Istwa Papa a devan tribinal la

Lè yo mande l si akizasyon yo vre, Etyèn reponn ak tout istwa Izrayèl la: Papa nou parèt devan Abraram, Jozèf, Moyiz pwòp moun pa l rejte, yon ti bèf an lò, yon tanp ki pa t janm nesesè. Li di moun k ap koute l yo se eritye zansèt yo. Yo kalonnen l ak wòch, epi li mande padon pou yo.

Chapit 7.

Lè sa a, granprèt la mande l: “Èske bagay sa yo se vre?”

Etyèn di: “Frè m yo ak papa m yo, koute. Papa nou ki gen glwa a te parèt devan Abraram, zansèt nou an, lè l te nan peyi Mezopotami, anvan l te al rete lavil Karan,

li di l: ‘Kite peyi ou ak fanmi ou, al nan peyi mwen pral montre ou a.’

Li kite peyi moun Babilòn yo, l al tabli lavil Karan. Apre papa l mouri, Papa nou fè l kite kote sa a pou l vin nan peyi kote nou rete jòdi a. Li pa t ba li anyen ladan l pou eritaj, pa menm yon ti kote pou l mete pye l. Men, li te pwomèt l ap ba li peyi a pou li menm ak pitit pitit li yo apre li, pou yo fè l pa yo, atout li pa t gen pitit. Papa nou te di pitit pitit li yo t ap vin etranje nan yon peyi ki pa pou yo, y ap fè yo tounen esklav, y ap maltrete yo pandan katsan (400) an.

‘M ap jije nasyon y ap sèvi a,’ Papa nou di, ‘epi apre sa, y ap soti pou yo vin adore m nan kote sa a.’

Li ba li kontra sikonsizyon an. Se konsa Abraram vin papa Izarak, li sikonsi l sou wityèm jou a; Izarak vin papa Jakòb, Jakòb vin papa douz zansèt yo.

Zansèt yo t ap fè jalouzi sou Jozèf, yo vann li pou l al nan peyi Lejip, men Papa nou te avèk li, li delivre l anba tout tray li yo, li fè l jwenn favè ak bon konprann devan farawon an, wa peyi Lejip la, ki mete l chèf sou peyi Lejip ak sou tout kay farawon an. Yon grangou ak yon gwo soufrans tonbe sou tout peyi Lejip ak peyi Kanaran, zansèt nou yo pa t jwenn manje. Lè Jakòb tande te gen ble nan peyi Lejip, li voye zansèt nou yo la premye fwa a. Dezyèm fwa yo tounen an, Jozèf fè frè l yo konnen se li menm, epi farawon an vin konnen fanmi Jozèf la. Apre sa, Jozèf voye chache Jakòb, papa l, ansanm ak tout fanmi l, swasannkenz (75) moun antou.

Jakòb desann nan peyi Lejip. Se la li mouri, li menm ak zansèt nou yo. Yo pote kò yo tounen lavil Sichèm, yo antere yo nan kavo Abraram te achte ak lajan nan men pitit Amò yo, nan lavil Sichèm.

Lè lè pwomès Papa nou te fè Abraram lan t ap pwoche, pèp la t ap grandi, li t ap peple nan peyi Lejip, jouk lè yon lòt wa ki pa t konnen Jozèf vin moute sou pouvwa nan peyi Lejip. Wa sa a pwofite sou ras nou, li maltrete zansèt nou yo, li fòse yo jete tibebe yo pou yo mouri.

Se lè sa a Moyiz te fèt, li te yon bèl pitit devan je Papa nou. Yo te okipe l pandan twa mwa nan kay papa l. Lè yo te lage l, pitit fi farawon an pran l fè l pitit li, li elve l tankou pwòp pitit gason l. Yo te montre Moyiz tout bon konprann moun peyi Lejip yo, li te gen pouvwa ni nan pawòl li ni nan zèv li.

Lè l te gen karantan, li deside al vizite frè l yo, pitit Izrayèl yo. Lè l wè yo t ap maltrete yonn nan yo, li pran defans nonm yo t ap peze a, li tire revanj pou li lè l touye moun peyi Lejip la. Li te kwè frè l yo t ap konprann se Papa nou ki t ap sove yo pa mwayen men l, men yo pa t konprann.

Nan denmen, li rive sou yo pandan yo t ap goumen, li te vle fè yo byen ankò, li di yo: ‘Mesye, nou se frè. Poukisa youn ap fè lòt tò konsa?’ Men, nonm ki t ap fè vwazen l tò a ba Moyiz yon bourad, li di l: ‘Kilès ki mete ou chèf ak jij sou nou? Èske ou vle touye m menm jan ou te touye moun peyi Lejip la ayè a?’ Lè Moyiz tande pawòl sa a, li kouri met deyò, l al viv tankou yon etranje nan peyi Madyan, kote li fè de pitit gason.

Karant an apre, yon zanj parèt devan l nan dezè toupre mòn Sinayi a, nan flanm yon ti pyebwa ki t ap boule. Moyiz sezi lè l wè sa; pandan l t ap pwoche pou l gade pi pre, vwa Papa nou rive nan zòrèy li, li di:

‘Se mwen menm ki Bondye zansèt ou yo, Bondye Abraram, Bondye Izarak, ak Bondye Jakòb.’ Moyiz pran tranble, li pa t menm gen kouraj pou l gade. Lè sa a, Papa nou di l: ‘Wete sandal ki nan pye ou, paske kote ou kanpe a se yon tè ki sen.’ Mwen wè ak je m jan pèp mwen an ap soufri nan peyi Lejip, mwen tande jan y ap plenyen, mwen desann pou m delivre yo. Koulye a, ale, m ap voye ou nan peyi Lejip.

Moyiz sa a, moun yo te voye jete lè yo te di: ‘Kilès ki mete ou chèf ak jij?’, se li menm Papa nou te voye tankou chèf e tankou moun pou delivre yo, pa mwayen men zanj ki te parèt devan l nan ti pyebwa a. Se nonm sa a ki fè yo soti, li t ap fè mèvèy ak mirak nan peyi Lejip, nan lanmè Wouj la, ak nan dezè a pandan karantan. Se Moyiz sa a ki te di pitit Izrayèl yo: ‘Papa nou ap fè leve yon pwofèt pou nou nan mitan frè nou yo, menm jan avè m.’ Se li menm ki te nan asanble a nan dezè a, ansanm ak zanj ki t ap pale avè l sou mòn Sinayi a, epi ak zansèt nou yo. Se li ki te resevwa pawòl ki vivan pou l te ban nou.

Zansèt nou yo pa t vle obeyi l; yo voye l jete, epi nan kè yo, yo tounen vè peyi Lejip, yo di Arawon: ‘Fè kèk bondye pou nou k ap mache devan nou. Paske Moyiz sa a ki te fè nou soti nan peyi Lejip la, nou pa konnen sa ki rive l.’ Nan jou sa yo, yo fè yon estati ti towo bèf, yo ofri bèt yo touye bay zidòl la, epi yo fè fèt pou sa men yo te fè a. Men, Papa nou vire do l ba yo, li lage yo pou yo adore zetwal ki nan syèl la yo, jan sa ekri nan liv pwofèt yo: ‘Èske se mwen nou te pote bèt nou touye ak ofrann pandan karantan nan dezè a, moun lakay Izrayèl? Nou te pote tant Molòk la ak zetwal Refan, bondye nou an, zidòl nou te fè ak men nou pou nou adore yo; se poutèt sa, m ap voye nou ale byen lwen lòt bò Babilòn.’

Zansèt nou yo te gen tant temwayaj la nan dezè a, jan sila a ki t ap pale ak Moyiz la te ba li lòd pou l fè l la, dapre modèl li te wè a. Zansèt nou yo, apre sa, antre avè l ansanm ak Jozye lè yo te pran peyi nasyon Papa nou te chase devan yo. Se konsa sa te ye jouk nan tan David la, David te jwenn favè devan Papa nou, li te mande pou l te ka jwenn yon kote pou Papa nou rete. Men, se Salomon ki te bati yon kay pou li. Men, Sila ki pi wo a pa rete nan kay moun fè ak men yo, jan pwofèt la di:

‘Syèl la se fotèy mwen, latè se ti ban anba pye m. Ki kalite kay nou ta bati pou mwen, se Papa nou ki di sa, osinon ki kote pou m poze kò m? Èske se pa men m ki fè tout bagay sa yo?’

“Nou menm moun tèt di, nou menm ki pa sikonsi ni nan kè ni nan zòrèy, nou toujou kenbe tèt ak Sentespri a. Menm jan zansèt nou yo te ye a, se konsa nou ye tou. Kilès nan pwofèt yo zansèt nou yo pa t pèsekite? Yo touye moun ki te anonse davans jan Moun ki Jis la t ap vini, Moun nou menm nou trayi epi nou ansasinen koulye a. Nou menm ki te resevwa lalwa a nan men zanj yo, epi nou pa t kenbe l.”

Lè yo tande pawòl sa yo, yo te fache anpil, yo t ap manje dan yo sou li. Men, Etyèn ki te anvayi ak Sentespri a, leve je l gade nan syèl la, li wè glwa Papa nou, epi li wè Jezi kanpe sou bò dwat Papa nou. ^a

Li di: “Gade, mwen wè syèl la louvri, epi mwen wè Pitit Moun nan kanpe sou bò dwat Papa nou.”

Men, yo pran rele byen fò, yo bouche zòrèy yo, epi yo tonbe kouri sou li ansanm. Yo mete l deyò lavil la, yo kalonnen l ak kout wòch. Temwen yo mete rad yo atè nan pye yon jènjan yo te rele Sòl.

Pandan yo t ap kalonnen l ak kout wòch, Etyèn t ap rele: “Senyè Jezi, resevwa lespri m.” ^b

Li mete ajenou, li rele byen fò: “Senyè, pa mete peche sa a sou kont yo.” Apre sa, li fèmen je l pou l mouri.