ଆଦି ପୁସ୍ତକ 44 FHB Father's Heart Bible™

44 ¹ତତ୍ପରେ ସେ ଆପଣା ଗୃହାଧ୍ୟକ୍ଷକୁ ଆଜ୍ଞା ଦେଲେ, “ଏହି ଲୋକମାନଙ୍କ ପଟରେ ସେମାନେ ଯେତେ ବୋହିପାରିବେ, ସେତେ ଶସ୍ୟ ପୂର୍ଣ୍ଣ କର, ପୁଣି ପ୍ରତ୍ୟେକର ରୂପା ପ୍ରତ୍ୟେକ ପଟ ମୁଖରେ ରଖ। ²ଆଉ ମୋହର ପାନପାତ୍ର, ଅର୍ଥାତ୍‍ ରୂପା ପାନପାତ୍ର, ସର୍ବକନିଷ୍ଠର ଶସ୍ୟ ମୂଲ୍ୟ ସହିତ ତାହାର ପଟ ମୁଖରେ ରଖ।” ତହିଁରେ ଯୋଷେଫ କହିବା ଅନୁସାରେ ସେ କଲା। ³ପ୍ରଭାତ ହୋଇ ଆଲୋକ ହେବା ମାତ୍ରେ ସେହି ଲୋକମାନେ ଆପଣା ଆପଣା ଗର୍ଦ୍ଦଭ ସହିତ ବିଦାୟ ପ୍ରାପ୍ତ ହେଲେ। ⁴ସେମାନେ ନଗରରୁ ବାହାରି ଅଧିକ ଦୂର ନ ଯାଉଣୁ ଯୋଷେଫ ଆପଣା ଗୃହାଧ୍ୟକ୍ଷକୁ କହିଲେ, “ସେହି ଲୋକମାନଙ୍କ ପଛେ ପଛେ ଦୌଡ଼; ପୁଣି ସେମାନଙ୍କୁ ଧରିଲେ କହିବ, ‘ତୁମ୍ଭେମାନେ ଉପକାର ବଦଳରେ କାହିଁକି ଅପକାର କଲ? ⁵ଯହିଁରେ ମୋʼ ପ୍ରଭୁ ପାନ କରନ୍ତି ଓ ଯାହା ଦ୍ଵାରା ଗଣନା କରନ୍ତି, ଏହା କʼଣ ସେହି ପାତ୍ର ନୁହେଁ? ତୁମ୍ଭେମାନେ ଯାହା କରିଅଛ, ତାହା ମନ୍ଦ।’” ⁶ତହୁଁ ସେ ସେମାନଙ୍କୁ ଧରି ଏହିସବୁ କଥା ସେମାନଙ୍କୁ କହିଲା।

⁷ତହିଁରେ ସେମାନେ କହିଲେ, “ମୋʼ ପ୍ରଭୁ କାହିଁକି ଏପରି କଥା କହୁଅଛନ୍ତି? ଆପଣଙ୍କ ଦାସମାନେ ଏପରି କର୍ମ କଦାପି କରିବେ ନାହିଁ। ⁸ଦେଖନ୍ତୁ, ଆମ୍ଭେମାନେ ଆପଣା ଆପଣା ପଟ ମୁଖରେ ଯେଉଁ ରୂପା ପାଇଥିଲୁ, ତାହା କିଣାନ ଦେଶରୁ ଆପଣଙ୍କ ନିକଟକୁ ଫେରାଇ ଆଣିଲୁ; ତେବେ କିପ୍ରକାରେ ଆପଣଙ୍କ ପ୍ରଭୁଙ୍କ ଗୃହରୁ ରୂପା କି ସୁନା ଚୋରି କରିବୁ? ⁹ଆପଣଙ୍କ ଦାସମାନଙ୍କ ମଧ୍ୟରୁ ଯାହା ନିକଟରେ ତାହା ମିଳିବ, ସେ ମରିବ, ପୁଣି ଆମ୍ଭେମାନେ ମଧ୍ୟ ମୋʼ ପ୍ରଭୁଙ୍କ ଦାସ ହେବୁ।”

¹⁰ତହୁଁ ସେ କହିଲା, “ଭଲ, ତୁମ୍ଭମାନଙ୍କ କଥାନୁସାରେ ହେଉ; ଯାହା ନିକଟରେ ତାହା ମିଳିବ, ସେ ମୋହର ଦାସ ହେବ, ପୁଣି ତୁମ୍ଭେମାନେ ନିର୍ଦ୍ଦୋଷ ହେବ।”

¹¹ତେଣୁ ପ୍ରତ୍ୟେକେ ଶୀଘ୍ର ଆପଣା ଆପଣା ପଟ ଭୂମିରେ ଓହ୍ଲାଇ ପ୍ରତ୍ୟେକେ ଆପଣା ଆପଣା ପଟ ଫିଟାଇଲେ। ¹²ତହିଁରେ ସେ ଜ୍ୟେଷ୍ଠଠାରୁ ଆରମ୍ଭ କରି କନିଷ୍ଠ ପର୍ଯ୍ୟନ୍ତ ଅନୁସନ୍ଧାନ କଲା; ପୁଣି ବିନ୍ୟାମୀନଙ୍କ ପଟ ମଧ୍ୟରେ ସେହି ପାତ୍ର ମିଳିଲା। ¹³ତେବେ ସେମାନେ ଆପଣା ଆପଣା ବସ୍ତ୍ର ଚିରିଲେ, ପୁଣି ପ୍ରତ୍ୟେକେ ଆପଣା ଆପଣା ଗର୍ଦ୍ଦଭ ଉପରେ ଭାର ଲଦି ନଗରକୁ ଫେରିଗଲେ।

¹⁴ପରେ ଯିହୂଦା ଓ ତାହାର ଭାଇମାନେ ଯୋଷେଫଙ୍କ ଗୃହକୁ ଆସନ୍ତେ, ସେ ସେଠାରେ ଥିଲେ; ତହୁଁ ସେମାନେ ତାହାଙ୍କ ସମ୍ମୁଖରେ ଭୂମିରେ ପଡ଼ିଲେ। ¹⁵ତେଣୁ ଯୋଷେଫ ସେମାନଙ୍କୁ କହିଲେ, “ତୁମ୍ଭେମାନେ ଏ କʼଣ କର୍ମ କଲ? ମୋʼ ପରି ଲୋକ ଯେ ନିଶ୍ଚୟ ଗଣନା କରିଥାଏ, ଏହା କʼଣ ତୁମ୍ଭେମାନେ ଜାଣ ନାହିଁ?”

¹⁶ତହିଁରେ ଯିହୂଦା କହିଲା, “ଆମ୍ଭେମାନେ ମୋʼ ପ୍ରଭୁଙ୍କୁ କʼଣ କହିବୁ? କʼଣ କଥା କହିବୁ? ଅବା କିପ୍ରକାରେ ଆପଣାମାନଙ୍କୁ ନିର୍ଦ୍ଦୋଷ କରିବୁ? ଆମ୍ଭମାନଙ୍କ ପିତା ଆପଣଙ୍କ ଦାସମାନଙ୍କ ଅପରାଧ ବାହାର କରିଅଛନ୍ତି; ଦେଖନ୍ତୁ, ଆମ୍ଭେମାନେ, ପୁଣି ଯାହା ହସ୍ତରେ ପାତ୍ର ମିଳିଲା, ସେ, ଆମ୍ଭେ ସମସ୍ତେ ମୋʼ ପ୍ରଭୁଙ୍କ ଦାସ।” ^a a v16 ଯୋଷେଫଙ୍କୁ ବିକ୍ରୟ କରିବାର ବହୁଦିନ ଲୁକ୍କାୟିତ ଅପରାଧକୁ ଆମ୍ଭମାନଙ୍କ ପିତାଙ୍କ ହସ୍ତ ପ୍ରକାଶ କରୁଥିବା ଯିହୂଦା ବୁଝିପାରନ୍ତି — ଯାହା ଭାଇମାନଙ୍କୁ ମନପରିବର୍ତ୍ତନ ଆଡ଼କୁ ଟାଣି ଆଣେ।

¹⁷ମାତ୍ର ସେ କହିଲେ, “ଏପରି କର୍ମ ମୁଁ କଦାପି କରିବି ନାହିଁ; ଯାହା ହସ୍ତରେ ପାତ୍ର ମିଳିଲା, କେବଳ ସେହି ଲୋକ ମୋହର ଦାସ ହେବ; ମାତ୍ର ତୁମ୍ଭେମାନେ କୁଶଳରେ ଆପଣାମାନଙ୍କ ପିତା ନିକଟକୁ ଫେରିଯାଅ।”

¹⁸ତେବେ ଯିହୂଦା ନିକଟକୁ ଆସି କହିଲା, “ହେ ମୋʼ ପ୍ରଭୁ, ବିନୟ କରୁଅଛି, ଆପଣଙ୍କ ଦାସକୁ ଆପଣଙ୍କ କର୍ଣ୍ଣଗୋଚରରେ ଗୋଟିଏ କଥା କହିବାକୁ ଅନୁମତି ଦିଅନ୍ତୁ, ପୁଣି ଆପଣଙ୍କ ଦାସ ପ୍ରତି କ୍ରୋଧ ନ କରନ୍ତୁ; କାରଣ ଆପଣ ଫାରୋଙ୍କ ସମାନ ଅଟନ୍ତି।

¹⁹ମୋʼ ପ୍ରଭୁ ଆପଣଙ୍କ ଦାସମାନଙ୍କୁ ପଚାରିଥିଲେ, ‘ତୁମ୍ଭମାନଙ୍କର ପିତା କି ଭାଇ ଅଛି କି?’ ²⁰ତହିଁରେ ଆମ୍ଭେମାନେ ମୋʼ ପ୍ରଭୁଙ୍କୁ କହିଥିଲୁ, ‘ଆମ୍ଭମାନଙ୍କର ଜଣେ ବୃଦ୍ଧ ପିତା ଅଛନ୍ତି, ପୁଣି ତାହାଙ୍କ ବୃଦ୍ଧ ବୟସର ଗୋଟିଏ ସାନ ପୁଅ ଅଛି; ତାହାର ଭାଇ ମରିଅଛି, ଆଉ ଆପଣା ମାତାର ସନ୍ତାନଗଣ ମଧ୍ୟରେ କେବଳ ସେ ଏକା ଅବଶିଷ୍ଟ ଅଛି, ଏଣୁ ତାହାର ପିତା ତାହାକୁ ସ୍ନେହ କରନ୍ତି।’ ²¹ତହୁଁ ଆପଣ ଆପଣଙ୍କ ଦାସମାନଙ୍କୁ କହିଥିଲେ, ‘ତାହାକୁ ମୋʼ ନିକଟକୁ ଆଣ, ତହିଁରେ ମୁଁ ତାହାକୁ ସ୍ଵଚକ୍ଷୁରେ ଦେଖିବି।’ ²²ତେବେ ଆମ୍ଭେମାନେ ମୋʼ ପ୍ରଭୁଙ୍କୁ କହିଥିଲୁ, ‘ସେ ବାଳକ ଆପଣା ପିତାଙ୍କୁ ଛାଡ଼ି ଆସି ନ ପାରେ; କାରଣ ସେ ଆସିଲେ ତାହାର ପିତା ମରିଯିବେ।’ ²³ତହୁଁ ଆପଣ ଆପଣଙ୍କ ଦାସମାନଙ୍କୁ କହିଥିଲେ, ‘ତୁମ୍ଭମାନଙ୍କ ସାନ ଭାଇ ତୁମ୍ଭମାନଙ୍କ ସଙ୍ଗରେ ନ ଆସିଲେ ତୁମ୍ଭେମାନେ ପୁନର୍ବାର ମୋʼ ମୁଖ ଦେଖିବ ନାହିଁ।’ ²⁴ତହିଁ ଉତ୍ତାରେ ଆମ୍ଭେମାନେ ଆପଣଙ୍କ ଦାସ ମୋʼ ପିତା ନିକଟକୁ ଯାଇ ତାହାଙ୍କୁ ମୋʼ ପ୍ରଭୁଙ୍କ କଥାସବୁ କହିଲୁ। ²⁵ଏଥିଉତ୍ତାରେ ଆମ୍ଭମାନଙ୍କ ପିତା କହିଲେ, ‘ତୁମ୍ଭେମାନେ ପୁନର୍ବାର ଯାଇ ଆମ୍ଭମାନଙ୍କ ନିମନ୍ତେ କିଛି ଶସ୍ୟ କିଣି ଆଣ।’ ²⁶ତହିଁରେ ଆମ୍ଭେମାନେ କହିଲୁ, ‘ଆମ୍ଭେମାନେ ଯାଇ ନ ପାରୁ; ଆମ୍ଭମାନଙ୍କ ସାନ ଭାଇ ଆମ୍ଭମାନଙ୍କ ସଙ୍ଗରେ ଗଲେ ଆମ୍ଭେମାନେ ଯିବୁ; କାରଣ ଆମ୍ଭମାନଙ୍କ ସାନ ଭାଇ ଆମ୍ଭମାନଙ୍କ ସଙ୍ଗରେ ନ ଥିଲେ ଆମ୍ଭେମାନେ ସେହି ବ୍ୟକ୍ତିଙ୍କ ମୁଖ ଦେଖିପାରିବୁ ନାହିଁ।’ ²⁷ତହୁଁ ଆପଣଙ୍କ ଦାସ ମୋʼ ପିତା ଆମ୍ଭମାନଙ୍କୁ କହିଲେ, ‘ମୋʼ ଭାର୍ଯ୍ୟା ଯେ ମୋʼ ନିମନ୍ତେ ଦୁଇ ପୁତ୍ର ପ୍ରସବ କଲା, ଏହା ତୁମ୍ଭେମାନେ ଜାଣ। ²⁸ସେମାନଙ୍କ ମଧ୍ୟରୁ ଜଣେ ମୋʼ ନିକଟରୁ ବାହାରିଗଲା, ପୁଣି ମୁଁ କହିଲି, “ନିଶ୍ଚୟ ସେ ଖଣ୍ଡ ଖଣ୍ଡ ହୋଇ ବିଦୀର୍ଣ୍ଣ ହୋଇଅଛି”; ଆଉ ମୁଁ ଏଯାଏ ତାହାକୁ ଦେଖି ନାହିଁ। ²⁹ଏବେ ତୁମ୍ଭେମାନେ ଏହାକୁ ମଧ୍ୟ ମୋʼ ନିକଟରୁ ନେଲେ, ପୁଣି ତାହାର କିଛି ବିପଦ ଘଟିଲେ, ତୁମ୍ଭେମାନେ ମୋʼ ଏହି ପକ୍ଵ କେଶ ଶୋକରେ କବରକୁ ଓହ୍ଲାଇ ନେବ।’ ³⁰ଏଣୁ ଏବେ ମୁଁ ଆପଣଙ୍କ ଦାସ ମୋʼ ପିତା ନିକଟକୁ ଗଲେ, ଯଦି ସେହି ବାଳକ ଆମ୍ଭମାନଙ୍କ ସଙ୍ଗରେ ନ ଥିବ — କାରଣ ତାହାର ପ୍ରାଣ ସେହି ବାଳକର ପ୍ରାଣ ସଙ୍ଗେ ବନ୍ଧା ଅଛି — ³¹ତେବେ ସେ ବାଳକ ନ ଥିବାର ଦେଖି ସେ ମରିଯିବେ, ପୁଣି ଆପଣଙ୍କ ଦାସମାନେ ଆପଣଙ୍କ ଦାସ ଆମ୍ଭମାନଙ୍କ ପିତାଙ୍କ ପକ୍ଵ କେଶ ଶୋକରେ କବରକୁ ଓହ୍ଲାଇ ନେବୁ। ³²କାରଣ ଆପଣଙ୍କ ଦାସ ଆପଣା ପିତା ନିକଟରେ ସେହି ବାଳକ ବିଷୟରେ ଜାମିନ ହୋଇ କହିଥିଲା, ‘ମୁଁ ତାହାକୁ ଆପଣଙ୍କ ନିକଟକୁ ଫେରାଇ ନ ଆଣିଲେ ଯାବଜ୍ଜୀବନ ମୋʼ ପିତା ନିକଟରେ ଏହି ଅପରାଧ ବହିବି।’ ³³ଏଣୁ ବିନୟ କରୁଅଛି, ସେହି ବାଳକ ବଦଳେ ଆପଣଙ୍କ ଏହି ଦାସ ମୋʼ ପ୍ରଭୁଙ୍କ ଦାସ ହୋଇ ରହୁ, ପୁଣି ସେ ବାଳକ ଆପଣା ଭାଇମାନଙ୍କ ସଙ୍ଗରେ ଫେରିଯାଉ। ^b b v33 ଯିହୂଦା ବିନ୍ୟାମୀନଙ୍କ ସ୍ଥାନରେ ଆପଣା ଜୀବନ ଅର୍ପଣ କରନ୍ତି — ଇସ୍ରାଏଲର ଜଣେ ପୁତ୍ର ଦ୍ଵାରା ପ୍ରଥମ ଶାସ୍ତ୍ରୀୟ ବଦଳ। ଯିହୂଦା ବଂଶର ସିଂହ ଯୀଶୁ କ୍ରୁଶ ଉପରେ ଆମ୍ଭମାନଙ୍କ ସ୍ଥାନ ଗ୍ରହଣ କରି ଏହି ନମୁନା ସଫଳ କରନ୍ତି। ³⁴ସେ ବାଳକ ବିନା ମୁଁ କିପ୍ରକାରେ ମୋʼ ପିତା ନିକଟକୁ ଫେରିଯିବି? ମୋʼ ପିତାଙ୍କ ପ୍ରତି ଘଟିବା ବିପଦ ମୁଁ ଦେଖିବାକୁ ସହ୍ୟ କରିପାରିବି ନାହିଁ।”