Avāna Peterwui pāng eina raikhame
Khorumshimwui ngaveili lumkakā mi akha, awui kharing kachida thangthang chili khuirāda haipama. Peterna sinā lupā maleimana, chieina ali apāng eina singlaga, mipā china phitta khorumshimli zanga. Matakhak kahai mibingli Peterna, pangshap hi ithumwui maningmana, ithumwui Avāwui na, da khangatar eina hānga.
3 1Peter kala John seihā kasāwui atam, pung kachiko atamli, khorumshimli vākāsera. 2Kapharāwui eina phei katek mi akhali, khorumshimli kazangbing māngli lumkakā phā khavai, Khamathā hoda khorumshimwui ngaveili thangkachida khuirāda haipama. 3Peter kala John khorumshimli azang khavai kaji kathei eina, ana anili lupā poi. 4Chieina Peterna John ngasoda ali yangkāda hānga, "Inili yanglu." 5Chieina ana aniwui eina khikha samphangra da honda, anili ningtitkhuida yanga. 6Peterna hānga, "Ina sinā lupā maleimana, kha iwuili khalei chi ina nali mira: Nazarethwui Jishu Khristawui ming eina, ngakarthuida zatlu." 7Awui yāpang singda, ali ngakarthui ngasaka; ngalāngda awui phei kala makonglui pangsanga. 8Phitkarthuida nganinga, zatphoklaga, zatta, phitta, ithumwui Avāli sochikatta, anili ngasoda khorumshimli azanga. 9Kala mi saikorana ali zatta kala ithumwui Avāli sochikat chi theihaowa. 10Ali khorumshimwui Khamathā ngaveili pamda lumkakā phā mi chi da theihaoda, ali shokkahai chiwui vang athum matakhakhaowa.
Peterna Avāwui rao chi vaomalān
11Ana Peter kala John ngashiktit lakha, mi saikora Solomonwui yāngkhup hoda khāmreili athumwuivāk yongvāda, matakhakchaohaowa. 12Chi kathei eina, Peterna mibingli hānga, "Israelnaobing, khisāda hi nathumli matakhakhaokhala? Ini khalattawui pangshap lah dharma eina mipā hili zat ngasakhao thada khisāda inili yangngaroklikhala? 13Abraham, Isaac, kala Jacobwui Vare, ithumwui shāvā ngarāwui Varena, awui rao Jishuli sochikata; a chiya, Pilatena chihohai khavai khamayā miakha, nathumna mikakāda Pilatewui mangāli khalan kahaina. 14Kha nathumna Kathara kala Khamashung Khangarong kahaia chili mamayāmada, shaokathata akhali nathumli khamiranu da poi. 15Nathumna kharingwui Akhavā chili shaothata; ithumwui Avāna ali kathiwui eina ringshok ngasaka. Chiwui ithum shākhina. 16Awui ming china, awui mingli shitkasangwui eina, nathumna theida kala theisang kahai mipā hili pangngasakhaira. Kala Jishuli shitkasang eina, nathum saikorawui miktāli ali hi kakhanang saikora phasākaphā khamihaira.
17"Kala ara, ivānaobing, nathumwui khamungabingna sāhai thāda, nathumnala matheithangkhameiwui vang sāhai kaji ina thei. 18Kha ithumwui Avāna, awui Khristana kachotkachāng samphangra kaji, marānbing saikorawui eina marānhaikasā chi ungshung ngasaka. 19Chiwui vang eina nathumwui morei pheomi khavai ning ngateihaolu, kala ngareiunglu, 20chithākha ithumwui Avāwui mangāwui eina mathuk ngasakwui atambing rāra, kala ana nathumwui vang retkahai Khrista, Jishuli, chihovāra, 21Kazingramna ali ot saikora hankhuiluishitranglakha eina tangda phāphalungra; chiwui pongli ithumwui Avāna achālakha awui kathara marānbingwui khamor eina hāngmi. 22Mosesna hānga, 'Nathumwui Avāna nathumwui vang, nachinā ngarāwui eina, I kathā marān akha shokngasakra. Ana nathumli kahāng saikora chi nganākhuilu.' 23Marān chili manganāla mi kachikathā china, mibingwui ngachaili shimānchaohaora.' 24Kala Samuel eina thuilaga khangazek marānbing saikoranala hi zimikshobingwui pongli hāngmi. 25Nathum marānbingwui naomayarabing kala ithumwui Avāna nashāvā ngarāli sākahai tuingashitwui naomayarabingna; ana Abrahamli hithāda hānga, 'Nawui ara̱-azāwui eina okathuiwui shimkhur saikora sokhami ngasāra.' 26Ithumwui Avāna nathum kachiva̱li nathumwui makaphāwui eina ngareiung ngasakta nathumli somi khavai, awui rao shokngasakta, ali rimeikapta nathumli chihovā."
