Matendo ya Mitume 3

3 ¹Petro na Yohana walikuwa wakipanda kwenda hekaluni yapata saa tisa alasiri, saa ya kuomba. ²Mtu mmoja aliyekuwa kiwete tangu kuzaliwa alichukuliwa na kuwekwa kila siku penye lango la hekalu liitwalo Zuri, ili aombe sadaka kwa wale walioingia hekaluni. ³Alipowaona Petro na Yohana wakikaribia kuingia hekaluni, aliwaomba pesa. ⁴Naye Petro, akimkazia macho pamoja na Yohana, akasema, "Tutazame sisi." ⁵Naye akawaelekeza fikira zake, akitazamia kupata kitu kutoka kwao. ⁶Petro akasema, "Sina fedha wala dhahabu, lakini kile nilicho nacho ndicho nikupacho: kwa jina la Yesu Kristo wa Nazareti, inuka uende." ⁷Akimshika mkono wake wa kuume, akamwinua; mara nyayo zake na vifundo vyake vya miguu vikapata nguvu. ⁸Akaruka juu, akasimama, akaanza kutembea, naye akaingia hekaluni pamoja nao, akitembea, akiruka-ruka, na kumsifu Baba yetu. ⁹Nao watu wote wakamwona akitembea na kumsifu Baba yetu. ¹⁰Wakamtambua kuwa ndiye yule mwombaji aliyekuwa akiketi penye Lango Zuri la hekalu, wakajawa na mshangao na maajabu kwa sababu ya lililompata.

Petro Amtangaza Mtumishi wa Baba

¹¹Alipokuwa akishikamana na Petro na Yohana, watu wote wakawakimbilia penye ukumbi uitwao wa Sulemani, wakishangaa mno. ¹²Petro alipoona hayo, akawaambia watu, "Enyi Waisraeli, kwa nini mnastaajabia jambo hili? Kwa nini mnatukazia macho, kana kwamba kwa nguvu zetu wenyewe au utauwa wetu tumemfanya huyu atembee? ¹³Mungu wa Abrahamu, na wa Isaka, na wa Yakobo, Mungu wa baba zetu, alimtukuza mtumishi wake Yesu, ambaye ninyi mlimsaliti na kumkana mbele ya Pilato, wakati Pilato alipoamua kumfungua. ¹⁴Bali ninyi mlimkana yule Mtakatifu na Mwenye Haki, mkataka mwuaji apewe kwenu. ¹⁵Mkamuua yule Mwanzilishi wa uzima; Baba yetu akamfufua kutoka kwa wafu. Sisi ni mashahidi wa jambo hili. ¹⁶Jina lake, kwa njia ya imani katika jina lake, limemtia nguvu mtu huyu—yeye huyu mnayemwona na kumjua. Na imani iliyo katika Yesu imempa afya hii kamili mbele ya macho yenu nyote.

¹⁷"Na sasa, ndugu zangu, najua ya kuwa mlitenda kwa kutokujua, kama walivyofanya pia watawala wenu. ¹⁸Lakini Baba yetu alitimiza yale aliyoyatangulia kuyanena kwa vinywa vya manabii wake wote: ya kwamba Kristo wake angeteseka. ¹⁹Basi tubuni, na kurudi, ili dhambi zenu zifutwe, ²⁰ili zipate kuja nyakati za kuburudishwa kutoka kwa uso wa Baba yetu, na apate kumtuma Kristo aliyewekwa kwa ajili yenu, yaani Yesu, ²¹ambaye ilimpasa mbingu zimpokee hata wakati wa kurejezwa kwa vitu vyote, ambavyo Baba yetu alivinena kwa vinywa vya manabii wake watakatifu tangu zamani. ²²Musa alisema, 'Baba yenu atawainulia nabii kama mimi kutoka miongoni mwa ndugu zenu. Msikilizeni yeye katika kila neno atakalowaambia.' ²³Kila mtu asiyemsikiliza nabii huyo ataangamizwa kabisa kutoka miongoni mwa watu.' ²⁴Na manabii wote walionena, tangu Samweli na wale waliomfuata, pia walizitangaza siku hizi. ²⁵Ninyi ni wana wa manabii, na wa lile agano ambalo Baba yetu aliagana na baba zenu, akimwambia Abrahamu, 'Katika uzao wako jamaa zote za dunia zitabarikiwa.' ²⁶Baba yetu alimwinua mtumishi wake, akamtuma kwenu kwanza, ili awabariki kwa kumgeuza kila mmoja wenu kutoka katika uovu wenu."