Otram ngatha̱ khavai mi shini kapangkhui
Greek tui matui ra̱meiva̱bingli thangthangwui kashakazāli yangkateomihaowa, kala kharop chi kachangkhatna. Katonga ngarāna ithumwui Avāwui tui hengsang malei khavai, ot chi shitkasanga mi shinili horsangmihaowa. Athumwui akha, Stephenna, kaphā eina ngahānkaida, yangkashebingna aman peida makapik mibing phāsanghaowa.
6 1Atam chitharan, sākhangatha̱bing mataisang tharan, Greek tui matui Jihudibingna Hebrewnaobingli kharopa, kaja thangthangwui kashakazā ngachaili athumwui ra̱meiva̱bing yangkateomihaowa. a a v1 "Greek tui matui Jihudibing" chi Gentilebing maningmana, kha athumwui khare tui kala khangachā chi Aramaic maningla Greek sākahai Jihudi shitkasangbingna — hi khangatei chiwui vang eina hili kapikahai yangkateomi chi ngashokna. 2Chieina katongabingna sākhangatha̱bing saikorali ngahokhuilaga hānga, "Ithumna tableli otram ngatha̱ khavai ithumwui Avāwui tui hengsang chi khamayā maningmana. 3Chiwui vang, ivānaobing, nathumwui ngachaili kasoa kaphā, Manglā Kathara kala thangkhamei pemtinghai mi shini kapangkhuilu, athumli hi otli ithumna kapangra. 4Kha ithumna seihā kasā kala tuiwui otram khangatha̱li ngalangzārra."
5Tui hi katonga saikorali ningyāng unga, kala athumna shitkasang kala Manglā Kathara pemtinghai Stephenli, Philip, Prochorus, Nicanor, Timon, Parmenas, kala Antiochwui ning khangachei mi Nicolausli kapangkhui. 6Athumna mi hibingli paokazatbingwui mangāli samphang ngasaka, kala paokazatbingna seihā sālaga athumtungli pāng parrormi.
7Ithumwui Avāwui tui mataisangda chungmei ngayaovai, kala Jerusalemli sākhangatha̱bing panglāk eina mataisanga; pāngmon kachungkhana shitkasangli kahāng nganāhaowa.
Yangkashebingna Stephenli tukkhui
8Chitharan lukhamashan kala pangshap pemting kahai Stephenna mibingwui ngachaili matakhak kahai ot hakmei kala khudam sāchithei. 9"Freedmen" da kaho synagogue chiwui mi kaikha, Cyrenewui mibing, Alexandriawui mibing, kala Cilicia eina Asia ngaleiwui mibing, thuinganingda Stephenli khangayāt khavai ngakarthui. 10Kha ana matui khalei thangkhamei kala Manglā chi athumna mangasungrarthuwa. 11Chieina athumna, "Moses kala Vareli mikhanam tui ana matui chi ithumna shāhaira" da hāng khavai mibingli ngathumda kasoi. 12Athumna mibing, ararbing kala ain kathembing ningli chingri ngasaklaga, awui ngachaili rāshungda ali tukkhui, kala ali hangva̱naobingwui mangāli mihaowa. 13Athumna minama shākhibing khuirā, hānga, "Mipā hina kathara pam hi kala ainli makhamayā matui chi katang makhavaimana. 14Kaja Nazarethwui Jishu hina apam hi sāshimānra, kala Mosesna ithumli mihairasai kasā khavābing ngacheida da matui chi ithumna shāhaira." 15Hanga̱shimli kapam mi saikorana ali yangtitlaga, awui mai chi kazingraowui mai kathā lei da theihaowa.
