Otsak 4

4 ¹Peter eina Johnna mibingli ngazekta leilakha, pāngmonbing, khorumshimwui kathāna, kala Sadduceebing china anili rai, ²kaja anina mibingli tamchithei kala Jishuli zangda kathiwui eina ringshok ngasak kaji hashokwui vang athum ningrāk khaleiya. ³Chieina athumna anili tukkhuida akhama zimiksho eina tangda phātopli narhai, kaja ara ngazin kahaira. ⁴Kha pao hi kashā mi kachungkhana shitsanghaowa, kala mayarnaobingwui mashing thingphangā shakha samphanga.

⁵Akhama zimiksho athumwui khamungabing, ararbing, kala ain kathembing china Jerusalemli, ⁶pāngmon kharei Annas, Caiaphas, John, Alexander, kala pāngmon kharei shimkhurwui khalei saikora ngasoda ngarumda kazipkhui. ^a a v6 Annas hi zingkum shanao eina pāngmon kharei sākasā mina, kala arala pangshap khameiya khalei; Caiaphas hi ara sākasā pāngmon kharei mina. ⁷Athumna anili alungli nganing ngasaklaga ngahāna, "Khi pangshap eina lah khi ming eina nanina hi sākhala?"

⁸Chieina Peterna, Manglā Katharana pemtinglaga, athumli hānga, "Mibingwui khamungabing kala ararbing, ⁹aja kazā mi akhali kaphā ot sāwui pongli, a kathada raimi samphanghaokhala da inili ngahānkida leiakha, ¹⁰nathum saikora kala Israelnaobing saikorana hi theihaolu: nathumna krushli shaoshān kahai, ithumwui Avāna kathiwui eina ringshok ngasak kahai, Nazarethwui Jishu Khristawui ming eina mipā hi nathumwui mangāli kaphā eina nganinga. ¹¹Jishu hi "nathum shim kasābingna khalan kahai lung chi, achikun akhokwui lung pākra̱ ngasāsai chi laka." ^b b v11 Hi Psalm 118:22 wui eina kapi tui akhana. ¹²Huikhami hi khangatei khipākhalila maleimana; kazingram azingli, ithumli kahui samphangkhavai ming khangatei akhala mibingwui ngachaili makhamimana."

¹³Peter eina Johnwui kaping theilaga, kala ani tamkachithei matheiya shairanra̱ mibing kaji theilaga, athum matakhakhaida ani Jishu ngasoda leilak kahai kaji theihaowa. ¹⁴Raimi kahai mipā ani ngasoda nganingsai kaji theilaga, chili ngakaishida hāngkhavai khikha maleimana. ¹⁵Chieina athumna anili hangva̱wui eina thuivāhai khavai kasolaga, athum kapupta angazeka, ¹⁶hānga, "Mipā hibingli ithumna khi sarakhala? Aniwui mangā eina machut maholaka akha shokhaira, Jerusalemli okthui saikorali tharzāna, kala chi ithumna makhayeishaprarmana. ¹⁷Kha hi mibingwui ngachaili lāngkhamei mamaisanghai khavai, ming hi eina khipālikha latluida mahānglakalu da anili machina." ¹⁸Athumna anili hokhuida, Jishuwui mingli lāngda matui matamchitheila da ningmi. ¹⁹Peterna kala Johnna athumli ngahānkai, "Ithumwui Avāwui mangāli, awuili nganā ki kajile nathumli nganā chi khamashung khangarong ka makā, nathumna bichar sālu. ²⁰Kaja ithumna theikakhui kala shākakhui chi mahāngla maleirarmana."

²¹Athumna anili lāngda zakshilāk sāda, mibingwui vang eina anili tandi mikhavai apong masamphangla, anili shokngasaka; kaja shokkahai chiwui vang mi saikorana ithumwui Avāli masochikata. ²²Kaja raimiwui machut hi samphang kahai mipā chi zingkum hangmati lānga.

Avānao Ngarā Katonga Seihā Sai

²³Shokserhai eina, anina kachichā mibing chili vāda, pāngmon akhokabing kala khararnaobingna anili hāngkahai saikora unghāngsera. ²⁴Chi shālaga, athumna katonga akhon panglāk eina ithumwui Avāli vaoda hānga, "Amei Avā, nana kazingram, ngalei, tara̱, kala chiwui alungli khalei ot saikora sākahaina. ²⁵Narao ithumwui avā Davidwui khamor eina, nana Manglā Kathara eina hānga: "Khisāda yurbingna tui suikhala, kala mibingna aremali makaphā ngarānkhala?" ²⁶Okathuiwui awungabing nganinga, kala khamungabing ithumwui Avāli kala awui thao neomi kahaiali ngakaishida katonga ngarumsak."

²⁷Kaja kachangkhat eina, keinung hili, Herod kala Pontius Pilate, Gentilebing kala Israelnaobingli ngasoda, nana neomi kahai narao kathara Jishuli ngakaikashina katonga ngarumsak, ²⁸nawui pāng kala nawui ningkhami eina shok khavaila da rida tuitak khuikahai chi saikora sākhavaina. ²⁹Ara, Amei Avā, athumwui zakshilāk chi khayangmilu, kala naraobingna pinglak eina nawui tui matuishap khavai ngasakmilu, ³⁰naraimikhavai napāng vāshungda, nana neomi kahai narao kathara Jishuwui ming eina machutkakhui kala matakhak kahai otbing shokngasakmilu.

³¹Athumna seihā sāhaiwui thili, athum kakazip kā ato chi nganuka; kala athum saikora Manglā Katharana pemtinghaoda, ithumwui Avāwui tui pinglak eina matui.

Ning Akha, Avānao Ngarā Akha

³²Shitkasanga saikora ning kala manglāli akha sai; khipālikha kachichāwui shimlui chi ikhalattawui da mahāngmana, kha ot saikora ngaraichāda sāngarumsai. ³³Pangshap kahakva eina paokazatbingna Proho Jishu ringshokhairawui pongli shākhi sai, kala lukhamashan kahakva athum saikorali ngasoi. ³⁴Athumwui ngachaili khipālikha khavāta maleimana, kaja ngalei lah shim leikahaibing saikorana chi yorhailaga, yorkahaiwui aman chi khuirai, ³⁵kala chi paokazatbingwui pheizingli rāsangmi, kala mi kachiva̱li kachichāwui khavāta athishurda ngayarmi.

³⁶Joseph, Cypruswui Levinao akha, paokazatbingna Barnabas phokmi (chiwui kakhalata Kasatkasangwui Naomayara), ³⁷awui ngavai lui akha yorhailaga, pheisā chi khuirāda paokazatbingwui pheizingli rāsangmi.