ዘፍጥረት 44

44 ¹ከዚያም የቤቱን አዛዥ እንዲህ አለው፤ “የሰዎቹን ከረጢቶች ሊሸከሙት በሚችሉት ያህል በእህል ሙላ፤ የእያንዳንዱንም ሰው ብር በከረጢቱ አፍ ላይ አኑር። ²ጽዋዬን፣ የብሩን ጽዋ፣ ከእህሉ ገንዘብ ጋራ በታናሹ ከረጢት አፍ ላይ አኑር።” ዮሴፍ እንዳለውም አደረገ። ³ማለዳ ጎህ እንደ ቀደደ፣ ሰዎቹ ከአህዮቻቸው ጋራ ተሸኙ። ⁴ከከተማዪቱ ወጥተው ገና ሳይርቁ፣ ዮሴፍ አዛዡን እንዲህ አለው፤ “ሰዎቹን ተከትለህ ሩጥ፤ በደረስህባቸውም ጊዜ፣ ‘ለመልካም ነገር ክፉ ለምን መለሳችሁ? ⁵ጌታዬ የሚጠጣበትና ሟርት የሚያደርግበት ጽዋ ይህ አይደለምን? ያደረጋችሁት ነገር ክፉ ነው።’” ⁶በደረሰባቸውም ጊዜ፣ እነዚህን ቃላት ተናገራቸው።

⁷እነርሱም እንዲህ አሉ፤ “ጌታዬ እንዲህ ያለ ነገር ለምን ይናገራል? ባሪያዎችህ እንዲህ ያለ ነገር ከቶ አያደርጉም። ⁸እነሆ፣ በከረጢቶቻችን አፍ ላይ ያገኘነውን ብር ከከነዓን ወደ አንተ መልሰን አመጣን፤ ታዲያ ከጌታህ ቤት ብር ወይም ወርቅ እንዴት እንሰርቃለን? ⁹ከባሪያዎችህ መካከል በማንም ዘንድ ቢገኝ ይሙት፤ እኛም ደግሞ የጌታዬ ባሪያዎች እንሆናለን።”

¹⁰እርሱም እንዲህ አለ፤ “መልካም፤ እንዳላችሁት ይሁን። ከእርሱ ዘንድ የተገኘ ባሪያዬ ይሆናል፤ እናንተ የቀራችሁት ግን ነጻ ናችሁ።”

¹¹ከዚያም እያንዳንዱ ሰው ፈጥኖ ከረጢቱን ወደ መሬት አወረደ፤ እያንዳንዱም ሰው ከረጢቱን ፈታ። ¹²እርሱም ከታላቁ ጀምሮ እስከ ታናሹ ድረስ ፈተሸ፤ ጽዋውም በብንያም ከረጢት ተገኘ። ¹³ከዚያም ልብሳቸውን ቀደዱ፤ እያንዳንዱም ሰው አህያውን ጭኖ ወደ ከተማዪቱ ተመለሱ።

¹⁴ይሁዳና ወንድሞቹ ወደ ዮሴፍ ቤት በደረሱ ጊዜ፣ እርሱ ገና በዚያ ነበር፤ በፊቱም መሬት ላይ ወደቁ። ¹⁵ዮሴፍም እንዲህ አላቸው፤ “ይህ ያደረጋችሁት ምንድን ነው? እንደ እኔ ያለ ሰው በእርግጥ ሟርት እንደሚያደርግ አታውቁምን?”

¹⁶ይሁዳም እንዲህ አለ፤ “ለጌታዬ ምን እንላለን? ምንስ እንናገራለን? እንዴትስ ራሳችንን እናጸድቃለን? አባታችን የባሪያዎችህን በደል አግኝቷል። እነሆ፣ እኛም ጽዋው በእጁ የተገኘውም፣ ሁላችን የጌታዬ ባሪያዎች ነን።” ^a a v16 ይሁዳ ዮሴፍን በመሸጥ የተሠራውን ለረጅም ዘመን የተቀበረውን በደል የሚገልጠውን የአባታችንን እጅ ተገነዘበ፤ ይህም ወንድሞቹን ወደ ንስሓ ይስባቸዋል።

¹⁷እርሱ ግን እንዲህ አለ፤ “ይህን ከቶ አላደርገውም። ጽዋው በእጁ የተገኘው ሰው ብቻ ባሪያዬ ይሆናል። እናንተ የቀራችሁት ግን በሰላም ወደ አባታችሁ ተመለሱ።”

¹⁸ከዚያም ይሁዳ ወደ ፊት ቀርቦ እንዲህ አለ፤ “ጌታዬ ሆይ፣ እባክህ፣ ባሪያህ ለጌታዬ አንዲት ቃል ይናገር፤ አንተ እንደ ፈርዖን ራሱ ነህና በባሪያህ ላይ አትቈጣ።

¹⁹ጌታዬ ባሪያዎቹን፣ ‘አባት ወይስ ወንድም አላችሁን?’ ብሎ ጠየቀ። ²⁰እኛም ለጌታዬ እንዲህ አልን፤ ‘ሽማግሌ አባትና በእርጅና ዘመን የተወለደ ታናሽ ልጅ አለን። ወንድሙ ሞቷል፤ ከእናቱ ልጆች እርሱ ብቻ ቀርቷል፤ አባቱም ይወደዋል።’ ²¹አንተም ባሪያዎችህን እንዲህ አልኸን፤ ‘ራሴ አየው ዘንድ ወደ እኔ አውርዱት።’ ²²እኛም ለጌታዬ እንዲህ አልን፤ ‘ብላቴናው አባቱን ሊተወው አይችልም፤ ቢተወው አባቱ ይሞታልና።’ ²³አንተም ባሪያዎችህን እንዲህ አልኸን፤ ‘ታናሹ ወንድማችሁ ከእናንተ ጋራ ካልወረደ፣ ዳግመኛ ፊቴን አታዩም።’ ²⁴ባሪያህ ወደ ሆነው ወደ አባቴ በተመለስን ጊዜ፣ ያልኸውን ነገር ነገርነው። ²⁵አባታችንም እንዲህ ባለ ጊዜ፤ ‘ተመልሳችሁ ሂዱ፤ ጥቂት እህል ግዙልን፤’ ²⁶እኛ እንዲህ አልን፤ ‘ልንወርድ አንችልም። ታናሹ ወንድማችን ከእኛ ጋራ ቢመጣ፣ እንወርዳለን፤ ታናሹ ወንድማችን ከእኛ ጋራ ከሌለ የሰውዬውን ፊት ማየት አንችልምና።’ ²⁷ባሪያህ የሆነውም አባቴ እንዲህ አለን፤ ‘ሚስቴ ሁለት ወንዶች ልጆች እንደ ወለደችልኝ ታውቃላችሁ። ²⁸አንዱ ተለየኝ፤ እኔም፣ “በእርግጥ ተተልትሎአል” አልሁ፤ ከዚያም ወዲህ አላየሁትም። ²⁹ይህንም ደግሞ ከእኔ ብትወስዱብኝ፣ መከራም ቢያገኘው፣ ሽበቴን በሐዘን ወደ መቃብር ታወርዳላችሁ። ³⁰እንግዲህ ባሪያህ ወደ ሆነው ወደ አባቴ በመጣሁ ጊዜ፣ ብላቴናውም ከእኛ ጋራ ባይኖር፣ ነፍሱ ከብላቴናው ነፍስ ጋራ የተሳሰረች ስለ ሆነች፣ ³¹ብላቴናው እንደሌለ ባየ ጊዜ ይሞታል፤ ባሪያዎችህም ባሪያህ የሆነውን አባታችንን በሐዘን ወደ መቃብር እናወርዳለን።’ ³²ባሪያህ ለአባቴ ስለ ብላቴናው፣ ‘ወደ አንተ ባልመልሰው፣ በሕይወቴ ዘመን ሁሉ በአባቴ ፊት በደለኛ እሆናለሁ’ ብሎ ዋስ ሆኖአልና። ³³እንግዲህ እባክህ፣ ባሪያህ በብላቴናው ፈንታ የጌታዬ ባሪያ ሆኖ ይቅር፤ ብላቴናውም ከወንድሞቹ ጋራ ይመለስ። ^b b v33 ይሁዳ በብንያም ፈንታ የገዛ ሕይወቱን አቀረበ፤ ይህም በእስራኤል ልጅ የተደረገ በቀኖና ውስጥ የመጀመሪያው ምትክ ነው። ከይሁዳ ነገድ የሆነው አንበሳ ኢየሱስ፣ በመስቀል ላይ የእኛን ስፍራ በመውሰድ ይህን ምሳሌ ፈጸመ። ³⁴ብላቴናው ሳይኖር እንዴት ወደ አባቴ እመለሳለሁ? አባቴ ላይ የሚደርሰውን መከራ ማየት አልችልምና።”