ಪ್ರೇಷಿತರ ಕಾರ್ಯಕಲಾಪಗಳು 3 FHB Father's Heart Bible™

3 ¹ಪೇತ್ರನೂ ಯೋಹಾನನೂ ಪ್ರಾರ್ಥನೆಯ ಸಮಯವಾದ ಅಪರಾಹ್ನ ಸುಮಾರು ಮೂರು ಗಂಟೆಗೆ ದೇವಾಲಯಕ್ಕೆ ಹೋಗುತ್ತಿದ್ದರು. ²ಹುಟ್ಟಿನಿಂದಲೇ ಕುಂಟನಾಗಿದ್ದ ಒಬ್ಬ ಮನುಷ್ಯನನ್ನು, ದೇವಾಲಯಕ್ಕೆ ಪ್ರವೇಶಿಸುವವರಿಂದ ಭಿಕ್ಷೆ ಬೇಡುವಂತೆ, ದಿನವೂ ಹೊತ್ತುಕೊಂಡು ಬಂದು ಸುಂದರ ಎಂಬ ದೇವಾಲಯದ ಬಾಗಿಲ ಬಳಿ ಇಡುತ್ತಿದ್ದರು. ³ದೇವಾಲಯದೊಳಕ್ಕೆ ಹೋಗಲಿದ್ದ ಪೇತ್ರ ಯೋಹಾನರನ್ನು ಕಂಡು, ಅವನು ಅವರಿಂದ ಹಣವನ್ನು ಕೇಳಿದನು. ⁴ಆಗ ಪೇತ್ರನು ಯೋಹಾನನೊಡನೆ ಅವನನ್ನು ದಿಟ್ಟಿಸಿ ನೋಡಿ, “ನಮ್ಮ ಕಡೆಗೆ ನೋಡು,” ಎಂದನು. ⁵ಅವರಿಂದ ಏನಾದರೂ ಸಿಗಬಹುದೆಂದು ನಿರೀಕ್ಷಿಸಿ, ಅವನು ಅವರನ್ನೇ ಗಮನವಿಟ್ಟು ನೋಡಿದನು. ⁶ಪೇತ್ರನು, “ನನ್ನ ಬಳಿ ಬೆಳ್ಳಿಯೂ ಚಿನ್ನವೂ ಇಲ್ಲ; ಆದರೆ ನನ್ನ ಬಳಿ ಇರುವುದನ್ನೇ ನಿನಗೆ ಕೊಡುತ್ತೇನೆ: ನಜರೇತಿನ ಯೇಸು ಕ್ರಿಸ್ತನ ಹೆಸರಿನಲ್ಲಿ ಎದ್ದು ನಡೆ,” ಎಂದನು. ⁷ಅವನ ಬಲಗೈಯನ್ನು ಹಿಡಿದು ಅವನನ್ನು ಮೇಲಕ್ಕೆತ್ತಿದನು; ಕೂಡಲೇ ಅವನ ಪಾದಗಳೂ ಹಿಮ್ಮಡಿಗಳೂ ಬಲಗೊಂಡವು. ⁸ಅವನು ಜಿಗಿದೆದ್ದು ನಿಂತು ನಡೆಯಲಾರಂಭಿಸಿ, ನಡೆಯುತ್ತಾ ಜಿಗಿಯುತ್ತಾ ನಮ್ಮ ತಂದೆಯನ್ನು ಸ್ತುತಿಸುತ್ತಾ ಅವರೊಂದಿಗೆ ದೇವಾಲಯವನ್ನು ಪ್ರವೇಶಿಸಿದನು. ⁹ಅವನು ನಡೆಯುತ್ತಾ ನಮ್ಮ ತಂದೆಯನ್ನು ಸ್ತುತಿಸುತ್ತಾ ಇರುವುದನ್ನು ಜನರೆಲ್ಲರೂ ಕಂಡರು. ¹⁰ದೇವಾಲಯದ ಸುಂದರ ಬಾಗಿಲ ಬಳಿ ಕುಳಿತು ಭಿಕ್ಷೆ ಬೇಡುತ್ತಿದ್ದವನು ಇವನೇ ಎಂದು ಅವರು ಗುರುತಿಸಿ, ಅವನಿಗೆ ಸಂಭವಿಸಿದ್ದನ್ನು ಕಂಡು ವಿಸ್ಮಯದಿಂದಲೂ ಆಶ್ಚರ್ಯದಿಂದಲೂ ತುಂಬಿಹೋದರು.

ಪೇತ್ರನು ಪಿತನ ಸೇವಕನನ್ನು ಸಾರುತ್ತಾನೆ

¹¹ಅವನು ಪೇತ್ರ ಯೋಹಾನರನ್ನು ಹಿಡಿದುಕೊಂಡಿರಲು, ಜನರೆಲ್ಲರೂ ತೀರಾ ಬೆರಗಾಗಿ ಸೊಲೊಮೋನನದೆಂಬ ಮಂಟಪದ ಬಳಿ ಅವರ ಕಡೆಗೆ ಓಡಿಬಂದರು. ¹²ಇದನ್ನು ಕಂಡು ಪೇತ್ರನು ಜನರಿಗೆ, “ಇಸ್ರಾಯೇಲ್ಯರೇ, ಇದಕ್ಕೆ ನೀವೇಕೆ ಆಶ್ಚರ್ಯಪಡುತ್ತೀರಿ? ನಮ್ಮ ಸ್ವಂತ ಶಕ್ತಿಯಿಂದಲೋ ಭಕ್ತಿಯಿಂದಲೋ ನಾವು ಇವನನ್ನು ನಡೆಯುವಂತೆ ಮಾಡಿದೆವೋ ಎಂಬಂತೆ ನಮ್ಮನ್ನೇಕೆ ದಿಟ್ಟಿಸಿ ನೋಡುತ್ತೀರಿ? ¹³ಅಬ್ರಹಾಮನ, ಇಸಾಕನ, ಯಾಕೋಬನ ದೇವರು, ನಮ್ಮ ಪಿತೃಗಳ ದೇವರು, ತಮ್ಮ ಸೇವಕನಾದ ಯೇಸುವನ್ನು ಮಹಿಮೆಪಡಿಸಿದರು; ಈ ಯೇಸುವನ್ನೇ ನೀವು ಹಿಡಿದುಕೊಟ್ಟು, ಪಿಲಾತನು ಬಿಡುಗಡೆ ಮಾಡಲು ನಿಶ್ಚಯಿಸಿದಾಗ ಅವನ ಮುಂದೆ ನಿರಾಕರಿಸಿದಿರಿ. ¹⁴ಆದರೆ ನೀವು ಪರಿಶುದ್ಧನೂ ನೀತಿವಂತನೂ ಆದಾತನನ್ನು ನಿರಾಕರಿಸಿ, ಒಬ್ಬ ಕೊಲೆಗಾರನನ್ನು ನಿಮಗೆ ಬಿಟ್ಟುಕೊಡಬೇಕೆಂದು ಕೇಳಿಕೊಂಡಿರಿ. ¹⁵ನೀವು ಜೀವದ ಕರ್ತೃವನ್ನು ಕೊಂದಿರಿ; ನಮ್ಮ ತಂದೆ ಅವರನ್ನು ಸತ್ತವರೊಳಗಿಂದ ಎಬ್ಬಿಸಿದರು. ಇದಕ್ಕೆ ನಾವೇ ಸಾಕ್ಷಿಗಳು. ¹⁶ಅವರ ಹೆಸರಿನ ಮೇಲಣ ವಿಶ್ವಾಸದ ಮೂಲಕ, ಅವರ ಹೆಸರೇ ನೀವು ನೋಡುತ್ತಿರುವ ಹಾಗೂ ಅರಿತಿರುವ ಈ ಮನುಷ್ಯನನ್ನು ಬಲಗೊಳಿಸಿದೆ. ಯೇಸುವಿನ ಮೇಲಣ ವಿಶ್ವಾಸವೇ ನಿಮ್ಮೆಲ್ಲರ ಕಣ್ಣೆದುರಿನಲ್ಲಿ ಅವನಿಗೆ ಈ ಪರಿಪೂರ್ಣ ಸ್ವಸ್ಥತೆಯನ್ನು ದಯಪಾಲಿಸಿದೆ.

¹⁷“ಈಗ, ಸಹೋದರರೇ, ನಿಮ್ಮ ಅಧಿಕಾರಿಗಳಂತೆಯೇ ನೀವೂ ಅಜ್ಞಾನದಿಂದ ಹಾಗೆ ಮಾಡಿದಿರಿ ಎಂದು ನಾನು ಬಲ್ಲೆನು. ¹⁸ಆದರೆ ತಮ್ಮ ಕ್ರಿಸ್ತನು ಬಾಧೆಪಡಬೇಕೆಂದು ಎಲ್ಲಾ ಪ್ರವಾದಿಗಳ ಮೂಲಕ ಮುಂತಿಳಿಸಿದ್ದನ್ನು ನಮ್ಮ ತಂದೆ ನೆರವೇರಿಸಿದರು. ¹⁹ಆದ್ದರಿಂದ ನಿಮ್ಮ ಪಾಪಗಳು ಅಳಿಸಲ್ಪಡುವಂತೆ, ಪಶ್ಚಾತ್ತಾಪಪಟ್ಟು ಹಿಂತಿರುಗಿರಿ, ²⁰ನಮ್ಮ ತಂದೆಯ ಸಾನ್ನಿಧ್ಯದಿಂದ ಚೇತರಿಕೆಯ ಕಾಲಗಳು ಬರುವಂತೆಯೂ, ನಿಮಗಾಗಿ ನೇಮಿಸಲ್ಪಟ್ಟ ಕ್ರಿಸ್ತನಾದ ಯೇಸುವನ್ನು ಅವರು ಕಳುಹಿಸುವಂತೆಯೂ ಆಗಬೇಕು, ²¹ಸಕಲವೂ ಪುನಃಸ್ಥಾಪನೆಯಾಗುವ ತನಕ ಆ ಯೇಸುವನ್ನು ಪರಲೋಕವು ಸ್ವೀಕರಿಸಬೇಕು; ಆ ಪುನಃಸ್ಥಾಪನೆಯ ಕುರಿತು ನಮ್ಮ ತಂದೆ ಪುರಾತನ ಕಾಲದಲ್ಲಿ ತಮ್ಮ ಪರಿಶುದ್ಧ ಪ್ರವಾದಿಗಳ ಮೂಲಕ ನುಡಿದಿದ್ದಾರೆ. ²²ಮೋಶೆ ಹೀಗೆ ಹೇಳಿದನು: ‘ನಿಮ್ಮ ತಂದೆ ನಿಮ್ಮ ಸಹೋದರರೊಳಗಿಂದ ನನ್ನಂತಹ ಒಬ್ಬ ಪ್ರವಾದಿಯನ್ನು ನಿಮಗಾಗಿ ಎಬ್ಬಿಸುವರು. ಅವರು ನಿಮಗೆ ಹೇಳುವ ಪ್ರತಿಯೊಂದರಲ್ಲೂ ಅವರ ಮಾತನ್ನು ಕೇಳಿರಿ.’ ²³ಆ ಪ್ರವಾದಿಯ ಮಾತನ್ನು ಕೇಳದವನು ಜನರ ಮಧ್ಯದಿಂದ ಸಂಪೂರ್ಣವಾಗಿ ನಾಶವಾಗುವನು.’ ²⁴ಸಮುವೇಲನಿಂದ ಮೊದಲ್ಗೊಂಡು ಮಾತನಾಡಿದ ಪ್ರವಾದಿಗಳೆಲ್ಲರೂ ಈ ದಿನಗಳ ಕುರಿತು ಪ್ರಕಟಿಸಿದರು. ²⁵‘ನಿನ್ನ ಸಂತಾನದ ಮೂಲಕ ಭೂಮಿಯ ಸಕಲ ವಂಶಗಳೂ ಆಶೀರ್ವದಿಸಲ್ಪಡುವವು’ ಎಂದು ಅಬ್ರಹಾಮನಿಗೆ ಹೇಳಿ ನಮ್ಮ ತಂದೆ ನಿಮ್ಮ ಪಿತೃಗಳೊಂದಿಗೆ ಮಾಡಿದ ಒಡಂಬಡಿಕೆಯ ಮಕ್ಕಳೂ, ಪ್ರವಾದಿಗಳ ಮಕ್ಕಳೂ ನೀವೇ ಆಗಿದ್ದೀರಿ. ²⁶ನಮ್ಮ ತಂದೆ ತಮ್ಮ ಸೇವಕನನ್ನು ಎಬ್ಬಿಸಿ, ನಿಮ್ಮಲ್ಲಿ ಪ್ರತಿಯೊಬ್ಬನನ್ನೂ ಅವನ ಕೆಟ್ಟತನದಿಂದ ತಿರುಗಿಸಿ ನಿಮ್ಮನ್ನು ಆಶೀರ್ವದಿಸುವುದಕ್ಕಾಗಿ ಅವರನ್ನು ಮೊದಲು ನಿಮ್ಮ ಬಳಿಗೆ ಕಳುಹಿಸಿದರು.”