Phang'ano ya Baba Pakutongwa

Pidabvundzwa iye khala milandu ndi ya cadidi, Stefano atawira na nkhani yonsene ya Izarayeli: Baba wathu kuonekera kuna Abhrahamu, Zuze, Mozeji akhondiwa na anthu ace ene, mwana wa ng'ombe wa oro, nyumba yakuti nee ikhafunika. Iye alonga kuti anyakumbvesera ndi anyakuthaxa a apai awo. Iwo amponya miyala, mbwenye iye aapemphera kulekererwa.

Kapitulu 7.

Na tenepo nyantsembe mukulu abvundza kuti: “Pinthu ipi ndi pyandimo mwene?”

Stefano alonga kuti: “Abale na ababa, bverani: Baba wathu wa mbiri aonekera kuna baba wathu Abhurahamu ku Mesopotamiya, mbadzati kukhala ku Harani,

mbampanga kuti: 'Buluka mu dziko yako na abale ako, mbuenda ku dziko inati kukupangiza Ine.'

Iye abuluka mu dziko ya Ababhiloniya mbakhala ku Harani. Pidafa baba wace, Baba wathu ambulusa penepo mbampiteka mu dziko ino imbakhala imwe cincino. Hampasa unthaka mu dziko imweneyi tayu, nkhati mbuto yakukwana ca mwendo tayu—mbwenye ampikira kuti dziko ineneyi inadzakhala yace na ya mbeu yace yakudza buku yace, maseze iye akhonda kukhala na mwana. Na tenepo Baba wathu alonga kuti mbeu yace inadzakhala alendo mu dziko yakukhonda khala yawo, mbaacitwa abitcu mbaatcungamira pyaka madzana manai.

'Ine ndinaatonga mbumba inaatumikira iwo,' Baba wathu alonga, 'na buku, anati kubuluka mbandilambira pa mbuto ino.'

Ampasa cibverano ca kusidzwa. Abhurahamu abala Izaki mban'sidza pa ntsiku yacisere; Izaki abala Djakobe, Djakobe mbabala ambuya khumi na awiri.

Ambuya, mbacitira Zuze bibvu, an'gulisa toera aendeswe ku Edjipitu, mbwenye Baba wathu akhali na iye, mbampulumusa m'mabvudzo ace onsene, ampasa kukoma ntima na udziwi pamaso pa Farawo mambo wa Edjipitu, adan'ikha kukhala ntongi wa Edjipitu na wa nyumba yonsene ya Farawo. Njala na kutcungamira kukulu kwagwa pa Edjipitu yonsene na pa Kanani, mbwenye ababa athu nee agumana cakudya tayu. Djakobe pidabva iye kuti ku Edjipitu kukhali na tirigu, atuma ababa athu kweneko kakutoma. Pa ulendo waciwiri, Zuze adzidziwisa kuna abale ace, na Farawo adziwa pya banja ya Zuze. Na tenepo Zuze atumiza mphangwa kuna baba wace Djakobe na abale ace onsene, anthu makumanomwe na axanu.

Na tenepo Djakobe atcita ku Edjipitu, mbafa, iye na ababa athu. Iwo abwereswa ku Sikemu, mbaikhwa m'nthumbi idagula Abhurahamu na parata kuna ana a Hamori ku Sikemu.

Pidafendedzera n'dzidzi wa cipikiro cidapereka Baba wathu kuna Abhurahamu, mbumba yakula mbiyathimizika ku Edjipitu, mpaka pidabuluka mambo unango pa Edjipitu akhonda kudziwa Zuze. Mambo uyu aphatisa basa dzindza yathu mwauphanga mbatcungamira ababa athu, mbaakakamiza toera asiye anawo ang'ono toera afe.

Mu ndzidzi unoyu Mozeji abalwa, wakubalika pamaso pa Baba wathu. Akuzwa miyezi mitatu n'nyumba mwa baba wace. Na tenepo pidataiwa iye, mwana wankazi wa Farawo an'kwata mban'kuza ninga mwana wace ekhene. Mozeji apfundziswa udziwi onsene wa Aedjipitu, mbakhala na mphambvu mu mafala na mu macitiro.

Pidakwana iye pyaka makumanai, asankhula kuenda kacedza abale ace, ana a Izarayeli. Pidaona iye m'bodzi wa iwo mbatcungamirwa, antsidzikiza munthu akhatcungamirwa mbam'bwezera mwa kupha Mwedjipitu. Iye akhanyerezera kuti abale ace mbadabvesesa kuti Baba wathu akhaapasa upulumuki kubulukira m'manja mwace, mbwenye iwo nee abvesesa tayu.

Mangwana mwace aagumana mbakhamenyana, mbayesera kuabverzanisa, mbalonga kuti: 'Amuna, imwe ndimwe abale. Thangwi yanji musacitirana pyakuipa unango na ndzace?' Mbwenye munthu akhacitira ndzace pyakuipa akankha Mozeji pa mbali, mbalonga kuti: 'Mbani adakuikha iwe ntongi na nyakutonga wathu? Kodi usafuna kundipha ninga mudapha iwe Mwedjipitu dzulo?' Pidabva iye fala ineneyi, Mozeji athawa mbakhala ninga mlendo mu dziko ya Midiyani, komwe abala ana awiri.

Pakupita pyaka makumanai, anju aonekera kuna iye n'thando wa phiri ya Sinai, mu malirimo a nthengo ikhapserera moto. Mozeji pidaona iye, adzumatirwa; mu kufendedzera toera aone mwadidi, fala ya Baba wathu yabwera:

'Ine ndine Mulungu wa ababa ako—Mulungu wa Abhurahamu, Izaki na Djakobe.' Mozeji akhukhuta, mbakhonda kukhwimika toera kuona. Na tenepo Baba wathu ampanga kuti: 'Bvula nkhwabvu mu miyendo mwako, thangwi mbuto inaimira iwe ndi mataka akucena.' Ndaona ndimo mwene kutcungamira kwa mbumba yanga ku Edjipitu, ndabva kudungunya kwawo, mbndatcita toera kuapulumusa. Cincino ndoko—Ine ndinakutuma ku Edjipitu.

Mozeji uyu, adakhondwa na iwo, mbalonga kuti: 'Mbani adakuikha ntongi na nyakutonga?'—uyu ndiye adatumwa na Baba wathu toera akhale ntongi na nyakupulumusa, kubulukira m'manja mwa anju adaonekera kuna iye mu nthengo. Munthu uyu aatsogolera kubuluka, mbacita pyakudzumatirisa na piratizo mu dziko ya Edjipitu, pa Bara Yakufwira, na n'thando mu pyaka makumanai. Uyu ndi Mozeji adapanga ana a Izarayeli kuti: 'Baba wathu anati kukumuselani mprofeta ninga ine kubulukira muna abale anu.' Uyu ndiye adakhala pa mbungano n'thando pabodzi na anju akhalonga na iye pa phiri ya Sinai, na pabodzi na ababa athu—iye atambira mafala a umaso toera kutipasa ife.

Ababa athu akhonda kum'bvera; iwo an'khonda mbabwerera na mitima yawo ku Edjipitu, mbapanga Aroni kuti: 'Ticitireni milungu inati kutitsogolera. Mbwenye Mozeji uyu adatibulusa mu dziko ya Edjipitu, ife nkhabe kudziwa pidamucitikira.' Mu ntsiku zenezire acita mwana wa ng'ombe, mbapereka ntsembe kuna cifanikiso, mbasekerera pyakucita na manja awo ene. Mbwenye Baba wathu aafulatira, mbaapereka toera alambire nyenyezi za kudzulu, ninga mudalemberwa m'bukhu ya aprofeta: 'Kodi mwandibweresera pinyama pyakupha na ntsembe mu pyaka makumanai n'thando, imwe nyumba ya Izarayeli? Imwe mwathukula tenti ya Moloki, na nyenyezi ya mulungu wanu Refani, pifanikiso pidaceka imwe toera kupilambira; natenepo ndinakuthamangisani kutali, kuseri kwa Bhabhiloni.'

Ambuya athu akhali na tenti ya umboni n'thando, ninga ule adalonga na Mozeji ampanga toera kuicita, mwakubverana na citsanzo cidaona iye. Ababa athu, pontho, aipitisa pabodzi na Djozwe pidatambira iwo dziko ya mitundu idathamangisa Baba wathu patsogolo pawo. Pyakhala tenepo mpaka ntsiku za Dhavidhi, adagumana kukoma ntima pamaso pa Baba wathu mbaphemba toera agumane mbuto yakukhalira Baba wathu. Mbwenye akhali Salomoni adanmangira nyumba. Mbwenye Wapadzulu Kakamwe nkhabe kukhala m'nyumba zakumangwa na manja a anthu, ninga mudalonga mprofeta:

'Kudzulu ndi mpando wanga waumambo, na dziko ndi pakuponya miyendo yanga. Ndi nyumba yanji inati kundimangira imwe, alonga Baba wathu, peno iponi mbuto yakupumira kwanga? Kodi si manja anga adacita pinthu pyonsene ipi?'

“Imwe anthu akuuma nsolo, akukhonda sidzwa pa mitima na pa makutu, ndzidzi onsene musapokanya Nzimu Wakucena—ninga ababa anu, ndi tenepo mphapo imwe. Ndi mprofeta upi mwa aprofeta wakuti ababa anu nee antcungamira? Iwo apha ale adadziwisa mwakutoma kubwera kwa Nyakulungama—ule adaperekwa na imwe mbamupha cincino. Imwe adatambira mwambo kubulukira kwa anju, mbwenye hamuukoyera tayu.”

Pidabva iwo pinthu ipi, aipirwa kakamwe, mban'kukutira mano awo. Mbwenye Stefano, wakudzala na Nzimu Wakucena, ayang'ana kudzulu mbaona mbiri ya Baba wathu, na Yezu adaimira ku dzanja yamadyo ya Baba wathu. ^a

Na tenepo alonga kuti: “Onani, ndinaona kudzulu kwakufunguka na Mwana wa Munthu adaimira ku dzanja yamadyo ya Baba wathu.”

Mbwenye iwo akhuwa na fala ikulu, mbatsindikira makutu awo, mbathamangira kuna iye pabodzi. Am'bulusa kunja kwa nzinda mbam'ponya na miyala. Amboni aikha nguwo zawo pa miyendo pa phale m'bodzi wakucemerwa Saulo.

Mu kumponya kwawo na miyala, Stefano akhuwa kuti: “Mbuya Yezu, tambirani nzimu wanga.” ^b

Mbagodama, akhuwa na fala ikulu kuti: “Mbuya, lekani kuawerengera dawo ili.” Penepo agona.