Batu Tsambwadi Básolama mu Kusadila
Bafwidi bana bazonza Kingeleki bekala tala hika mu kukatula madya ma kosu kilumbu, amana kibokutu kya kyedika kyákala. Kumi yi bodi báhana kisalu kwena batu tsambwadi ba kyedika, hanga ndinga ya Tata wetu yisímanisa. Mosi mu kati dya bawu, Kitsyeni, wázonza ni ngangu tii bambeni bándanda bavunini bana báfutwa mbongu.
6 1Muna bilumbu bina, bwosu balonguki bakala vula, Bayuta bana bazonza Kingeleki bekabokuta kikuma kya Bahebelu, mukuma bafwidi ba bawu bákala tala hika mu kukatula madya ma kosu kilumbu. a a v1 Bayuta bana bazonza Kingeleki bákalaku baphani, kaasi bákala bakwikidi ba Kiyuta, bana ndinga ya bawu ya theti yi kikalulu kya bawu byákala bya Kingeleki, ka bya Kialameya ku. Luswaswanu meni lwina lwábuta kulenza kuna kuzonzibwa haha. 2Buna Kumi yi bodi bátedisa balonguki boosu ha kimosi amana bázimbula: «Dyafwaniku ni betu tulenza ndinga ya Tata wetu mu kusadila mesa. 3Buna, baphangi bama, lusola batu tsambwadi mu kati dya benu, bana bakwa mbangi ya mboti, bana babasa yi Kitembu Kyatoma yi ngangu, bana tukábasya mu kisalu meni kyaki. 4Kaasi betu, tukádihana mu bisambu yi mu kisalu kya ndinga.»
5Kimvuka kyosu kyatámbwasa mambu mana, amana básola Kitsyeni, wuna wákala wabasa Kitembu Kyatoma yi lukwikilu, yi Fidiphu, yi Pulokolu, yi Nikanolu, yi Timoni, yi Palamenasi, yi Nikolasi, muphakanu wa ku Atyosi. 6Bábasongila batu bana kwena bathumwa, bana bálombila amana bábasya moku ha bawu.
7Ndinga ya Tata wetu yámwangana, amana balonguki ku Yelusalemi bávula lawu; thalu ya lawu ya banganga Nzambi bákituka balemvukila lukwikilu.
Kitsyeni Wákwatwa kwena Bambeni Bandi
8Kitsyeni, mutu wabasa yi khenda yi ngolu, kakala sala bidimbu bya khumbwa bineni yi biphadi hana kati dya batu. 9Ndambu ya batu ba nzu ya lukutakanu yina bisi tela «Nzu ya lukutakanu lwa Baphwanza»—bisi Sileni, bisi Alekisandiliya, yi batu ba ku Sidisi yi ku Aziya—bálubuka mu kutendana yi Kitsyeni. 10Kaasi bálendaku kutelama kwena ngangu yi Kitembu kina kakala zonzila ni byawu. 11Buna bálwengisa batu mu kitsweki ndangu bazimbula: «Twámuyuka kazonza mambu ma mbi kikuma kya Moyize yi kikuma kya Nzambi.» 12Bavwadingisa batu, yi bambuta, yi balongi ba mitsiku; bisa kwena yandi, bámukwata amana bámunata ku thwala ya kimvuka kya bukheti. 13Bisa funda yi bambangi ba luvunu, bazimbula: «Mutu yayi kisiku lembwa kuzonza mambu ma mbi kikuma kya homa haha ha bukheti yi kikuma kya mitsiku. 14Mukuma twámuyuka kazonza ni Yesu yayi mwisi Nazaleti kakábunga homa haha amana kakásoba mikuku mina Moyize katusisila.» 15Boosu bana bakala sikuka mu kimvuka kya bukheti bámusimbulula amana bámona ni luse lwandi lwákala bonga luse lwa wanzyo.
