Amnon Ya Yi wa 'Yar'uwarsa Tamar Fyaɗe

Amnon ya yi kamar ba shi da lafiya don ya kaɗaita da 'yar'uwarsa ta wajen uba Tamar, ya yi mata fyaɗe, sa'an nan ya ƙi ta ya kulle ƙofa a bayanta. Tamar ta yage rigarta ta zauna a kaɗaice a gidan Absalom. Dawuda ya husata amma bai yi kome ba; bayan shekara biyu Absalom ya sa aka kashe Amnon a bikin sausayar tumaki, sa'an nan ya gudu.

Babi na 13.

Bayan wannan, Absalom ɗan Dawuda yana da wata kyakkyawar 'yar'uwa mai suna Tamar, Amnon kuwa ɗan Dawuda ya ƙaunace ta. Amnon ya damu ƙwarai saboda 'yar'uwarsa Tamar har ya kamu da ciwo; ita budurwa ce, bai kuwa ga yadda zai kusace ta ba. Amnon yana da wani aboki mai suna Yonadab, ɗan Shimea ɗan'uwan Dawuda; Yonadab kuwa mai wayo ne ƙwarai. Ya tambayi Amnon, “Me ya sa kake kama irin wannan kowace safiya, kai ɗan sarki? Ba za ka gaya mini ba?” Amnon ya ce, “Ina ƙaunar Tamar, 'yar'uwar ɗan'uwana Absalom.”

Yonadab ya ce, “Ka kwanta a gado ka yi kamar kana ciwo. Sa'ad da mahaifinka ya zo ganinka, ka ce masa, ‘Ina roƙonka ka bar 'yar'uwata Tamar ta ba ni abinci. Bari ta shirya abincin inda zan iya gani, don in ci daga hannunta.’”

Amnon ya kwanta ya yi kamar yana ciwo. Sa'ad da sarki ya zo ganinsa, Amnon ya ce, “Bari 'yar'uwata Tamar ta zo ta yi mini waina biyu ina kallo, don in iya ci daga hannunta.”

Dawuda ya aika saƙo wa Tamar a fada, “Ki tafi gidan ɗan'uwanki Amnon ki yi masa abinci.” Tamar ta tafi gidan ɗan'uwanta Amnon, inda yake kwance. Ta ɗauki kullu, ta kwaɓa shi, ta kaɗa waina a gabansa, ta toya su. Ta ɗauki kasko ta zuba masa, amma ya ƙi ci. Amnon ya ce, “Ku fitar da kowa daga nan.” Sai kowa ya fita ya bar shi. Amnon ya ce wa Tamar, “Ki kawo abincin cikin ɗakin kwana, don in ci daga hannunki.” Tamar ta ɗauki wainar da ta yi, ta kawo wa ɗan'uwanta Amnon cikin ɗakin kwana. Yayinda ta kusato da su don ya ci, sai ya kama ta, ya ce, “Zo, ki kwana da ni, 'yar'uwata.”

Ta ce, “A'a, ɗan'uwana! Kada ka tilasta mini. Ba a taɓa yin irin wannan abu a Isra'ila ba. Kada ka yi wannan abin kunya. Ni kuma—ina zan kai kunyata? Kai kuma—za ka zama kamar ɗaya daga cikin wawayen Isra'ila marasa kirki. Ina roƙonka, ka yi magana da sarki; ba zai hana ka aurena ba.”

Amma ya ƙi ji; da yake ya fi ta ƙarfi, sai ya tilasta mata ya kwana da ita. Sa'an nan Amnon ya ƙi ta da ƙiyayya mai tsanani—ta fi ƙaunar da ya ji mata a dā. Ya ce mata, “Tashi, ki fita!”

Ta ce, “A'a, korata laifi ne mafi muni fiye da abin da ka riga ka yi mini.” Amma ya ƙi ji.

Ya kira baransa ya ce, “Ka fitar da wannan mace daga nan, ka kuma kulle ƙofa a bayanta.”

Tana saye da doguwar riga mai ado, irin tufafin da 'ya'yan sarki mata budurwai suke sakawa a lokacin. Baransa ya fitar da ita, ya kulle ƙofa a bayanta. Tamar ta zuba toka a kanta, ta kuma yage doguwar riga mai ado da take saye da ita. Ta ɗora hannunta a kanta, ta tafi tana kuka da ƙarfi yayinda take tafiya. Ɗan'uwanta Absalom ya ce mata, “Ashe, Amnon ɗan'uwanki ya kwana da ke? Ki yi shiru yanzu, 'yar'uwata; shi ɗan'uwanki ne. Kada ki damu da wannan.” Saboda haka Tamar ta zauna kamar mace da aka yashe a gidan ɗan'uwanta Absalom.

Sa'ad da Sarki Dawuda ya ji dukan wannan, sai ya yi fushi ƙwarai. Absalom bai ce wa Amnon kome ba, ko mai kyau ko marar kyau, gama ya ƙi shi saboda ya ƙazantar da 'yar'uwarsa Tamar.

Absalom Ya Ɗauki Fansar 'Yar'uwarsa Tamar

Bayan cikakkun shekaru biyu, Absalom yana da masu sausaya tumaki a Ba'al-hazor kusa da Ifraimu, sai ya gayyaci dukan 'ya'yan sarki. Absalom ya tafi wurin sarki, ya ce, “Ga shi bawanka yana da masu sausaya tumaki. Sarki da barorinsa za su biyo ni?”

Sarki ya ce wa Absalom, “A'a, ɗana, bai kamata mu tafi duka ba, don kada mu nawaya maka.” Ko da yake Absalom ya matsa masa, bai tafi ba, sai dai ya sa masa albarka.

Absalom ya ce, “In ba haka ba, ina roƙonka ka bar ɗan'uwana Amnon ya tafi tare da mu.” Sarki ya ce, “Me ya sa zai tafi tare da kai?”

Amma Absalom ya matsa masa, sai ya bar Amnon da dukan 'ya'yan sarki su tafi tare da shi. Absalom ya umarci barorinsa, ya ce, “Ku kula sosai. Sa'ad da ruwan inabi ya sa Amnon farin ciki, in kuma na ce, ‘Ku buge Amnon,’ sai ku kashe shi. Kada ku ji tsoro. Ashe, ba ni ne na umarce ku da kaina ba? Ku yi ƙarfin hali, ku kuma yi jaruntaka.”

Barorin Absalom suka yi wa Amnon kamar yadda Absalom ya umarce su. Sa'an nan dukan 'ya'yan sarki suka tashi, kowannensu ya hau alfadararsa, suka gudu.

Tun suna kan hanya, labari ya iso wa Dawuda cewa, “Absalom ya kashe dukan 'ya'yan sarki; babu ko ɗaya da ya rage.”

Sarki ya tashi tsaye, ya yage tufafinsa, ya kwanta a ƙasa; dukan barorinsa kuwa suka tsaya kusa da shi, tufafinsu a yage. Amma Yonadab ɗan Shimea ɗan'uwan Dawuda ya ce, “Kada ranka yă daɗe yă yi tunani cewa an kashe dukan samarin nan, wato 'ya'yan sarki. Amnon kaɗai ne ya mutu. Absalom ya shirya wannan tun ranar da Amnon ya ƙazantar da 'yar'uwarsa Tamar. Saboda haka kada ranka yă daɗe, sarki, yă damu da wannan, yana tsammani dukan 'ya'yan sarki sun mutu. Amnon kaɗai ne ya mutu.”

A halin yanzu kuwa Absalom ya gudu. Saurayin da yake tsaro ya ɗaga ido, sai ya ga mutane masu yawa suna gangarowa ta hanya a gefen tudu a bayansa. Yonadab ya ce wa sarki, “Ga shi, 'ya'yan sarki sun zo. Kamar yadda bawanka ya faɗa ne.” Da ya gama magana, sai 'ya'yan sarki suka iso suna kuka da ƙarfi; sarki da dukan barorinsa kuma suka yi kuka mai zafi ƙwarai.

Absalom ya gudu ya tafi wurin Talmai ɗan Ammihud, sarkin Geshur. Dawuda kuwa ya yi makokin ɗansa kowace rana. Bayan Absalom ya gudu ya tafi Geshur, ya zauna a can shekara uku. Zuciyar Sarki Dawuda kuwa ta yi marmarin tafiya wurin Absalom, gama ya sami ta'aziyya bayan mutuwar Amnon.