Abisalomu Aba Mitima ya Izarayeli

Abisalomu aima pa nsuwo wa nzinda mbapanga munthu onsene adabwera na mulandu kuti nkhabe munthu anadzambva, mbaba mitima ya Izarayeli. Pidaikhwa iye mambo ku Hebhroni, athawisa Dhavidhi, adakwira paphiri ya Mizeituni mwakukhonda kubvala nsapato. Dhavidhi abwezera Bokosi mbaphemba Baba wathu kuti asanduze uphungu wa Ahitofeli kukhala upusa.

Kapitulu 15.

Mukupita kwa n'dzidzi, Abisalomu akwata ngolo na makavalo, pabodzi na amuna makumi maxanu toera kuthamanga patsogolo pace. Abisalomu akhalamuka mancibese mbaima n'khundu mwa njira yakuenda pa nsuwo. N'dzidzi onsene munthu akhabwera na nseru wace kuna mambo toera kutongwa, Abisalomu akhancemera: “Iwe ndiwe wa nzinda upi?” Munthu akhatawira: “Ntumiki wanu ndine wa dzindza ibodzi ya Izarayeli.”

Penepo Abisalomu akhampanga: “Ona, maseru ako ndi adidi na akulungama, mbwenye mambo nkhabe kusankhula munthu toera kukubvesera.” Abisalomu akhathimiza: “Mbenga ine ndikhadasankhulwa kukhala ntongi m'dziko muno! Munthu onsene ali na nseru peno mulandu mbadabwera kuna ine, ine mbandampasa cilungamo cace.” N'dzidzi onsene munthu akhafika dhuzi toera kungodama pamaso pace, Abisalomu akhafuthula djanja yace, mbamphata, mbampsompsona. Abisalomu akhacita tenepa kuna Muizarayeli onsene akhabwera kuna mambo toera kutongwa, na tenepo aba mitima ya Izarayeli.

Pakupita pyaka pinai, Abisalomu apanga mambo: “Ndaphata miyendo, ndisiyeni ndiende ku Hebroni toera kukwanirisa nendza idacita ine kuna Baba wathu. Thangwi mu n'dzidzi udakhala ine ku Geshuri mu Arami, ine ndacita nendza: ‘Baba wathu angandibwezera ku Yerusalemu, ine ndinaalambira.’”

Mambo ampanga: “Ndoko mu ntendere.” Na tenepo Abisalomu alamuka mbaenda ku Hebroni.

Abisalomu atuma amithenga mwacibisobiso m'madzindza onsene a Izarayeli: “Mungabva kulira kwa nyanga, longani: ‘Abisalomu asatonga ku Hebroni!’”

Amuna 200 akucemerwa kubuluka ku Yerusalemu aenda pabodzi na Abisalomu mwakusowa kuipa kwa ntima, mbakhonda kudziwa cinthu cibodzi thangwi ya cakulinga ceneci. Mu n'dzidzi ukhapereka Abisalomu ntsembe, atuma anthu ku Giloni toera kucemera Ahitofeli Mugiloni, nyakupanga uphungu wa Dhavidhi. Kuphatana kuneku kwawanga kakamwe, na anthu akhantowera Abisalomu akhathimizirika.

Dhavidhi Athawa Mwanace Abisalomu

Nthenga abwera kuna Dhavidhi: “Mitima ya anthu a Izarayeli yaenda kuna Abisalomu.”

Dhavidhi apanga atumiki onsene akhali na iye ku Yerusalemu: “Lamukani! Tisafunika kuthawa, ca kusowa tenepo nkhabe m'bodzi wa ife anapulumuka kuna Abisalomu. Cimbizani, ca kusowa tenepo iye anatigwata mwakucimbiza, mbatifudza, mbamenya nzinda na supada.”

Atumiki a mambo antawira: “Cinthu consene canasankhula mbuya wanga mambo, atumiki wanu ali dzololo.”

Na tenepo mambo abuluka, banja yace yonsene mbikhantowera, mbwenye asiya akazi ang'ono khumi toera kuonera nyumba yaumambo. ^a Mambo abuluka, anthu onsene mbakhantowera, mbalimira pa nyumba yakumalisa. Atumiki ace onsene apita n'khundu mwace, pabodzi na Akerethi na Apelethi onsene; na Agiti 600 onsene adamutowera kubuluka ku Gati afamba patsogolo pa mambo. ^b

Mambo apanga Itai Mugiti: “Thangwi yanji usafunambo kudza na ife? Bwerera mbukhala na mambo wapsa; iwe ndiwe mulendo, wakuthamangiswa kutali na dziko yako yakubalwa. Iwe wabwera dzulo basi. Kodi ndikucitise kuzungira na ife lero, mu n'dzidzi unakhonda ine kudziwa kunaenda ine? Bwerera, kwata abale ako mbaenda na iwe. Baba wathu akupangize kufuna kwa cibverano na kukhulupirika.”

Itai atawira mambo: “Ninga Baba wathu ali maso, na mbuya wanga mambo ali maso, konsene kunakhala mbuya wanga mambo, mu umaso peno mu kufa, kweneko ndiko kunakhala ntumiki wanu.”

Dhavidhi apanga Itai: “Ndoko, wambuke.” Na tenepo Itai Mugiti awambuka pabodzi na amuna ace onsene na anang'ono onsene akhali na iye. Dziko yonsene yalira na fala ikulu mu n'dzidzi ukhawambuka anthu onsene. Mambo awambuka khwewe ya Kidroni, na anthu onsene awambuka mbazselekera ku thando. Zadoki akhalipombo, pabodzi na Alevi onsene akhathukula bokosi ya cibverano ca Baba wathu. Aikha pantsi bokosi ya Baba wathu, na Abiatari apereka ntsembe mpaka anthu onsene amala kubuluka mu nzinda. Mambo apanga Zadoki: “Bwezera bokosi ya Baba wathu mu nzinda. Baba wathu angakomerwa na ine, Iye anandibwezera mbandindiona pontho iyo na mbuto inakhala Iye. Mbwenye angalonga: ‘Ine nkhabe kukomerwa na iwe,’ ndiri pano—mbacite kuna ine ninga mwakufunira Iye.” Mambo apangambo Zadoki nyantsembe: “Kodi iwe nkhabe kukhala muoni? Bwerera mu nzinda mu ntendere, mbukwata anang'ono ako awiri—Ahimaazi mwanako na Yonatani mwana wa Abiatari. Ine ndinadikhira pa mbuto zakuwambukira za ku thando mpaka mafala abwere kubuluka kuna iwe toera kundidziwisa.” Na tenepo Zadoki na Abiatari abwezera bokosi ya Baba wathu ku Yerusalemu mbakhala kweneko.

Dhavidhi akwira paphiri ya Mizeituni, mbalira mukukwira kwace, nsolo wace mbukhali wakuphimbira na miyendo yakukhonda kubvala. Anthu onsene akhali na iye aphimbira misolo yawo mbakwira, mbalira mukuenda kwawo. ^c

Dhavidhi apangwa: “Ahitofeli ali pakati pa anthu adaphatana na Abisalomu.” Na tenepo Dhavidhi aphembera: “Baba wathu, sandukisani uphungu wa Ahitofeli ukhale upswiru.”

Dhavidhi pidafika iye pa nsonga ya phiri, pa mbuto pakhalambirwa Baba wathu, Hushai Muariki akhalipo toera kun'gumanika, nguwo yace mbikhali yakupanduka na pfumbi pa nsolo pace. Dhavidhi ampanga: “Ungaenda na ine, iwe unakhala ntolo basi kuna ine.”

Mbwenye ungabwerera mu nzinda mbupanga Abisalomu: ‘Ine ndinakhala ntumiki wanu, mambo wanga; ninga ndakhatumikira baba wanu kale, tenepa cincino ndinakutumikirani,’ penepo iwe unakwanisa kufudza uphungu wa Ahitofeli thangwi ya ine. Zadoki na Abiatari, anyantsembe, ali na iwe kweneko. Apange pinthu pyonsene pinabva iwe mu nyumba ya mambo. Anang'ono awo awiri ali na iwo kweneko—Ahimaazi mwana wa Zadoki na Yonatani mwana wa Abiatari. Nditumizire mafala kubulukira kuna iwo a pinthu pyonsene pinabva iwe.

Na tenepo Hushai, xamwali wa Dhavidhi, apita mu nzinda n'dzidzi ubodzi ene ukhapita Abisalomu mu Yerusalemu.