2 Samuel 15

15 ¹Chiwui thili, Absalomna khalattawui vang siguigari kala sigui, kala awui rida vākhavai mi hangphangā khuiya. ²Absalomna ngathorthak thuida ngaveishong shongfa peili nganinga. Kachikathā reimei kahai mi akhana awungali bichar sākhavai rāki tharan, Absalomna vaoda hānga, "Na kachiwui keinung eina rā?" Mipā china ngahānkai, "Narao hi Israelwui shang akhawui eina rā."

³Chieina Absalomna ali hānga, "Yanglu, nawui kahāng chi khamahai kala khamashung, kha awungana na kahāng nganākhavai mi khipākha makapangkhuimana." ⁴Absalomna hānglui, "Ngalei hili ina bichar kasā sākhavai pangkhuiakha kaje! Reimei nilala tuingaphun kahai mi kachiva̱ iwuili rāsi ngayia, kala ina ali mashun mira." ⁵Kachikathā mi akhana awui mangāli seihā sākhavai nganaimeida rāki tharan, Absalomna apāng khangkāda ali tukkhuilaga amaya̱ya. ⁶Awungali bichar sākhavai kharā Israelwui mi kachiva̱li Absalomna hithāda sai. Chithāda sāda ana Israelwui ning liphunghaowa.

⁷Zingkum mati khaleilaga, Absalomna awungali hānga, "Ina ithumwui Avāli sākahai khangashit chi khuikhavai, lumashanda ili Hebronli vākhavai phāmilu. ⁸Kaja Aramwui Geshurli apamlakha ina khangashit akha sāda hānga: 'Ithumwui Avāna ili Jerusalemli thānungmiakha, ina ali khorumra.'"

⁹Awungana ali hānga, "Chingri kahaida vālu." Chieina Absalomna ngakarthuida Hebronli vai.

¹⁰Absalomna Israelwui shang saikorali ngathumda paomebing chihovāda hānga: "Nathumna talla̱khon kashā tharan, hānglu, 'Absalomna Hebronli munga!'"

¹¹Jerusalemwui eina hokahai mi shākhani Absalomli ngasoda vāhaowa. Athumna makaphā khangarān chiwui pongli khikha matheimana. ¹²Absalomna pha̱kaphayā chigatlaga, ana Davidwui ngakuime Gilopa Ahithophelli Gilohwui eina ahokhui. Mithit khalentui china yāng kāhaowa, kala Absalomli shurkazata mibing mataisangzata.

Davidna Anaomayara Absalomwui Eina Yāmhaowa

¹³Paome akhana Davidli rāhānga: "Israelwui ning Absalomshong thuihaira."

¹⁴Davidna Jerusalemli ngasokasā awui rao saikorali hānga, "Ngakarthuilu! Ithum yāmra; maningakha ithumwui khipākha Absalomwui eina malatshokluimara. Thākta zatlu; maningakha ana kashap eina ithumli tukkhuira, ithumli shimān ngasakra, kala keinung chi raighai eina sāthatra."

¹⁵Awungawui raobingna ali ngahānkai, "Iwui proho awungana ningkachāng athishurda, naraobing hi ngarānhaira."

¹⁶Chieina awungana shokta vai, kala awui shimkhur saikorana ali shurda zata; kha konung yangkhavai angashirva̱ tharā horhaowa. ^a a v16 Angashirva̱ hi khare preiva̱ khamena mashun kateokha khuiwui kakhane preiva̱ ngarāna. ¹⁷Awungana zatphoka, mi saikorana ali shurda zata, kala athumna shim khanaowa chili ngasāmhaowa. ¹⁸Cherethnaobing eina Pelethnaobing saikorala ngasoda, awui rao saikorana awui shakhali kānkāhaowa; kala Gathwui eina ali shurraikahai Gitpa shātharuk saikorana awungawui mangāli zata. ^b b v18 Cherethnaobing eina Pelethnaobing hina Davidwui khalattawui makārmi raimi kharei kaphābingna.

¹⁹Awungana Gitpa Ittaili hānga, "Khisāda nala ithumli ngasoda vākhala? Latungda awunga kadhar chila ngasopamlu; na ramkazata, nawui pamkhavai eina katāli raithā kahai mina. ²⁰Na ayāmāng rākahaina. Chithākha I shongfa vāki chila matheila leilakha, aja ina nali ithumli ngasoda kuimareida khazatmira? Latunglu, nagatobing nala thānphunglu. Ithumwui Avāna nali makhangachei leikashi eina ningkatong chitheimiranu."

²¹Ittaina awungali ngahānkai, "Ithumwui Avā kharinga kala amei awunga kharinga, amei awunga khaleipam kachili, kharingliranu kathiliranu, chili nawui rao leira."

²²Davidna Ittaili hānga, "Vālu, makānlu." Chieina Gitpa Ittaina awui mi saikora kala ali ngasokapam naoshinao saikora ngasoda makānkai. ²³Mi saikora makānmamānda, ngalei katonga panglāk eina chapa. Awungana Kidron kong makānkai, kala mi saikora lamhāngshong makānkai. ²⁴Zadokla ithumwui Avāwui tuingashit oko phungkazata Levinaobing saikora ngasoda chili rāhaowa. Athumna ithumwui Avāwui oko chi hai, kala mi saikora keinung chiwui eina kharāchang kahaiwui eina tangda Abiatharna pha̱kaphayā chigata. ²⁵Awungana Zadokli hānga, "Ithumwui Avāwui oko chi keinung chili khuiluishitlu. Ithumwui Avāna ili ningyāng ungakha, ana ili khuilatungmira, kala oko chila awui khaleipam ili theingasakluishitra. ²⁶Kha ana, 'Ina nali ningyāng maungmana,' da hāngakha, yanglu, i hili lei; awui ningkachāng athishurda ili sāranu." ²⁷Awungana pāngmon Zadokli hānglui, "Na marān maningmala? Chingri kahai eina keinung chili latunglu, kala nawui naomayara khani, nawui nao Ahima-az kala Abiatharwui nao Jonathan, nala thānphunglu. ²⁸Nawui eina ili unghang khavai tui rāranglakha eina tangda, ina lamhāngwui makānda chili ngahonda leira." ²⁹Chieina Zadok eina Abiatharna ithumwui Avāwui oko chi Jerusalemli khuiluishitlaga chili pamsanghaowa.

³⁰Davidna akui khaluihailaga kala pheihopva matongla, kāmamānda chapngachāda Olive phungreili kāhaowa. Ali ngasokapam mi saikorala akui khaluihailaga chapngachāda kāhaowa. ^c c v30 Yorzaki awunga chi, Olive phungreili kāmamānda chapngachāda, hina Jishuwui vang sāngngarānda chitheina; ana sāngnā thili chi tampāk chikha khalatta makānda, awui ngasotnao ningtongti akhana ali yorza kahai ngayā chitharan chi phungrei chikha khalattali wukkhananga.

³¹Davidli hānghaowa, "Ahithophel Absalomli ngasoda mithit khalen kasangbingwui ngachaili lei." Chieina Davidna seihā sai, "Ithumwui Avā, Ahithophelwui hāngkachithei chi mangkhama̱ ot sāda tharchimilu."

³²Davidna kaphungton chili vākashung tharan, chi pam chili ithumwui Avāli khorum sākahaina; kala kachon rānkahai kala akuili chifa haikahai Architpa Hushaina ali samphang khavai chili rāhaowa. ³³Davidna ali hānga, "Nana ili ngasoda vāakha, iwui vang otphun ngasāhaora."

³⁴Kha nana keinung chili latunglaga Absalomli, 'Amei awunga, ina nawui rao sāra; sāngnā ina nawui avāli otram ngatha̱ kahai thada, aja ina nali otram ngatha̱ra,' da hāngakha, chieina nana iwui vang Ahithophelwui hāngkachithei chi shimān ngasakshapra. ³⁵Zadok eina Abiathar pāngmon khani nawuili ngasoda chili lei. Awungawui shimli nana kashā saikora chi athumli hānglu. ³⁶Athumwui naomayara khani, Zadokwui nao Ahima-az kala Abiatharwui nao Jonathanla athumli ngasoda chili lei. Nana kashā saikora chi athumwui pāng eina ili pao chiholu.

³⁷Chithāda Davidwui ngasotnao Hushaina, Absalomna Jerusalemli kazang tharan keinungli unga.