ኣብ ቅድሚ ኣቦ ዝተገብረ ተንኰል

ሃናንያን ሰጲራን ርስቲ ሸጡ፥ ገሊኡ ብሕቡእ ኣትሪፎም፥ ካልእ ተዛሪቦም፥ ንኣቦና ስለ ዝሓሰዉ ተደፊኦም ሞቱ። ፍርሓት ተዘርግሐ፥ ህዝቢ ግና ገና ሕሙማቶም የምፅኡ ነበሩ። እቶም ሃዋርያት ደጊሞም ተኣሲሮም፥ ብለይቲ ብመልኣኽ ተፈቲሖም፥ ተገረፉ፥ ስለ ስሙ ኽዋረዱ ብምብቅዖም እናተሓጐሱ ኸዓ ካብ ባይቶ ወፁ።

ምዕራፍ 5።

ሃናንያ ዝስሙ ሓደ ሰብኣይ ግና፥ ምስ ሰበይቱ ሰጲራ ኾይኑ፥ ሓደ ርስቲ ሸጠ። ሰበይቱ እናፈለጠት ከዓ፥ ካብቲ ዋጋ ገሊኡ ንርእሱ ኣትሪፉ፥ ገሊኡ ጥራሕ ኣምፂኡ፥ ኣብ እግሪ ሃዋርያት ኣንበሮ። ጴጥሮስ ግና ከምዙይ በሎ፦ “ኦ ሃናንያ፥ ንመንፈስ ቅዱስ ክትሕሱ፥ ካብ ዋጋ እቲ መሬት ከዓ ገሊኡ ከተትርፍ፥ ስለ ምንታይ ሰይጣን ልብኻ መልኦ? ከይተሸጠ እንተሎ ናትካ ኣይነበረንዶ? ምስ ተሸጠ ኸዓ እቲ ገንዘብ ኣብ ስልጣንካዶ ኣይነበረን? ስለ ምንታይ ደኣ ነዝ ነገር እዙይ ብልብኻ ሓሰብካ? ንሰብ ኣይኮነን ዝሓሰኻ፥ ንኣቦና ደኣ እምበር።” ^a

ሃናንያ ኸዓ እዝ ቃላት እዙይ ምስ ሰምዐ፥ ተደፊኡ ሞተ፤ ኣብ ኵሎም እቶም ዝሰምዑ ድማ ዓብዪ ፍርሓት ኮነ። ሽዑ እቶም መንእሰያት ተሲኦም፥ ሬስኡ ጠቕሊሎም፥ ኣውፂኦም ቀበርዎ። ድሕሪ ሰለስተ ሰዓት ኣቢሉ ኸዓ፥ ሰበይቱ እቲ ዝኾነ እንተይፈለጠት ኣተወት። ጴጥሮስ ድማ “ነቲ መሬት ክንድዙይ ጌርኩም ዲኹም ዝሸጥኩምዎ? ንገርኒ” በላ። ንሳ ኸዓ “እወ፥ ክንድኡ” በለት።

ጴጥሮስ ድማ ከምዙይ በላ፦ “ንመንፈስ ኣቦና ኽትፍትኑ ስለ ምንታይ ተማኸርኩም? እንሆ፥ እግሪ እቶም ንሰብኣይኪ ዝቐበሩ ኣብ ኣፍ ደገ ኣለዉ፤ ንኣኺ እውን ከውፅኡኺ እዮም።”

ብኡ ንብኡ ኸዓ ኣብ እግሩ ተደፊኣ ሞተት። እቶም መንእሰያት ድማ ኣትዮም፥ ሞይታ ረኺቦም፥ ኣውፂኦም ኣብ ጐኒ ሰብኣያ ቐበርዋ። ኣብ ኵላ እታ ቤተ ክርስቲያን፥ ከምኡውን ኣብ ኵሎም እዝ ነገር እዙይ ዝሰምዑ ድማ፥ ዓብዪ ፍርሓት ኮነ።

ብኢድ ሃዋርያት ዝተገብረ ምልክትን ተኣምራትን

ብኢድ ሃዋርያት ድማ፥ ኣብ ማእኸል እቶም ህዝቢ ብዙሕ ምልክትን ተኣምራትን ይግበር ነበረ። ኵላቶም ከዓ ኣብ ገበላ ሰሎሞን ሓቢሮም ተኣከቡ። ካብቶም ካልኦት ሓደ እኳ ኽሕወሶም ኣይደፈረን፤ እቶም ህዝቢ ግና የኽብርዎም ነበሩ። ካብ ቅድሚኡ ዝበዝሑ ኣመንቲ፥ ብዙሓት ደቂ ተባዕትዮን ኣንስትዮን፥ ናብ ጐይታ ተወሰኹ፤ ስለዙይ ጴጥሮስ ክሓልፍ እንተሎ፥ እንተ ወሓደ ፅላሉ ኣብ ገሊኣቶም ምእንቲ ኽወድቕ እናተስፈዉ፥ ነቶም ሕሙማት ናብ ኣደባባያት ኣውፂኦም፥ ኣብ ዓራት ኮነ ኣብ ምንፅፍ የንብርዎም ነበሩ። ካብተን ኣብ ዙርያ ኢየሩሳሌም ዘለዋ ኸተማታት ድማ፥ ሕሙማትን በርኹሳት መናፍስቲ ዝሳቐዩን ሒዞም፥ ብዙሓት ሰባት መፁ፤ ኵላቶም ከዓ ሐውዩ።

ተኣሲሮም፥ ተፈቲሖም፥ ተመሊሶም

ሊቀ ካህናትን ኵሎም እቶም ምስኡ ዝነበሩ ወገን ሰዱቃውያንን ድማ ተሲኦም፥ ቅንኣት መልኦም። ነቶም ሃዋርያት ሒዞም ድማ፥ ኣብ ናይ ህዝቢ ቤት ማእሰርቲ ኣእተውዎም። ሓደ መልኣኽ ኣቦና ግና ብለይቲ፥ መዓፁ እቲ ቤት ማእሰርቲ ከፊቱ፥ ኣውፂኡ ኸዓ ከምዙይ በሎም፦ “ኪዱ፥ ኣብ ቤተ መቕደስ ደው ኢልኩም፥ ንህዝቢ ኵሉ ቃላት እዝ ህይወት እዙይ ተዛረቡ።”

እዙይ ምስ ሰምዑ ኸዓ ወጋሕታ ናብ ቤተ መቕደስ ኣትዮም ክምህሩ ጀመሩ። ሊቀ ካህናትን እቶም ምስኡ ዝነበሩን ምስ መፁ፥ ነቲ ባይቶን ኵሎም ዓበይቲ እስራኤልን ኣከቡ፥ ናብ ቤት ማእሰርቲ ድማ ኽምፅእዎም ለኣኹ። እቶም ዘብዐኛታት ግና ምስ በፅሑ ኣብኡ ሓደ እኳ ኣይረኸቡን፤ ተመሊሶም ድማ ከምዙይ ኢሎም ነገሩ፦ “ነቲ ቤት ማእሰርቲ ኣፅኒዑ ተዓፅዩ፥ ዘብዐኛታት ከዓ ኣብ መዓፁ ደው ኢሎም ረኸብና፤ ምስ ከፈትናዮ ግና ኣብ ውሽጢ ሓደ እኳ ኣይረኸብናን።”

ሓለቓ ዘብዐኛታት ቤተ መቕደስን ሊቃነ ካህናትን ድማ እዝ ዘረባ እዙይ ምስ ሰምዑ፥ እዝ ነገር እዙይ ናበይ ከም ዝበፅሕ እናተገረሙ ተደናገሩ። ሓደ ሰብ ድማ መፂኡ “እንሆ፥ እቶም ኣሲርኩምዎም ዝነበርኩም ሰባት ኣብ ቤተ መቕደስ ደው ኢሎም ንህዝቢ ይምህሩ ኣለዉ” ኢሉ ነገረ። ሽዑ እቲ ሓለቓን እቶም ሓለውትን ከይዶም፥ እቶም ህዝቢ ብእምኒ ኸይቅጥቅጥዎም ስለ ዝፈርሑ፥ ብዘይ ሓይሊ ኣምፅእዎም። ምስ ኣምፅእዎም ከዓ ኣብ ቅድሚ እቲ ባይቶ ኣቖምዎም። ሊቀ ካህናት ድማ ጠየቖም፥ ከምዙይ ኢሉ ኸዓ፦ “በዝ ስም እዙይ ከይትምህሩ ኣትሪርና ኣዚዝናኩም ኔርና፤ እንሆ ግና ንኢየሩሳሌም ብትምህርትኹም መሊእኹም፥ ደም እዝ ሰብኣይ እዙይ ድማ ናባና ኸተምፅኡ ትሓስቡ ኣለኹም።”

ጴጥሮስን እቶም ሃዋርያትን ግና ኢሎም መለሱ፦ “ካብ ንሰብ ምእዛዝ ንኣቦና ኽንእዘዝ ይግብአና። እቲ ኣምላኽ ኣቦታትና፥ ነቲ ንስኻትኩም ኣብ ዕፅ ሰቒልኩም ዝቐተልኩምዎ ኢየሱስ ኣተስኦ። ኣቦና ድማ ንእስራኤል ንስሃ ከምኡውን ስርየት ሓጢኣት ምእንቲ ኽህብ፥ ከም መስፍን ኮነ መድሕን ጌሩ ናብ የማናይ ኢዱ ልዕል ኣበሎ። ንሕና ኸዓ ናይ እዝ ነገር እዙይ መሰኻኽር ኢና፥ እቲ ኣቦና ነቶም ዝእዘዝዎ ዝሃቦም መንፈስ ቅዱስውን ምስክር እዩ።”

ንሳቶም ድማ እዙይ ምስ ሰምዑ፥ ኣዚዮም ተቖጥዑ፥ ክቐትልዎም ከዓ ደለዩ። ገማልኤል ዝስሙ ሓደ ፈሪሳዊ ግና፥ ብዅሉ ህዝቢ ዝኸብር መምህር ሕጊ፥ ኣብ ባይቶ ተሲኡ፥ ነቶም ሰባት ንቑሩብ ጊዜ ኣብ ወፃኢ ኸውፅእዎም ኣዘዘ። ንሳቶም ድማ ከምዙይ በሎም፦ “ኣቱም ሰብ እስራኤል፥ በዞም ሰባት እዚኣቶም ክትገብርዎ እትደልዩ ዘለኹም ተጠንቂቕኩም ሕሰቡ። ቅድሚ እዙይ ቴዎዳስ ተላዒሉ፥ ገለ ሰብ ዝኾነ መሲልዎ ነበረ፤ ኣርባዕተ ሚኢቲ ኣቢሎም ሰባት ድማ ሰዓብዎ። ንሱ ተቐቲሉ፥ ኵሎም ሰዓብቱ ተበቲኖም፥ ከንቱ ኾነ። ድሕሪኡ ይሁዳ ገሊላዊ፥ ብጊዜ ቆፀራ ተላዒሉ፥ ብዙሕ ህዝቢ ደድሕሪኡ ኣስዓበ። ንሱ እውን ሞተ፥ ኵሎም እቶም ዝሰዓብዎ ድማ ተበተኑ። ሕዚ ኸዓ እብለኩም ኣለኹ፦ ካብዞም ሰባት እዚኣቶም ርሓቑ፥ ሕደግዎም ድማ። እዝ ምኽርን ግብርን እዙይ ካብ ሰብ እንተ ኾይኑ፥ ክጠፍእ እዩ፤ ካብ ኣቦና እንተ ኾይኑ ግና፥ ከተፍርስዎም ኣይትኽእሉን ኢኹም፤ ምናልባሽ ከዓ ምስ ኣቦና ኽትዋግኡ ባዕልኹም ክትርከቡ ኢኹም።” ስለዙይ ዘረባኡ ተቐበልዎ።

ዘረባኡ ተቐቢሎም ድማ፥ ነቶም ሃዋርያት ፀዊዖም፥ ወቒዖም፥ ብስም ኢየሱስ ከይዛረቡ ኣዚዞም፥ ፈትሕዎም። ስለዙይ ምእንቲ እቲ ስም ክሕፈሩ ብቑዓት ኮይኖም ስለ ዝተቘፀሩ እናተሓጐሱ ካብ ቅድሚ እቲ ባይቶ ወፁ። ዕለት ዕለት ድማ ኣብ ቤተ መቕደስን ካብ ቤት ናብ ቤትን፥ ኢየሱስ ንሱ እቲ ክርስቶስ ምዃኑ ኻብ ምምሃርን ወንጌል ካብ ምስባኽን ኣየቋረፁን።