Pa na Peter Kut Paan Bina Pi Sa Thangnuwe
Kalum in inkhaanmun bi baket lwamnu manpa khat bariak sung bi lumik brumza habei la phun thang ngaake. Peter khou sen am make, atiyeda bakut ding lou rwe, khatle manpa ga kachokluga han thouluga se thou rwe. Loh lo ongnu mi khang khou Peter na heiba ngam ga Eina om make atiyeda ani Pa om gaye diga zathang rin rwe.
3 1Kalum thangnu chakrin, chakrin kaqwa tanu phei bina, Peter le John le kalum in la se ngaake. 2Pok pina baket lwamnu manpa pakhat ting, kalum in bi khutnu nun khou badung lang, “Kasanu” ding kounu kalum in inkhaanmun bi kani bathin phunluga thang ngaake. 3Peter le John le kalum in bi khut lang tonu ga maanna munu kaan bi, bani khou sen badung ngaake. 4Atiga Peter na John le diga bakhou mik basouga phaangluga rinne, “Ani ding phaangro.” 5Atiga maanna, bani khouna pa-aam khat lousu lang ngaakka, bani khou mik basouga phaang ngaake. 6Peter na rinne, “Ei khou sen le chaak le mak, atiyeda Ei khou amnu ga nating pi lune: Nazareth Jisu Christa meng bi, thouluga sero.” 7Bakut kazak ka louluga, bating pi han thang rwe; haba kahan bi baket khatle ket baang bing ga tip thou rwe. 8Maan kachokluga han thouluga se thou rwe, atiga seluga, kachokluga, ani Pa ding swanga, bani le diga kalum in bi khut rwe. 9Atiga mi bingza na maan seluga khatle ani Pa ding swannu ga mu rwe. 10Kalum in om “Kasanu” inkhaanmun bi badungluga nisa ongnu manpa ga maan gaye diga banina bapu theiluga, bakhou mu thangnu bi ga banina taswang khak lang loh lo rwe.
Pa om Swak ding Peter na Kasamnuwe
11Maanna Peter le John le ding kabengga ong bi, mi bingza na loh lo taswang khakka, “Solomon Inkhu” ding kounu bi bani kim bi suizon hung rwe. 12Heiya munu kaan bi Peter na mi nun khou rinne, “Israel mi rwan ga, heiya nani ding pa-aam lang loh lo thangnubo? Anina ani bahak om ngam mak tabe ririak senu paan bina maan ding se thang rwe danga, pa-aam lang aniya han ongnubo? 13Abraham, Isaac khatle Jacob om Rikrwang, ani pu pa rwan om Rikrwang na, Pilate na maan ding barang se lat lang chongtan thang beida nanina Pilate meithaan bi pi latluga za mak damnu, Baom swak Jisu ding lwat lian thang rwe. 14Atiyeda nanina Bathiangnu khatle Ririak Senu ding za mak ngaake, atiga mi athatnu pakhat ting nani lang pi lat lang badung ngaake. 15Nanina ringnu om Chaatpuba ding balaang athat rwe; atiyeda ani Pa na maan ding thinu nun lak pina pi han thang rwe. Heiya lang bi anina sake towe. 16Bameng bi balumsanu paan bina, nanina munu khatle theinu heiba manpa ding Bameng na tip thang rwe. Atiga Jisu bi balumsanu na nani mikphaang bi hei pum sa bathiangnu ga bakhou pi thang rwe.
17“Atiga atun, unao rwan ga, nani sung bathiangga rwan na le ha danga to damnu danga, nanina thei makka to damnu ga eina theiye. 18Atiyeda Baom Christa riangre khaang dingnu ga, thiamting rwan brum paan bina ani Pa na meithaan rin thang damnu ga hung tang thang rwe. 19Atibriakpina, nani noh bing ga kok thang lang, nani noh lak pina zathangluga kanei hung dammo, 20atiga ani Pa meithaan bina karonu meithaan bing hunglu lang, khatle nani lang daan thang damnu Christa Jisu ding Maanna nani khou lang thang lang nge, 21kama meithaan bina ani Pa na Baom bathiangnu thiamting rwan mun bina rin thang damnu thing brumza han bathiang thang tangga, Maan ding tambaanna loukhut thang lang nge. 22Moses na rinne, ‘Nani Pa na nani lang nani unao rwan lak pina ei danga thiamting pakhat ting pi han thanglune. Maanna nani khou rinnu thinu brum bi Bakhou ngaiyo.’ 23Tudannu haba thiamting chong ngaisu maknu maan ga, mi nun lak pina braan sat thanglune.’ 24Samuel tanga kabia damnu thiamting rwan brumza na le, heiba meithaan bing ding kasam thang rwe. 25Nani ga thiamting rwan om, khatle nani pu pa rwan le ani Pa na to damnu chonghen kathan om sa rwanne; Abraham khou ga Maanna, ‘Nakik taat khouna talei ram om minun chaat brumza rithoi thang lune’ diga rin thang ngaake. 26Ani Pa na Baom swak ding pi han thangluga, nani khat khat ting nani kason lak pina kanei thangga nani ding rithoi pi thang lang, tatoga nani khou lang thang rwe.”