ሐዋርያት ሥራ 6

6 ¹በዚያም ወራት ደቀ መዛሙርት እየበዙ ሲሄዱ፣ በየዕለቱ በሚደረገው የምግብ ክፍፍል መበለቶቻቸው ስለ ተዘነጉ ግሪክኛ ተናጋሪ አይሁድ በዕብራውያን ላይ አጒረመረሙ። ^a a v1 “ግሪክኛ ተናጋሪ አይሁድ” አሕዛብ ሳይሆኑ የመጀመሪያ ቋንቋቸውና ባህላቸው ከአራማይክ ይልቅ ግሪክ የሆነ አይሁዳውያን አማኞች ነበሩ፤ ይህም ልዩነት እዚህ የተገለጠውን ቸልተኝነት አስከተለ። ²ስለዚህ ዐሥራ ሁለቱ ደቀ መዛሙርትን ሁሉ በአንድነት ጠርተው እንዲህ አሉ፤ “ማእድ ለማገልገል ስንል የአባታችንን ቃል መተዋችን ተገቢ አይደለም። ³ስለዚህ ወንድሞች ሆይ፣ መልካም ምስክርነት ያላቸውን፣ መንፈስ ቅዱስና ጥበብ የሞላባቸውን ሰባት ሰዎች ከመካከላችሁ ምረጡ፤ ይህን ሥራ እንሾማቸዋለን። ⁴እኛ ግን ራሳችንን ለጸሎትና ቃሉን ለማገልገል እንሰጣለን።”

⁵ይህ ቃል ጉባኤውን ሁሉ ደስ አሰኘው፤ እምነትና መንፈስ ቅዱስ የሞላበትን እስጢፋኖስን መረጡ፤ እንዲሁም ፊልጶስን፣ ጶሮኮሮስን፣ ኒቃሮርን፣ ጢሞናን፣ ጳርሜናስንና ከአንጾኪያ ወደ አይሁድ ሃይማኖት የገባውን ኒቆላዎስን መረጡ። ⁶እነዚህንም ሰዎች በሐዋርያት ፊት አቀረቡ፤ እነርሱም ጸልየው እጆቻቸውን ጫኑባቸው።

⁷የአባታችንም ቃል እየተስፋፋ ሄደ፤ በኢየሩሳሌምም የደቀ መዛሙርት ቍጥር እጅግ በዛ፤ ከካህናትም እጅግ ብዙዎች ለእምነት ታዛዦች ሆኑ።

እስጢፋኖስ በጠላቶቹ ተያዘ

⁸እስጢፋኖስም ጸጋና ኀይል ሞልቶበት በሕዝቡ መካከል ታላላቅ ድንቅ ነገሮችንና ምልክቶችን ያደርግ ነበር። ⁹የተፈቱ ባሪያዎች ምኵራብ ተብሎ ከሚጠራው አንዳንዶች፣ የቀሬናና የእስክንድርያ ሰዎች፣ እንዲሁም ከኪልቅያና ከእስያ የመጡ ሰዎች ተነሥተው ከእስጢፋኖስ ጋራ ይከራከሩ ጀመር። ¹⁰ነገር ግን ይናገርበት የነበረውን ጥበብና መንፈስ መቋቋም አልቻሉም። ¹¹ከዚያም፣ “በሙሴና በእግዚአብሔር ላይ የስድብ ቃል ሲናገር ሰምተነዋል” እንዲሉ ሰዎችን በስውር አደረጁ። ¹²ሕዝቡንም፣ ሽማግሌዎቹንና ጸሐፍቱን አነሣሡ፤ ደርሰውበትም ያዙት፤ ወደ ሸንጎውም አመጡት። ¹³የሐሰት ምስክሮችንም አቅርበው እንዲህ አሉ፤ “ይህ ሰው በዚህ ቅዱስ ስፍራና በሕጉ ላይ ከመናገር ከቶ አይቦዝንም። ¹⁴ይህ የናዝሬቱ ኢየሱስ ይህን ስፍራ እንደሚያፈርስና ሙሴ ያስተላለፈልንን ልማዶች እንደሚለውጥ ሲናገር ሰምተነዋልና።” ¹⁵በሸንጎውም ተቀምጠው የነበሩ ሁሉ ትኵር ብለው ተመለከቱት፤ ፊቱም እንደ መልአክ ፊት ሆኖ አዩት።