ସେବା କରିବା ନିମନ୍ତେ ସାତ ଜଣ ମନୋନୀତ

ପ୍ରତିଦିନର ଖାଦ୍ୟ ବଣ୍ଟନରେ ଗ୍ରୀକ୍‌ଭାଷୀ ବିଧବାମାନେ ବାଦ୍ ପଡ଼ୁଛନ୍ତି, ଆଉ ଅଭିଯୋଗଟି ସତ୍ୟ। ବାରଜଣ ସେହି କାମ ସାତ ଜଣ ବିଶ୍ୱସ୍ତ ଲୋକଙ୍କୁ ଦିଅନ୍ତି ଯେପରି ଆମ ପିତାଙ୍କ ବାକ୍ୟ ବନ୍ଦ ନ ହୁଏ। ସେମାନଙ୍କ ମଧ୍ୟରୁ ଜଣେ, ସ୍ତିଫାନ, ଏତେ ଭଲ ଯୁକ୍ତି କରନ୍ତି ଯେ ବିରୋଧୀମାନେ ଟଙ୍କା ଦେଇ ମିଥ୍ୟାବାଦୀ ଲଗାନ୍ତି।

ଅଧ୍ୟାୟ 6।

ସେହି ସମୟରେ, ଶିଷ୍ୟମାନଙ୍କ ସଂଖ୍ୟା ବୃଦ୍ଧି ପାଇବାରୁ, ଗ୍ରୀକ୍‍ଭାଷୀ ଯିହୂଦୀମାନେ ଏବ୍ରୀୟମାନଙ୍କ ବିରୁଦ୍ଧରେ ବଚସା କରିବାକୁ ଲାଗିଲେ, କାରଣ ପ୍ରତିଦିନ ଖାଦ୍ୟ ବଣ୍ଟନରେ ସେମାନଙ୍କ ବିଧବାମାନେ ଅବହେଳିତ ହେଉଥିଲେ। ^a ସେଥିରେ ଦ୍ଵାଦଶ ଜଣ ସମସ୍ତ ଶିଷ୍ୟଙ୍କୁ ଏକତ୍ର ଡାକି କହିଲେ, “ଆମ୍ଭମାନଙ୍କ ପିତାଙ୍କ ବାକ୍ୟ ଅବହେଳା କରି ମେଜ ସେବା କରିବା ଆମ୍ଭମାନଙ୍କ ପକ୍ଷରେ ଉଚିତ ନୁହେଁ। ଅତଏବ, ହେ ଭାଇମାନେ, ତୁମ୍ଭମାନଙ୍କ ମଧ୍ୟରୁ ସୁଖ୍ୟାତିସମ୍ପନ୍ନ, ପବିତ୍ର ଆତ୍ମା ଓ ଜ୍ଞାନରେ ପରିପୂର୍ଣ୍ଣ ସାତ ଜଣ ପୁରୁଷଙ୍କୁ ମନୋନୀତ କର, ଯେଉଁମାନଙ୍କୁ ଆମ୍ଭେମାନେ ଏହି କାର୍ଯ୍ୟରେ ନିଯୁକ୍ତ କରିବୁ। କିନ୍ତୁ ଆମ୍ଭେମାନେ ପ୍ରାର୍ଥନା ଓ ବାକ୍ୟର ସେବାରେ ଆପଣାମାନଙ୍କୁ ନିବିଷ୍ଟ ରଖିବୁ।”

ଏହି କଥା ସମସ୍ତ ସମାଜଙ୍କୁ ସନ୍ତୁଷ୍ଟ କଲା, ଆଉ ସେମାନେ ବିଶ୍ଵାସ ଓ ପବିତ୍ର ଆତ୍ମାରେ ପରିପୂର୍ଣ୍ଣ ସ୍ତିଫାନଙ୍କୁ, ପୁଣି ଫିଲିପ୍ପ, ପ୍ରଖର, ନୀକାନର, ତୀମୋନ, ପର୍ମନା ଓ ଆନ୍ତିୟଖିଆରୁ ଆଗତ ଯିହୂଦୀ ଧର୍ମାବଲମ୍ବୀ ନିକଲାଙ୍କୁ ମନୋନୀତ କଲେ। ସେମାନେ ଏହି ଲୋକଙ୍କୁ ପ୍ରେରିତମାନଙ୍କ ସମ୍ମୁଖରେ ଉପସ୍ଥିତ କଲେ, ଆଉ ପ୍ରେରିତମାନେ ପ୍ରାର୍ଥନା କରି ସେମାନଙ୍କ ଉପରେ ଆପଣାମାନଙ୍କ ହସ୍ତ ଥୋଇଲେ।

ଆମ୍ଭମାନଙ୍କ ପିତାଙ୍କ ବାକ୍ୟ ବ୍ୟାପିଗଲା, ଆଉ ଯିରୂଶାଲମରେ ଶିଷ୍ୟମାନଙ୍କ ସଂଖ୍ୟା ଅତିଶୟ ବୃଦ୍ଧି ପାଇଲା; ଅନେକ ଯାଜକ ବିଶ୍ଵାସର ଆଜ୍ଞାବହ ହେଲେ।

ସ୍ତିଫାନ ଆପଣା ଶତ୍ରୁମାନଙ୍କ ଦ୍ଵାରା ଧୃତ

ଏଥିଉତ୍ତାରେ ଅନୁଗ୍ରହ ଓ ଶକ୍ତିରେ ପରିପୂର୍ଣ୍ଣ ସ୍ତିଫାନ ଲୋକମାନଙ୍କ ମଧ୍ୟରେ ମହା ଅଦ୍ଭୁତ କର୍ମ ଓ ଲକ୍ଷଣ ସାଧନ କରୁଥିଲେ। ସେତେବେଳେ ତଥାକଥିତ ସ୍ଵାଧୀନ ଲୋକମାନଙ୍କ ସମାଜଗୃହର କେତେକ — କୁରୀଣୀୟ, ଆଲେକ୍‍ଜାଣ୍ଡ୍ରୀୟ, ପୁଣି କିଲିକିଆ ଓ ଆସିଆ ଦେଶର ଲୋକମାନେ — ଉଠି ସ୍ତିଫାନଙ୍କ ସହିତ ବାଦାନୁବାଦ କରିବାକୁ ଲାଗିଲେ। ତଥାପି ସେ ଯେଉଁ ଜ୍ଞାନ ଓ ଆତ୍ମାଙ୍କ ଦ୍ଵାରା କଥା କହୁଥିଲେ, ତାହା ବିରୁଦ୍ଧରେ ସେମାନେ ଠିଆ ହୋଇ ପାରିଲେ ନାହିଁ। ସେତେବେଳେ ସେମାନେ ଗୋପନରେ କେତେକ ଲୋକଙ୍କୁ ଏହା କହିବାକୁ ଶିଖାଇଲେ, “ଆମ୍ଭେମାନେ ଏହାକୁ ମୋଶା ଓ ଈଶ୍ଵରଙ୍କ ବିରୁଦ୍ଧରେ ନିନ୍ଦାଜନକ କଥା କହିବା ଶୁଣିଅଛୁ।” ପୁଣି ସେମାନେ ଲୋକମାନଙ୍କୁ, ପ୍ରାଚୀନବର୍ଗଙ୍କୁ ଓ ଶାସ୍ତ୍ରୀମାନଙ୍କୁ ଉତ୍ତେଜିତ କରି, ତାହାଙ୍କ ଉପରେ ଆସି, ତାହାଙ୍କୁ ଧରି ମହାସଭା ସମ୍ମୁଖକୁ ଆଣିଲେ। ଆଉ ସେମାନେ ମିଥ୍ୟା ସାକ୍ଷୀମାନଙ୍କୁ ଆଣି କହିଲେ, “ଏହି ଲୋକ ଏହି ପବିତ୍ର ସ୍ଥାନ ଓ ବ୍ୟବସ୍ଥା ବିରୁଦ୍ଧରେ କଥା କହିବା କଦାପି ବନ୍ଦ କରେ ନାହିଁ। କାରଣ ଆମ୍ଭେମାନେ ତାହାକୁ ଏହା କହିବା ଶୁଣିଅଛୁ ଯେ, ନାଜରିତୀୟ ଏହି ଯୀଶୁ ଏହି ସ୍ଥାନ ବିନଷ୍ଟ କରିବେ ଓ ମୋଶା ଆମ୍ଭମାନଙ୍କୁ ଯେଉଁ ରୀତିନୀତି ସମର୍ପଣ କରିଅଛନ୍ତି, ତାହା ପରିବର୍ତ୍ତନ କରିବେ।” ତହିଁରେ ମହାସଭାରେ ବସିଥିବା ସମସ୍ତେ ତାହାଙ୍କ ପ୍ରତି ଏକଦୃଷ୍ଟିରେ ଚାହିଁ ତାହାଙ୍କ ମୁଖ ଦୂତଙ୍କ ମୁଖ ସଦୃଶ ଦେଖିଲେ।