Amnonei Haonou Tamar to Jambei
Amnonei haonou Tamar lolo louteila shanga yepan shatbü tegü kümbei, sao to maangto shattikei, kheijinei sao sanoumkei hoba phai shemjang khümbei. Tamarei haoeibü neisimei jitnyinan Absalomeibü chema saosüngko kikei. Dawid aeibou khauangkei lausikei jembü akümbei; po penyi phaia Absalomei sanlon mün shaubü chaloua Amnon haitila kukei hoba panteikei.
13 1Kho phaia, Dawid shou Absalom la haonou hemaisaomai yaksa che kikei, haoeibü nyen Tamar kikei; hoba Dawid shou Amnonei sao sanoukei. 2Amnon haonou Tamar shanga aeibou maangto shatko himshuong shattikei; aishanga sao saosüngbü medei kikei, hoba Amnonei sao jungto atla lamnyu ahapbei. 3Amnon la thangbou che kikei, haoeibü nyen Jonadab, Dawid na Shimei shou; Jonadab aeibou songsihon kikei. 4Haoei Amnon to laukei, “Choba shou, no aila ngeyang weko maangto shattida? Nyi kü la alen lo?” Amnonei jongaikei, “Ngei kü na Absalom haonou Tamar to sanouda.”
5Jonadabei hao to laukei, “Kaibü yepshang to hauan shatbü tegü kümashi. Kabou no lapla loujinei, hao to lenshi, ‘Sanoudambo kü nou Tamar louan ngo samashi. Ngo thedanga saoei shausiyung lamleashi, hoba ngei sao ika shaulabü.’”
6Amnon yepan shatbü tegü kümbei. Ladang Choba hao chühla loukei, Amnonei Choba to laukei, “Kü nou Tamar louan ngo thedanga wentek nyi kümshi, hoba ngei sao ika shaulabü.”
7Hobaje Dawidei chobachem ka kibü Tamar to hai lauko hautikei, “Kana Amnon chem to hauan hao la shausiyung lamleashi.” 8Hobaje Tamar haona Amnon chem to haukei, khüto hao yepan kikei. Saoei wen sungjung louan seman khoei, hao thedanga wentek kümbei hoba kho kangshaukei. 9Hobaje saoei phau sungjung louan hao thedanga shoan phokei, lausikei haoei shaula athelet. Amnonei laukei, “Müt pendou kü jungka sattiashi.” Hibü pendouei hao apyokei. 10Amnonei Tamar to laukei, “Shausiyung chem maang to leian loushi, hoba ngei kaibü ika shaulabü.” Hibü Tamarei haoei kümbü wentek sungjung louan haona Amnon la chem maang to leibakei. 11Ladang saoei hao shaula nyangko atbakei, haoei sao lapbei hoba laukei, “Kü nou, louan ngo yoa yepashi.”
12Saoei laukei, “Aying, kü na! Ngo tejam. Israela kho tegü jungeila janbü aying. Hainyu amaibü tekümma. 13Hoba ngei, ngeibü himou lae to leila? Hoba no, no Israelbü ngoubü shuong yoka che tegü yeilabü. Sanoudambo, Choba to joyoshi; haoei ngo ka la kulabü.”
14Lausikei haoei sao ngüh adit; sao to hau kibou kian phaia, haoei sao jangan sao to jambei. 15Kheijinei Amnonei sao aeibou mangsenkei; haoei sao to mangsenbü kho shaangla sao to sanoukei to tokei yaangbou kikei. Haoei sao to laukei, “Meimeian longashi!”
16Saoei laukei, “Aying, ngo sattibü kho nyi ngo to shaang kümbü to amaibou ki.” Lausikei haoei sao ngüh adit.
17Haoei haoeibü sambü ngaan laukei, “Hibü yaksa haka tangto sattiashi, hoba sao phai kou khinshi.”
18Sao son kakbü namsekbü neisimei yukan kikei; kho shaangla Chobaeibü saosüngbü nouyangshou shuongei yukbü neisimei kikei. Hobaje haoeibü sambüei sao chem ka longtian sao phai kou khinkei. 19Tamarei saoeibü khua thüka tap kakkei hoba saoei yukbü son kakbü namsekbü neisimei jitnyinkei. Saoei saoeibü ik khua thüka hankei hoba ngüh angko haapjinei haukei. 20Saoeibü na Absalomei sao to laukei, “Kaibü na Amnon no yoa kiteikei lo? Tou küpjembo kishi, kü na; hao kaibü na ki. Ho kaibü maangpona tephoku.” Hibü Tamar saoeibü na Absalomeibü chema danbü yaksa che la langkei.
21Dawid Chobaei ho pendou ditjinei, hao aeibou khauangkei. 22Absalomei Amnon to maibükei amaibükei alaukei; aishanga Amnonei haoeibü na Tamar leilutibü khoei Absalomei hao to mangsenkei.
Absalomei Haoeibü Na Tamar Shanga Phoklam Kukei
23Po nyi onko phaia Absalom la Efraim napheinei kibü Baal-hazora san wi kipbü shuong kikei, hoba Absalomei Chobaeibü shousi shuong pendou ngakei. 24Hobaje Absalom Choba jungto hauan laukei, “Chühashi, kaibü sambüei wi kipbü shuong kia; Choba hoba kaibü sambü shuong kü yoa haübuma.”
25Hobaje Chobaei Absalom to laukei, “Khei aying, kü shou, künei pendou ong haula amai; aishanga künei ka la onat yinglabü.” Absalomei hao sukeijakei, lausikei haoei ahaukei, aieilausi haoei hao haükukei.
26Absalomei laukei, “Kho khei ayinglonga, kü na Amnon kün yoa haübuma.” Hobaje Chobaei hao to phekei, “Haoei aila no yoa haulep?”
27Lausikei Absalomei hao aei sukeijakei, kheijinei haoei Amnon hoba Chobaeibü shousi shuong pendou hao yoa hautikei. 28Absalomei haoeibü sambü shuong la sakkuko laukei, “Maangsangko chühashi. Ladang Amnon ihei maangpon olinyoko kijinei, hoba ngei, ‘Amnon to ngümashi,’ dogo laulaje, hao haitiashi. Tehüt. Ngei kü mütpemei kan to ngühkhüm aku lo? Hau kiashi, hoba maang kaangashi.”
29Absalomeibü sambü shuongei Absalomei sakkubü tegü Amnon to kümbei. Kheijinei Chobaeibü shousi shuong pendou meimeikei, mütpem wekoei haoeibü gadua settikei, hoba satkei.
30Hobaje haoen lama kijinei, Dawid jungto ngühlang loukei, “Absalomei Chobaeibü shousi shuong pendou haitia; müt che ong apyokei.”
31Hobaje Chobaei loenkei, haoeibü neisimei jitnyinkei, hoba kao ae yepbei; hoba haoeibü sambü shuong pendouei neisimei jitnyinan loan kikei. 32Lausikei Dawid na Shimei shou Jonadabei laukei, “Kü bunyuei, Chobaeibü shousi shuong younak pendou haitia dogo tedam. Amnon mütpem ong haikei. Amnonei haoeibü na Tamar leilutibü chalou jaüan Absalomei kho dambü kikei. 33Kü bunyu Chobaei ho maangpona tephoku, Chobaeibü shousi shuong pendou haia dogo tedam. Amnon mütpem ong haikei.”
34Tou Absalom satkei. Hobaje younak lombou khoei nyekei tangko chühkei, hoba hao phainei shongh naphei thito lama müt juong louko hapbei. 35Jonadabei Choba to lenkei, “Chühashi, choba shousi shuong loua. Kaibü sambouei laubü tegütham ki.” 36Ladang haoei joyokhümbei, Chobaeibü shousi shuong kaangko haapbo loukei; hoba Choba si hao khangenbü pendouei tokei aeibou haapbei.
37Absalom satkei hoba Geshurbü Choba Amihudeibü shou Talmai jungto haukei. Hoba Dawidei hao shou shanga chaloua chalou mang haapbei. 38Absalom satan Geshur to hauan phaia, hao khünei po sem thüngkei. 39Hoba Dawid Chobaeibü maangpon Absalom jungto haula aei waangko, aishanga Amnon haian phaia hao hakso hapbei.
