Otsak 7

7 ¹Chieina pāngmon akhokana ngahāna, "Otbing hi mashungla?"

²Stephenna hānga, "Ivānao ngarā kala ishāvā ngarā, khanganāmilu: ishāvā Abraham Haranli mapamrangsai Mesopotamiali leilakha, tekhamateiwui ithumwui Avāna ali samphanga,

³kala ali hānga, 'Nawui ngalei kala nawui theisābing chihohailaga, ina nali theingasakra ngaleili vālu.'

⁴Ana Babylonnaobingwui ngalei chihohailaga Haranli sompama. Awui avāva̱ thikahaiwui thili, ithumwui Avāna ali apam chiwui eina, nathum ara pamda khalei ngalei hili khuirāhaira. ⁵Ana chili shimlui khikha mamimana, phei ngasokapam akha eina tangda mamimana; kha atam chitharan ana nao maleisālala, ali kala awui thili awui ara̱-azāli shimlui sāda mira da ngashithaowa. ⁶Kala ithumwui Avāna, awui ara̱-azā athumwui lam makhaningli ramkazata sāda leira, kala athumli rao sāngasakta sāshilak eina zingkum shāmati rekharekra da hānga.

⁷'Athumna otram ngatha̱ yur chili ina bichar sāra,' da ithumwui Avāna hānga, 'kala chiwui thili, athum thānshokta apam hili ili khorumra.'

⁸Ana ali ahui rimkashokwui tuingashit mi. Abrahamna Isaacli pharai kala kachishatathang ali ahui rimshokhaowa; Isaacna Jacobli pharai, kala Jacobna avā ngarā tharāda khanili pharai.

⁹Ishāvā ngarāna Josephli yuishida ali Egyptli yorsanga, kha ithumwui Avāna ali ngasomi, ¹⁰kala awui kakhanang saikorawui eina ali ngatangmi, kala Egyptwui awunga Pharaohwui mangāli ngahānkhangai kala thangkhamei ali mi; Pharaohna ali Egypt kala awui shimkhur katongawui rammunga sāngasaka. ¹¹Egypt kala Canaan ngalei katongali zāt kasak kala kakhanang tarākha samphanga, kala ishāvā ngarāna kashakazā masamphangthuwa. ¹²Egyptli kashakazā lei da shālaga, Jacobna ishāvā ngarāli rida apam chili chihovāhaowa. ¹³Kakhanethang athum kharā tharan, Josephna achinā ngarāli akhalatta theingasak, kala Pharaohna Josephwui shimkhurwui pong theihaowa. ¹⁴Josephna avāva̱ Jacob kala awui theisābing saikora, mi katonga hangshinida phangā, hokhui khavai chihovāhaowa.

¹⁵Chieina Jacob Egyptli tāhaowa, kala ana kala ishāvā ngarā thihaowa. ¹⁶Athumli Shechemli khuivāda, Shechemli Hamorwui naomayarabingwui eina Abrahamna lupāsā eina lokakhui chikhurli chifahaowa.

¹⁷Ithumwui Avāna Abrahamli ngashit kahai atam vānganaiuda, Egyptli mibing haksangda mataisanghaowa, ¹⁸Egyptwuitungli Josephli matheila awunga khangatei akha ngakarthuranglakha eina tangda. ¹⁹Awunga hina ithumwui yurli kateizā kala ishāvā ngarāli sāshilak eina sai, kala athumwui angangnaobing thipaishina horhaipai khavai sāngasaka.

²⁰Atam chitharan Moses pharāhaowa, kala ana ithumwui Avā miktāli khamathā naona. Ali avāva̱wui shimli kachāng kathum sākhangaruma. ²¹Ali horhai tharan, Pharaohwui naongalāva̱na ali khuivāda awui nao sāhaowa, kala akhalattawui naomayara thada sākhangaruma. ²²Mosesli Egyptwui thangkhamei saikora tamchitheihaira, kala ana tui kala otli pangshap khalei mina.

²³A zingkum hangmati kāshunga tharan, ana achinā ngarā, Israelwui naomayarabingli yaovā khavai tuitak khui. ²⁴Athum akha khayon kasā theilaga, ana rekharek kahai mipā chili mashungrik eina sāda, Egyptnaopā chili sāthatta ali athut khuimi. ²⁵Ithumwui Avāna awui pāng eina athumli huikhami khamila kaji achinā ngarāna bhap tāra da ana phaningsai; kha athumna bhap matārarmana.

²⁶Akhama kathā athum rai ngararlakha tharan ana rākaida, athumli ngashim ngasak khavai ngarāna, hānga, "Mibing, nathum chinaongarāna. Khisāda nathum akha eina akha khayon sākhala?" ²⁷Kha khongnainaoli khayon kasā mipā china Mosesli pharthaihailaga hānga, "Khipāna nali ithumwuitungli khamunga kala bichar kasā sāngasakkhala? ²⁸Ayā Egyptnaopā chili nana sāthat thāda, ili sāthat khavai ningngaila?" ²⁹Kahāng hi shālaga Moses yāmhaowa, kala Midian ngaleili ramkazata sāda pamhaowa, chili naomayara khani pharai.

³⁰Zingkum hangmati kākapei eina, Sinai Kaphung lamhāngli kachui thingrong akhawui meiwon alungli ali kazingrao akha samphanga. ³¹Mosesna chi theilaga matakhakhaowa; theimida yang khavai rānganai tharan, ithumwui Avāwui akhon ali rāhānga:

³²"Iya nashāvā ngarāwui Vare, Abraham, Isaac, kala Jacobwui Vare." Moses ngacheeda kathirririhaowa, yang khavai makaharmana. ³³Chieina ithumwui Avāna ali hānga, "Nawui pheiwui eina pheihop khuitha̱lu, kaja na nganinglakha apam chi kathara ngaleina." ³⁴Egyptli iwui mibingwui kakhanang ina kachangkhat theihaira, kala athumwui ringkhangā shāhaira, kala athumli kanmi khavai tāhaira. Ara vālu—ina nali Egyptli kachihona.

³⁵'Khipāna nali khamunga kala bichar kasā sākahaikhala?' da hāngda athumna khalan kahai Moses hi, thingpom chiwui eina ali samphangkahai kazingraowui pāng eina ithumwui Avāna khamunga kala ngatangkhame khani sāda chihovā kahaina. ³⁶Mipā hina Egypt ngaleili, Red Seali, kala lamhāngli zingkum hangmati matakhak kahai ot kala machutkakhui sāda athumli thānshoka. ³⁷Hi Moses chi laka, ana Israelnaobingli hānga, 'Ithumwui Avāna nathumwui vang, nathumwui vānao ngarāwui eina, I thada marān akha shokngasakra.' ³⁸Hi a chi laka, lamhāngli yarui kazipli, Sinai Kaphungli ali khangazeka kazingrao chila ngasoda, kala ithumwui avā ngarāla ngasoda leisai; ana ithumli khami khavai kharinga tui samphanga.

³⁹Ithumwui avā ngarāna ali kahāng nganā khavai mamayāthuwa; ali khalanhaida, athumwui wuklungli Egyptshong ngalanhaowa, ⁴⁰Aaronli hānga, 'Ithumwui mangāli vā khavai varebing sāmilu. Ithumli Egypt ngalei chiwui eina khuivaikashoka Moses hi, ali khisa kharāhaira kaji ithumna matheithura.' ⁴¹Chi atamli athumna seinao akha sākhui, meoma̱li pha̱kaphayā chigata, kala athumwui pāng eina sākahai chili ringphārumhaowa. ⁴²Kha ithumwui Avāna ngareikhuida, kazingramwui ashangva̱li khorum khavai athumli vaingasaka, marānbingwui lairikli kapihaida lei kahai thada: 'O Israelwui shimkhur, lamhāngli zingkum hangmati nathumna ili taithat kahai sā kala pha̱kaphayā khuirāra? ⁴³Molochwui kachonshim kala nathumwui vare Rephanwui sirā, chibingli khorum khavai nathumna semhai meoma̱bing, nathumna phunga; chiwui vang eina Babylon kānda katāva̱li ina nathumli khuithuira.'

⁴⁴Mosesli khangazeka a china sākhavai kaso kahai thada, ana theikahai athishurda, ithumwui avā ngarāna lamhāngli shākhiwui kachonshim leisai. ⁴⁵Ithumwui avā ngarāna, athumwui thili, Joshuala ngasoda chi khuizanga, ithumwui Avāna athumwui mangāli kashamshoka miyurbingli athumna ngapaikhui atamli. David atambing eina tangda chithāda leisai, ⁴⁶ana ithumwui Avāwui mangāli ngahānkhangai mi ngasāsai, kala ithumwui Avāwui vang pamkhavai akha sākhui khavai poi. ⁴⁷Kha Solomonna awui vang shim sai. ⁴⁸Chithālala Juikhamatai chi miwui pāng eina sākahai shimbingli mapammana, marānna hānga kahai thada:

⁴⁹'Kazingram iwui wungpamkhong laka, kala ngalei iwui pheizingli laka. Nathumna iwui vang khisa shim sārakhala, da ithumwui Avāna hānga, lah iwui ngasāmkakhui pam chi khikhala? ⁵⁰Iwui pāngna hibing saikora sākahai maningmala?'

⁵¹"Nathum ning khamakangbing, wuklung kala khanāli ahui marimkashokbing, atam kachida Manglā Katharali ngasunga. Navā ngarā thada nathumna chithāda sai. ⁵²Navā ngarāna marānbing khipā chili marekharekmana? Khamashungawui kharā sāngngarānda hāshok kahaibing chili athumna shaothathaowa. Ara nathumna ali yansaida shaothathaira. ⁵³Nathumna kazingraobingwui mangā eina ain chi samphangkahaina, chithālala chi mamayonmana."

⁵⁴Ara athumna hi kashā eina malungkangnāhaida, ali ahā tarichithei. ⁵⁵Kha Stephenna Manglā Kathara pemtinghaoda kazingramshong yangkāda, ithumwui Avāwui tekhamatei kala ithumwui Avāwui yāshong Jishu khanganing chi theihaowa. ^a a v55 Stephenna kazingramli ithumwui Avāwui ngalemli Jishu khanganing chi thei — Anaona Avāwui yāshongli khayākakā chi samphanga, Avā thada akha maningla, chithālala awui tekhamatei ngarumna.

⁵⁶Kala ana hānga, "Yanglu, ina kazingram shokahai kala miwui Naomayara ithumwui Avāwui yāshong khanganing chi thei."

⁵⁷Kha athumna panglāk eina vaophokuwa, kala athumwui khanā khaluiphinda awuishong ngasamvai. ⁵⁸Athumna ali keinung chiwui eina shimenshokta lunggui eina horthathaowa. Shākhibing china athumwui kashankachon Saul kaho yaronnao akhawui pheizingli sangserhaowa.

⁵⁹Kala athumna ali lunggui eina horthat tharan, Stephenna khangakao eina hānga, "Proho Jishu, imanglā samphangmilu." ^b b v59 Thihai tharan, Stephenna awui manglā Jishuli horsangna — hi Jishu khalattana khrusli Avāli seihā sākahai tui china (Luke 23:46). Hi Jishuli seihā sāki kaji ali Proho da khamayā thāki chilaka.

⁶⁰Khuktizangda ana panglāk eina vaoda hānga, "Proho, hi morei chi athumwuitungli masāmilu." Chiwui thili ana pisanghaowa.