Chwanlaang To Lang Sombali Bathainu
Greek chong rinnu tamei rwan ding nichan nichan munsaak som badam bi mutwan ongme, atiga haba tu tu tam tam ga batakka ongme. Mi pat somga kani nunna, ani Pa chong ga takan swak mak lang, haba chwanlaang ding balumsanu manpa sombali ding bachoi thang rwe. Bani lak pina pakhat, Stephen na, batakka ngamga chong kabia briakpina, bating munanu nunna man pinu karwak rinnu rwan ding kou hung rwe.
6 1Haba kaan bi, potroi rwan sing inku thou ongnu kaan bi, kani bathin munsaak som badam bi bani tamei rwan ding mutwan briakpina, Greek chong rinnu Jihudi rwanna Hebrew rwan maitwang bi tu tu tam tam ngaake. a a v1 “Greek chong rinnu Jihudi rwan” ga Gentile rwan to make atiyeda bani kamanu chong khatle chaang ga Aramaic to makka Greek to damnu Jihudi balumsanu rwan ye. Haba katei tanu gana heipai rin thangnu mutwannu pon thang rwe. 2Atiga chonglang sombani rwanna potroi rwan nun ding kou kadoiluga rinne, “Table bing chwanlaang to lang ani Pa chong ding anina intaam thangnu ga za make. 3Atibriakpina, unao rwan ga, hei chwan lang bi anina kathang swak dingnu, bameng sanu, Katha Bathiangnu khatle ningting sipnu manpa sombali ding nani lak pi som thang ngo. 4Atiyeda anina kalumnu bi khatle chong om chwanlaang bi ani sung khutlune.”
5Mi khang nunna haga lou thang rwe, atiga balumsanu khatle Katha Bathiangnu sipnu Stephen ding som rwe, khatle Philip, Prochorus, Nicanor, Timon, Parmenas, khatle Antioch lana Jihudi rwan pi gonnu Nicolaus le som rwe. 6Banina hei manpa rwan ding chonglang rwan khou bachoi thang rwe, atiga chonglang rwanna kalumluga bani lu chung bi bani kut kaising thang rwe.
7Ani Pa chong ga kazan swak rwe, atiga Jerusalem bi potroi rwan sing ga taswang khak lang inku thou rwe; tako rwan taswang khakna balumsanu ding chong zeiga ong rwe.
Bamunanu rwanna Stephen Namnu
8Atun Stephen, phaangkriang khatle ngam sipnu maan gana, mi nun lak pi tasiatnu chwan liannu khatle badannu bing to ngaake. 9Rang Tonu nun om Synagogue diga kounu haba lak pina kasemna—Cyrene rwan, Alexandria rwan, khatle Cilicia le Asia lana manpa rwan le—Stephen le kae kale lang thou thang rwe. 10Atiyeda maanna chong kabia ongnu ningting khatle Katha maitwang bi banina twei ngam mak ngaake. 11Habei ga banina manpa rwan khou inkamga chong pi thangluga rinne, “Anina maan Moses khatle Rikrwang maitwang bi Rikrwang meng sianu chong rinnu ngaisu rwe.” 12Banina mi nun, chwan phunnu rwan, khatle chongtan bachuthangnu rwan ding sung katop thang rwe; atiga bakhou hungluga bating namluga thampei rwan meithaan bi kalwang thou drwe. 13Banina kakoinu sake rwan ding kalwang khutluga rinne, “Heiba manpa gana hei bathiangnu riak khatle chongtan maitwang bi chong rinnu khatchale khaam make. 14Balangbe heiya Nazareth Jisu na hei riak ding kabiaa satlune khatle Moses na ani khou pi swak damnu chaang bing ding kalelune diga maan rinnu anina ngaisu rwe.” 15Thampei karung bi badung ongnu mi nun gana bating phaang dengga phaangluga bameithaan ga tambaan chonglang om meithaan danga amme dinu mu rwe.