Bulus Ya Ƙarfafa Masu Bi

Bulus ya yi magana har bayan tsakar dare, sai wani saurayi da ya yi barci a taga ya faɗo daga hawa na uku ya mutu; Bulus ya sauka, ya rungume shi, sai ya rayu. Daga baya, da yake ya san sarƙoƙi suna jiransa a Urushalima, ya gaya wa dattawan Afisa su kiyaye garken Ubanmu. Suka yi kuka domin ba za su ƙara ganin fuskarsa ba.

Babi na 20.

Bayan hayaniyar ta ƙare, sai Bulus ya aika a kira almajiran, ya ƙarfafa su, ya yi musu bankwana, sa'an nan ya kama hanya zuwa Makidoniya. Da ya ratsa waɗannan yankuna, ya kuma ƙarfafa masu bi ƙwarai, sai ya iso ƙasar Girka. Ya zauna wata uku. Sa'ad da Yahudawa suka ƙulla masa maƙarƙashiya yayinda yake shirin tuƙa jirgi zuwa Suriya, sai ya yanke shawara yă koma ta Makidoniya. Sofateru ɗan Firus na Biriya, da Aristarkus da Sekundus na Tasalonika, da Gayus na Darbe, da Timoti, da kuma Tikikus da Tarofimus na Asiya suka raka shi. Waɗannan suka yi gaba, suka dakata mana a Taruwasa. Mu kuwa muka tuƙa jirgi daga Filibi bayan kwanakin Gurasa Marar Yisti, muka kai wurinsu a Taruwasa cikin kwana biyar, muka zauna a can kwana bakwai.

An Rayar da Wani Saurayi a Taruwasa

A ranar farko ta mako, sa'ad da muka taru domin karya gurasa, sai Bulus ya yi musu magana. Da yake shirin tashi washegari, sai ya ci gaba da magana har tsakar dare. Akwai fitilu da yawa a ɗakin bene inda muka taru. Wani saurayi mai suna Yutikus yana zaune a taga, barci mai nauyi yana ƙara kama shi yayinda Bulus yake ci gaba da magana. Da barci ya rinjaye shi, sai ya faɗi daga bene na uku, aka ɗauke shi matacce. Bulus ya sauka, ya sunkuya a kansa, ya rungume shi ya ce, “Kada ku firgita; ransa yana cikinsa.”

Ya sāke hawa, ya karya gurasa, ya ci, ya kuma yi musu magana na dogon lokaci har gari ya waye, sa'an nan ya tafi. Suka kuwa kawo saurayin gida da rai, aka kuwa ta'azantar da su ƙwarai.

Tafiya zuwa Militus

Mu kuwa muka sha gaba da jirgin ruwa zuwa Assos, muna shirin ɗaukar Bulus a can, domin shi ya zaɓa yă bi ta ƙasa. Da ya same mu a Assos, sai muka ɗauke shi cikin jirgi, muka iso Mitilini. Muka tuƙa jirgi daga can, washegari muka kai gaban Kiyos, kashegari muka sauka a Samos, kuma a rana mai zuwa muka isa Militus. Bulus ya riga ya yanke shawara yă wuce Afisa da jirgi, domin kada yă ɓata lokaci a Asiya. Yana sauri domin yă isa Urushalima kafin Fentikos, in ya yiwu.

Daga Militus ya aika zuwa Afisa, ya kira dattawan ikkilisiya su zo wurinsa. Da suka zo, sai ya ce musu, “Ku kun san yadda na zauna a cikinku dukan lokacin, tun ranar farko da na taka ƙafata a Asiya, ina bauta wa Ubangiji Yesu da cikakken tawali'u, da hawaye, da gwaje-gwajen da suka same ni ta dalilin maƙarƙashiyar Yahudawa a kaina, yadda ban ɓoye muku kome da zai amfane ku ba, sai dai na yi muku shelarsa, na kuma koya muku a fili da gida gida, ina shaida wa Yahudawa da Girkawa duka, tuba ga Ubanmu da kuma bangaskiya ga Ubangiji Yesu. Yanzu kuwa Ruhu ya daure ni, ina kan hanyata zuwa Urushalima, ban kuma san abin da yake jirana a can ba, sai dai Ruhu Mai Tsarki yana gaya mini a kowane birni cewa sarƙoƙi da wahaloli suna jirana. Amma ban ɗauki raina da wani daraja ba, ba kuwa na mai da shi abin ƙima a gare ni ba, sai dai in gama tseren tafiyata da hidimar da na karɓa daga wurin Ubangiji Yesu, ina shaidar bisharar alherin Ubanmu.

Yanzu kuwa na sani cewa ba ko ɗayanku, waɗanda na zazzaga ina wa'azin Mulkin Ubanmu a cikinsu, da zai sāke ganin fuskata. Saboda haka ina shaida muku a yau cewa ni marar laifi ne ga jinin kowa, ^a gama ban ja da baya ga yi muku shelar dukan nufin Ubanmu ba. Ku lura da kanku da kuma dukan garken da Ruhu Mai Tsarki ya naɗa ku masu kula da shi, domin ku yi kiwon ikkilisiyar Ubanmu, wadda ya saya da jinin Ɗansa. ^b Na sani cewa bayan tafiyata, mugayen kyarketai za su shiga cikinku, ba za su ji tausayin garken ba. Waɗansu mutane daga cikinku za su tāso, suna faɗin abubuwa karkatattu, domin su jawo almajirai bayansu. Saboda haka ku yi tsaro, kuna tunawa cewa har shekara uku, dare da rana, ban daina gargaɗin kowannenku da hawaye ba. Yanzu kuwa na danƙa ku ga Ubanmu da kuma ga maganar alherinsa, wadda take da iko tă gina ku, tă kuma ba ku gādo a cikin dukan waɗanda aka tsarkake. Ban yi ƙyashin azurfa ko zinariya ko tufafin kowa ba. Ku kanku kun sani cewa waɗannan hannaye sun biya bukatuna da na waɗanda suke tare da ni. A cikin kome na nuna muku cewa, ta wurin yin aiki tuƙuru haka, dole mu taimaki marasa ƙarfi, muna tunawa da kalmomin Ubangiji Yesu, yadda shi kansa ya ce, ba da kyauta ya fi karɓa albarka.”

Da ya faɗi waɗannan abubuwa, sai ya durƙusa tare da su duka, ya yi addu'a. Duka suka yi kuka, suka rungume Bulus, suka yi masa sumba, Suna baƙin ciki ƙwarai saboda maganarsa — wato ba za su ƙara ganin fuskarsa ba — suka raka shi zuwa jirgin ruwa.