Otsak 5

5 ¹Ananias kaho mi akhana, apreiva̱ Sapphira ngasoda, lui akha yorhaowa. ²Ana aman mikahai khalattawui vang singtita, apreiva̱na theilaga, mikahai maningla khuiungda paokazatbingwui pāngli horsangmi. ³Kha Peterna hānga, "Ananias, khisāda Satanna nawui wuklung chipemda, Manglā Katharali kapik khavai kala ngalei chiwui aman mikahai singtit khavai ngasakkhala? ⁴Chi mayorrangsai chi nawui maningmala? Yorkahaiwui thili, aman chi na khalattana khuithui khavai nawui maningmala? Khisāda hi nawui wuklungli ngakukphoka? Na mibingli makapikmana, kha ithumwui Avāli kapikhaira." ^a a v4 Peterna Manglā Katharali kapik hi ithumwui Avāli kapikna da hāng tharan, Manglā chi Vare kacheta da chitheikhui — pangshap khamāng maningla, kha Vare khangatei khamāngna.

⁵Tui hi shālaga, Ananias ngaleili khaminda thihaowa; khangachee kahona chi kashā mi saikorali zanghaowa. ⁶Chieina yaronnaobing ngakarthuida, awui angun khaluihailaga, ali khuishokta chifahaowa. ⁷Pung kathum sha̱khawui thili khi shokkahaikhala da matheila apreiva̱ azanga. ⁸Peterna ali ngahāna, "Ili hānglu, nathumna lui chi himāng aman eina yorhaikhala?" Ana hānga, "Mha, chimāng aman eina yorhaowa."

⁹Chieina Peterna ali hānga, "Khisāda nani ithumwui Avāwui Manglā chāng tam khavai mijang khomkhala? Yanglu, nagahara chifabingwui phei khamongli nganinghaira, kala nala khuishokra."

¹⁰Ngalāngda ana awui pheili khaminda thihaowa. Yaronnaobing azanga, ali thikahai theida, ali khuishokta, agahara ngalemli chifahaowa. ¹¹Kala khangachee kahona church katonga kala ot saikora hi kashā mi saikorali shoksera.

Paokazatbing Eina Machut kala Matakhak Kahai Ot

¹²Paokazatbingwui pāng eina mibingwui ngachaili machut kala matakhak kahai ot kachungkha sāsera. Athum saikora Solomonwui yāngkhupli katonga ngarumkazipa. ¹³Khangateibing khipānakha athumtungli ngasozat khavai masālengmana, kha mibingna athumli reikhamatai khayāshi. ¹⁴Proholi shitkasang mi kachungkha, mayarnaola sha̱naola, mataisangda ngarumsanga, ¹⁵chiwui vang eina Peterna zatvā tharan awui khaya̱na athum kaikhawuitungli khaminmiranu da phaningda, athumna kakazānaobing chānreili khuishokta pet kala pettungli chipethai. ¹⁶Jerusalem kuimareida khalei keinungbingwui eina mi kachungkhala kakazānaobing kala makathar manglāna ningrāk ngasaka mibing khuirai, kala saikora raimisera.

Tukkhui, Chihomi kala Latunga

¹⁷Pāngmon kharei kala awui ngasotabing saikora, Sadducee mijang chi, ngakarthuida, athum yuikashina pemtinghaowa. ¹⁸Athumna paokazatbingli tukkhuida yaruiwui phātopli sanghaowa. ¹⁹Kha ngayā ithumwui Avāwui kazingrao akhana phātopwui khāmong sholaga athumli khuishoklaga hānga, ²⁰"Vālu, khorumshimli nganingda hi kharingawui tui saikora mibingli hānglu."

²¹Chi kashā eina athum kazing kathang eina khorumshimli zangda tamchitheiphokuwa. Pāngmon kharei kala awuili ngaso mibingna rā tharan, hangva̱nao kala Israelwui khararnaobing saikorali ngasoda kaziplaga, athumli khuirā khavai phātopli chihovā. ²²Kha khamayonbing rā tharan chili khipānakha maphāmana; athum latunglaga hānga, ²³"Ithumna phātop shungtitkahai, kala khamayonbing khāmongli nganingkasā phāhaira, kha shoda alungli khipānakha maphāmana."

²⁴Chi kashā tharan khorumshimwui khamayonbingwui kathāna kala pāngmon akhokabingna, hi kathada shokrakhala da matakhaklaga ningkashakhaowa. ²⁵Kachikathā mi akhana rāhānga, "Yanglu, nathumna phātopli sang kahai mibing khorumshimli nganingda mibingli tamchitheida lei!" ²⁶Chieina kathāna kala otva̱bingna vāda, mibingna athumli horthat khavai ngacheehaida khangama̱ maleila athumli khuirai. ²⁷Athumli khuirā kahaiwui thili, hangva̱nao mangāli khuivāda nganing ngasaka. Chieina pāngmon kharei china athumli ngahāna, ²⁸hānga, "Ming hi singda matamchitheilakalu da ithumna nathumli tuitak ningmihai, chithālala nathumwui tamkachithei eina Jerusalem chipemmihaira, kala mipā hiwui ashee ithumwuitungli khuirā khavai nathum ngaranda lei."

²⁹Kha Peter kala paokazatbing china ngahānkai, "Mikumowui mahutle ithumna ithumwui Avāwui kahāng nganāra. ³⁰Ithumwui shāvā ngarāwui Varena Jishuli ringshok ngasaka; ali nathumna thingtungli shaoshānda sāthatkahaina. ³¹Israelli ning ngateikhui kala morei pheomi samphangra khavai, ithumwui Avāna ali khamunga kala Huikhame sāda awui yashongli khāngchikata. ³²Ithum ot saikora hiwui shākhina, kala ithumwui Avāna awui kahāng nganā mibingli khakahai Manglā Katharala shākhina."

³³Chi kashā tharan athum malungvātlakhaoda athumli shaothat khavai ngangaiya. ³⁴Kha mibing saikorana khayā kaji ain tamkachitheia, Gamaliel kaho Pharisee akhana, hangva̱naobingli ngakarthuida, mibing chili kasha̱khawui vang kayāngli khuishok khavai kasoi. ³⁵Ana athumli hānga, "Israelnaobing, mipā hibingli nathum khi sākhavai jiura kaji chi phaningkazaklu. ³⁶Hi mamiranglakha, a kachikathā akha china da hānglaga Theudas shokhaowa; mi shāmati sha̱khana ali shurthuwa. A shaothat kahaina, awui athi kashurabing saikora ngapha̱ kahaowa, kala chi nothāhaowa. ³⁷Awui thili, mashing shānkhui atamli Galileepā Judas ngakarthuida yaruili awui thili khuithuihaowa. Ala thihaowa, kala ali shurbing saikora ngapha̱ kahaowa. ³⁸Ara ina nathumli kahāngna: mipā hibingwui eina chihochaohaolu kala aningkhānhaolu. Kaja hi khangarān jika ot chi mibingwui eina kharāna jiakha, chi nguithuihaora. ³⁹Kha chi ithumwui Avāwui eina kharāna jiakha, nathumna athumli masākhairarmara; nathum khalatta ithumwui Avāli ngasoda rai kasābing ngasāpaishina." Chieina athum ali suikhuihaowa.

⁴⁰Awui tuili suikhuihaida, athumna paokazatbingli hoda khuizanglaga, shaoshaomihailaga, Jishuwui ming eina mahāngalu da ningmilaga, athumli shokngasaka. ⁴¹Chieina athumna aming chiwui vang khayak ngasak khavai kānnā ngasāhaira da ringphālak eina hanga̱shimwui eina shokhaowa. ⁴²Thangkachida, khorumshimli kala shim kachiva̱li, athumna Khrista chi Jishu china da tamchithei kala paokaphā hāshok chi mangasāmthuwa.