Mi eng' bukuit

Poisyonigap che Kiyoktoi 3 FHB Father's Heart Bible™

Kiistoi 15% eng' kiy ne iale korook →
Bukuit

Kosaabin Kwanda eng' Eunegap Petero

Chiito age ne soomei eng' kurgeetap Hekaluut, ki ip piik ak kigonor eng' olooto peetuut age tugul po saboondanyi. Matinye Petero silingisyek, ago ki nam euttonnyi, ak ki wendot chiichooto ak kongelel. Ki mwachi Petero piik che tang'any kole ma kimnatennyi ineegei, ago ko ne po Kwandanyo.

Sura 3.

Ki tei Petero ak Johana Hekaluut eng' sait ne po somok eng' koskoleny, ne po saaet. Ki mi chiito age ne ki ing'wali kobunu sigennyi, ne ki ip piik ak kigonor eng' peetuut age tugul eng' kurgeetap Hekaluut ne kiguure Karaaran, si kosoom eng' icheek che chut Hekaluut. Kingo keer Petero ak Johana che mache koba Hekaluut, kosoom eng' icheek silingisyek. Ki tononji Petero ineendet kobooto Johana, koleenji, “Igeere acheek.” Ak ki tononji icheek, koriibei konyoor kiy age eng' icheek. Koleenji Petero, “Matinye fedha anan thahabu, ago agoonin kiy ne atinye: eng' kaineetap Jeso Kristo ne po Nazareth, ng'eet ak iwendote.” Ki nam euttonnyi ne po eutap tai, ki ing'eeti; ak kongelel konyiganitu keelyekyik ak kakwautikyik. Kong'eetu kotononi, kotoi kowendot, ak kochut Hekaluut kobooto icheek, kowendot, kotoretet, ak kolasu Kwandanyo. Ak ki geer piik tugul ineendet kowendot ak kolasu Kwandanyo. Ki nai icheek ineendet kole ko ineendet ne ki tebee kosoomei eng' Kurgeetap Hekaluut ne Karaaran, ak ki tang'any kobooto kokwong'yo agobo kiit ne ki yaityo ineendet.

Amda Petero agobo Otwogindetap Kwanda

Kingo nam chiichooto Petero ak Johana, ki labat piik tugul kobwa ole mi icheek eng' keterut ne kiguure ne po Solomon, kotang'any miising'. Kingo keer niito Petero, koleenji piik, “Okweek piigap Israel, amu nee si kokwong'ok niito? Amu nee si otononse acheek, koleel ki eng' kimnateennyo acheek anan amu kigeiywei Kamuktaindet si keyai kowendot ineendet? Ki toroor Kamuktaindetap Abraham, ak Isak, ak Jakobo, Kamuktaindetap kwanisyekyok, otwogindennyi Jeso, ne ki okogochi okweek ak oeesye eng' taitap Pilato, kingo kagomach Pilato kobagaakta ineendet. Ago ki oeesye Ne Tiliil ak Ne po Imanda, osoome kole kigoonok rumiindet. Ki opar Toiyotap saboondo, ago ki ing'eeti Kwandanyo eng' meet. Acheek tugul paorinik agobo niito. Kainennyi, eng' yanet ne mi kainennyi, ko kagonyiganit chiichi ne ogeere ak ongen okweek; ak yanet ne po Jeso ko kagoochi ineendet komyeeit koitaat niito eng' taitang'wong' tugul.

“Ak nguno, tupchoschu, angen ale ki oyai eng' maeng'anet, ko uu ye ki yai ak kiptainigwong'. Ago ki isulda Kwandanyo kiy ne ki mwa keny eng' kutusweegap maotikyik tugul, kole nyalili Kristonyi. Osigu anyun, ak owekyogei, si keisto tengekwogikwok, si kobwa saaisyek che po kagaigaet che bunu taitap Kwandanyo, ak koyookwok Kristo ne ki kilewenchinok, Jeso, ne mage kotaach kipsengwet agoi koweeksei tuguuk tugul, che ki ng'alaalji agobo Kwandanyo eng' kutusweegap maotikyik che tiliileen che ki menye keny. Ki le Musa, ‘Ing'eetun Kwandang'wong' maotyot ne uu anee eng' tupchoschwong'. Ogas ineendet eng' tuguuk tugul che mwaiwok.’ Chiito age tugul ne ma gas maotyonooto, kigees iman eng' kwenutap piik.’ Maotik tugul che ki ng'alaal, kobunu Samuel ak kwo tai, ki amda agine peetuusyechu. Okweek ko lagogap maotik ak che po arorutyet ne ki yai Kwandanyo kobooto kwanisyekwok, kole koleenji Abraham, ‘Eng' iyoteng'ung' ko kiberuure ortinwek tugul che po ng'wony.’ Ki ing'eeti Kwandanyo otwogindennyi, ak koyookwok okweek taben, si koberurwok, si koweek age tugul eng' okweek koisto yaitwogikyik.”