Mga Buhat 20

20 ¹Human matapos ang kagubot, gipakuha ni Pablo ang mga tinun-an, gidasig sila, nanamilit, ug milakaw padulong sa Macedonia. ²Sa nalabang na niya kadtong mga dapita ug nahatagan niyag daghang pagdasig ang mga magtutuo, nahiabot siya sa Gresya. ³Mipuyo siya didto ug tulo ka bulan; sa dihang naglaraw ang mga Judio batok kaniya samtang hapit na siyang molayag padulong sa Siria, nakahukom siya nga mobalik agi sa Macedonia. ⁴Mikuyog kaniya si Sopater nga anak ni Pirro nga taga-Berea, si Aristarco ug si Secundo nga taga-Tesalonica, si Gayo nga taga-Derbe, si Timoteo, ug si Tiquico ug si Trofimo nga taga-Asia. ⁵Nag-una kining mga tawhana ug nagpaabot kanamo sa Troas. ⁶Milayag kami gikan sa Filipos human sa mga adlaw sa Tinapay nga Walay Patubo, ug naabtan namo sila sa Troas sulod sa lima ka adlaw, ug nagpabilin didto ug pito ka adlaw.

Usa ka Batan-ong Lalaki nga Gibanhaw sa Troas

⁷Sa unang adlaw sa semana, sa dihang nagtigom kami aron mamikas ug tinapay, nakigsulti si Pablo kanila; kay molakaw man siya pagkasunod adlaw, nagpadayon siya sa pagsulti hangtod sa tungang gabii. ⁸Daghang mga suga diha sa lawak sa itaas diin kami nagtigom. ⁹Usa ka batan-ong lalaki nga ginganlag Eutico ang naglingkod sa bintana, nga nahinanok sa halalom nga katulog samtang nagpadayon si Pablo sa pagsulti. Gidaog siya sa katulog, nahulog siya gikan sa ikatulong andana, ug gialsa siya nga patay na. ¹⁰Milugsong si Pablo, mihapa kaniya, ug samtang gigakos niya siya miingon, “Ayaw kamo kalisang; anaa pa kaniya ang iyang kinabuhi.”

¹¹Mibalik siya sa itaas, namikas ug tinapay, mikaon, ug nakigsulti kanila ug dugay, hangtod sa kaadlawon, ug unya milakaw. ¹²Ug gidala nila ang batan-ong lalaki pauli nga buhi, ug nahupay sila pag-ayo.

Ang Panaw Padulong sa Mileto

¹³Nag-una kami sakay sa barko padulong sa Asos, aron didto namo sakyon si Pablo; kay gipili man niya nga molakaw agi sa yuta. ¹⁴Ug sa dihang gikatagbo niya kami sa Asos, gisakay namo siya ug miabot kami sa Mitilene. ¹⁵Milayag kami gikan didto, ug pagkasunod adlaw nahiatbang kami sa Quios, ug sa sunod nga adlaw midunggo kami sa Samos, ug pagkaugma nakaabot kami sa Mileto. ¹⁶Nakahukom si Pablo nga molabay lang sa Efeso, aron dili na siya magdugay sa Asia; nagdali siya aron makaabot sa Jerusalem, kon mahimo, pagka-Pentecostes.

¹⁷Gikan sa Mileto nagpadala siyag mensahe ngadto sa Efeso ug gipatawag ang mga anciano sa iglesia aron moadto kaniya. ¹⁸Sa dihang miabot sila, miingon siya, “Nasayod kamo kon giunsa nako pagpuyo uban kaninyo sa tibuok panahon, sukad sa unang adlaw nga mitunob ako sa Asia, ¹⁹nga nag-alagad sa atong Ginoong Jesus uban sa bug-os nga pagpaubos, mga luha, ug mga pagsulay nga midangat tungod sa mga laraw sa mga Judio batok kanako, ²⁰kon giunsa nako nga wala akoy gililong nga makatabang kaninyo, kondili gimantala ko kini ug gitudlo kaninyo sa dayag ug sa matag balay, ²¹nga nagpamatuod ngadto sa mga Judio ug sa mga Griego: ang paghinulsol ngadto sa atong Amahan ug ang pagtuo sa atong Ginoong Jesus. ²²Karon, nga ginapos sa Espiritu, nagpadulong ako sa Jerusalem, nga wala masayod kon unsay nagpaabot kanako didto, ²³gawas nga ang Espiritu Santo nagpahimangno kanako sa matag siyudad nga ang mga talikala ug mga pag-antos nagpaabot kanako. ²⁴Apan wala ko bilha ang akong kinabuhi, ni pakamahala kini alang sa akong kaugalingon, basta lamang matapos ko ang akong dalaganan ug ang pag-alagad nga akong nadawat gikan sa atong Ginoong Jesus, nga magpamatuod sa maayong balita sa grasya sa atong Amahan.

²⁵Ug karon nasayod ako nga walay bisan usa kaninyo nga akong giadtoan sa pagwali sa gingharian sa atong Amahan ang makakita pag-usab sa akong nawong. ²⁶Busa nagpamatuod ako kaninyo niining adlawa nga wala akoy tulubagon sa dugo sa tanan, ^a a v26 ‘Walay tulubagon sa dugo sa tanan’: Ang buot ipasabot ni Pablo mao nga kon aduna may nawala sa espirituhanong paagi, dili kini tungod sa kakulang sa pagpasidaan gikan kaniya — wala gayod siyay gililong. ²⁷kay wala ako magpanuko sa pagmantala kaninyo sa tibuok katuyoan sa atong Amahan. ²⁸Bantayi ninyo ang inyong kaugalingon ug ang tibuok panon nga gihimo kamo sa Espiritu Santo nga mga magbalantay niini, aron atimanon ang iglesia sa atong Amahan, nga iyang gipalit pinaagi sa dugo sa iyang kaugalingong Anak. ^b b v28 Ang Griego mabasa sa literal nga paagi nga “pinaagi sa dugo sa iyang kaugalingon,” nga gihubad sa FHB nga “iyang kaugalingong Anak” — naangkon sa atong Amahan ang iglesia pinaagi sa kantidad sa dugo sa iyang Anak. Gihisgotan ni Pablo ang samang kamatuoran sa Roma 8:32: wala gilikay sa atong Amahan ang iyang kaugalingong Anak kondili gitugyan siya alang kanatong tanan. ²⁹Nasayod ako nga human sa akong paglakaw, mosulod kaninyo ang mabangis nga mga lobo, nga dili maluoy sa panon. ³⁰Mobangon ang mga tawo gikan kaninyo, nga magsultig mga tinuis nga mga butang, aron birahon palayo ang mga tinun-an sa pagsunod kanila. ³¹Busa pagbantay kamo, nga nahinumdom nga sulod sa tulo ka tuig, gabii ug adlaw, wala gayod ako mohunong sa pagpasidaan sa matag usa kaninyo uban ang mga luha. ³²Karon itugyan ko kamo ngadto sa atong Amahan ug sa pulong sa iyang grasya, nga makahimo sa pagtukod kaninyo ug sa paghatag kaninyo sa panulondon uban sa tanan nga gibalaan. ³³Wala akoy gikaibgan nga plata o bulawan o bisti ni bisan kinsa. ³⁴Kamo mismo nasayod nga kining mga kamota maoy nagtagana sa akong mga panginahanglan ug sa mga nag-uban kanako. ³⁵Sa tanang butang gipakita ko kaninyo nga, pinaagi sa pagpaningkamot sa ingon niini, kinahanglan natong tabangan ang mga maluya, nga nahinumdom sa mga pulong sa atong Ginoong Jesus, nga siya mismo miingon, Labaw nga bulahan ang paghatag kay sa pagdawat.”

³⁶Ug sa nakasulti na siya niining mga butanga, miluhod siya uban kanilang tanan ug nag-ampo. ³⁷Nanghilak silang tanan; gigakos nila si Pablo ug gihagkan siya, ³⁸nga naguol gayod sila labaw sa tanan tungod sa iyang mga pulong—nga dili na nila makita pag-usab ang iyang nawong—ug gihatod nila siya ngadto sa barko.