne ilewen kiptaiyandennyu laitoryat, ko kotegei otwogiguk.”
16Komanda anyun laitoryat, koisupchini koonnyi komugul, ago ki pagaakta chebaigeinik taman si koriip kap laitoryat. a a v16 Chebaigeinik ko ki osotik che po aeng', che ma tinye kimnatet ne kergei ak osootiot ne po tai. 17Komanda laitoryat, koisupchini piik tugul, ak ki tononchigei eng' koot ne let. 18Ki siirtoi otwogikyik tugul ole neegit ineendet, kobooto Keretik tugul ak Peletik; ak Gitik tugul pogol lo che ki isup ineendet kobun Gath, ki siirtoi eng' taitap laitoryat. b b v18 Keretik ak Peletik ko ki lugeetap riibotik che ki po Daudi ineegei, che ki nyigoonen.
19Komwachi laitoryat Itai Gitindet koleenji, “Amu nee si inyoo ak echeek agine? Weege imenye ak laitoryat ne leel; ii toondet, ak chii ne kagimut ne loo kobun emeng'ung'. 20Kinyonu amut agenge. Myee agoonin imoong'wu kobooto echeek rani, ye ma angen ole awendi? Weege, iib tupchoguk kobootok. Ingoboorun Kwandanyo rireenet ak imanit.”
21Kowolji Itai laitoryat koleenji, “Ko uu ye sabei Kwandanyo, ak kosabei kiptaiyandennyu laitoryat, ole mi kiptaiyandennyu laitoryat tugul, ngo saboon anan meet, ko mi yooto otwogindeng'ung'.”
22Komwachi Daudi Itai koleenji, “Ui, ilanda.” Kilandae anyun Itai Gitindet kobooto piiguk tugul ak lagok tugul che ki mi ak ineendet. 23Ki riir emet komugul eng' kutit ne oo, ye kilandae piik tugul. Kilandae laitoryat kererutap Kidron, ak kilandae piik tugul koba surkwen. 24Ki mi yooto Zadok agine, kobooto Lewiik tugul che ki ibei moingetap arorutyetap Kwandanyo. Ki inde ng'wony moingetap Kwandanyo, ak kobeel Abiathar tiseiywek agoi kobata piik tugul komong' saang' eng' nganaseet. 25Komwachi laitoryat Zadok koleenji, “Wektoi moingetap Kwandanyo nganaseet. Ngot kobaibai Kwandanyo agobo anee, ko koweektowo ak koyachi ageere ineendet ak ole menyei agine. 26Ago ngo kole, ‘Ma aboiboigei agobo inyee,’ koanee yu—ingoyaiywo ko uu ne keerei ineendet.” 27Komwachi kora laitoryat Zadok tisiindet koleenji, “Mo ii keerindet inyee? Weege nganaseet eng' kaalyeet, ak iib weeriiguk aeng' kobootok—Ahimaaz weeriing'ung' ak Jonathan weeriitap Abiathar. 28Ariibe eng' olande ne po surkwen, agoi konyoonjo ng'olyoo kobun inyee si kimwaiwo.” 29Ki wektoi Zadok ak Abiathar moingetap Kwandanyo Jerusalem, ak ki tebee yooto.
30Ki togosta Daudi tulweetap Mseituni, koriir ye kita kotogostoi, kotuch metinnyi ak koboochin keelyekyik. Ki tuch piik tugul che ki mi ak ineendet metowekwak ak kotogosta, koriir ye kibendi. c c v30 Laitoryat ne ki kileelji, ne riirei ye togostoi tulweetap Mseituni, ko koboori Jeso, ne ki landa kererutni age koigeny ne let, ak ki ngwoni eng' tulweetni age eng' kemeut ne ki leelji chorweennyi ne ki igenchini.
31Ki kimwachi Daudi koleenji, “Ki mi Ahitopel kwenutap piik che chopchini Absalom.” Ki saaei Daudi kole, “Kwandanyo, wektoi ng'olyootap Ahitopel koek abusnateet.”
32Ye kingo it Daudi tulweet parak, ole kigutung'jini Kwandanyo, ki tuiyo ak ineendet Hushai Arkindet, koracharat ngoroindanyi ak komi suumeek eng' metinnyi. 33Komwachi Daudi ineendet koleenji, “Ngot inyone ak anee, ko iek nyigiisindo kwenunnyo.”
34Ago ngo iweege nganaseet ak imwachi Absalom ile, ‘Aek otwogindeng'ung', laitoryandennyu; ko uu ye ki atoreti kwandang'ung' eng' tai, ara atoretiin nguno inyee,’ ko imuuchi anyun iundowo ng'olyootap Ahitopel. 35Ki mi yooto Zadok ak Abiathar tisiik kobootok. Imwachi icheek tuguuk tugul che igas eng' kap laitoryat. 36Ki mi yooto weeriikwak aeng' kobooto icheek—Ahimaaz weeriitap Zadok ak Jonathan weeriitap Abiathar. Yookwo ng'olyoo kobun icheek po tuguuk tugul che igas.
37Konyo anyun Hushai, chorweetap Daudi, nganaseet, ye kita kochut Absalom Jerusalem.