Baba Asawangisa Kubulukira M'manja mwa Pedhru
Mamuna akhapempha pa nsuwo wa Nyumba ya Mulungu akhanyamulwa kuenda kweneko ntsiku zonsene za umaso wace. Pedhru nkhabe na kobiri, mbwenye amphata dzanja, mbwenye mamuna apita mbadumpha. Kuna mwinji wakudabwa, Pedhru alimbira kuti mphamvu nkhabe yace ene mbwenye ndi ya Baba wathu.
3 1Pedhru na Juwau akhakwira ku templo cifupi na ola yacitatu ya namasikati, n'dzidzi wa maphembero. 2Mamuna m'bodzi wakulamala kubulukira pa kubalwa kwace akhanyamulwa mbaikhwa ntsiku zonsene pa nsuwo wa templo wakucemerwa Wakubalika, toera kuphemba kuna ale akhapita mu templo. 3Pidaona iye Pedhru na Juwau ali cifupi na kupita mu templo, aaphemba kobiri. 4Na tenepo Pedhru, mbam'yang'ana pabodzi na Juwau, alonga tenepa: “Tiyang'ane.” 5Iye aayang'ana mwacidikhodikho, mbadikhira kutambira cinthu kuna iwo. 6Pedhru alonga tenepa: “Ine nkhabe parata nee ouro, mbwenye ndinakupasa cinthu cina naco: mu dzina ya Yezu Kirixtu wa ku Nazaré, lamuka ufambe.” 7Mbam'phata nkono wace wamadyo, am'lamusa; mwakucimbiza miyendo yace na maungu ace awanga. 8Mbalumpha, alimira, atoma kufamba, mbapita mu templo pabodzi na iwo, mbafamba, mbalumpha, mbasimba Baba wathu. 9Na tenepo anthu onsene am'ona mbafamba mbasimba Baba wathu. 10Iwo am'dzindikira kuti ndi nyakuphemba ule akhakhala pa Nsuwo Wakubalika wa templo, mbadzala na cidzudzumo na kudzumatirwa thangwi ya pidamucitikira.
Pedhru Asalonga Pya Ntumiki wa Baba
11Mu n'dzidzi ukhaphata iye Pedhru na Juwau, anthu onsene athamangira kuna iwo pa Varanda yakucemerwa ya Salomau, mbadzumatirwa kakamwe. 12Pidaona pyenepi Pedhru, alonga kuna anthu tenepa: “Imwe Aizarayeli, thangwi yanji musadzumatirwa na pyenepi? Thangwi yanji musatiyang'ana, ninga kuti tam'citisa kufamba na mphambvu yathu peno kulungama kwathu? 13Mulungu wa Abhrahamu, Izaki, na Yakobe, Mulungu wa ambuya athu, apasa mbiri Ntumiki wace Yezu, ule imwe mwamupereka mbamuramba pamaso pa Pilato, pidasankhula Pilato kuti amusudzule. 14Mbwenye imwe mwaramba Wakucena na Wakulungama, mbaphemba kuti mupaswe nyakupha munthu. 15Imwe mwapha Nyakutoma wa umaso; mbwenye Baba wathu amlamusa muli anyakufa. Ife ndife mboni za pyenepi. 16Dzina yace, kubulukira mu cikhulupiro mu dzina yace, yawangisa mamuna uyu—mamuna ene uyu munamuona mbamundziwa imwe. Na cikhulupiro mu Yezu campasa iye kuwanga kwakukwana pamaso panu.
17“Cincino, abale, ndisadziwa kuti mwacita pyenepi mwakukhonda dziwa, ninga mudacitambo atsogoleri anu. 18Mbwenye Baba wathu akwanirisa pidalonga Iye kale kubulukira mwa aprofeta onsene: kuti Kirixtu wace mbadanentseka. 19Natenepo, tcunyukani mbamubwerera, toera madawo anu apukutwe, 20toera n'dzidzi wakupumuza ubwere wakubuluka pamaso pa Baba wathu, na kuti atumize Kirixtu adasankhulwa thangwi ya imwe, ndiye Yezu, 21ule anafunika kutambirwa kudzulu mpaka pinthu pyonsene pikonzwe pontho, pidalonga Baba wathu kubulukira mwa aprofeta ace akucena kale-kale. 22Mozeji alonga tenepa: ‘Baba wanu anadzakulamusirani mprofeta ninga ine kubulukira mwa abale anu. Mbvereni iye mu pinthu pyonsene pinakupangani iye.’ 23Munthu onsene anakhonda kubvera mprofeta unoyu anadzafudzwa kwenda kwa kwenda pakati pa anthu.’ 24Aprofeta onsene adalonga, kutomera pa Samweri na ale adatowera, alongambo pya ntsiku zenezi. 25Imwe ndimwe ana a aprofeta na a cibverano cidacita Baba wathu na ambuya anu, mbampanga Abhrahamu: ‘Kubulukira mu mbeu yako madzinza onsene a pa dziko yapantsi anadzapaswa nkhombo.’ 26Baba wathu alamusa Ntumiki wace, mbantuma kuna imwe pakutoma, toera kukupasani nkhombo mukutcunyusa m'bodzi na m'bodzi wa imwe kubuluka mu pyakuipa pyanu.”
