Mabasa 3 FHB Father's Heart Bible™

3 ¹Petro naJohani vakanga vachikwira kutemberi nenguva inenge yechitatu masikati, iyo nguva yokunyengetera. ²Mumwe murume akanga akaremara kubvira pakuberekwa kwake aitakurwa achiiswa zuva nezuva pasuo retemberi rainzi Rakanaka, kuti apemhe kuna avo vaipinda mutemberi. ³Paakaona Petro naJohani voda kupinda mutemberi, akavakumbira mari. ⁴Petro akamutarisisa pamwe chete naJohani, akati, “Titarise.” ⁵Akavatarisisa, achitarisira kugamuchira chimwe chinhu kwavari. ⁶Petro akati, “Handina sirivha kana goridhe, asi zvandinazvo ndinokupa: muzita raJesu Kristu weNazareta, simuka ufambe.” ⁷Akamubata ruoko rwake rworudyi, akamusimudza; pakarepo tsoka dzake namakakata ake zvakasimba. ⁸Akasvetuka, akamira, akatanga kufamba, akapinda navo mutemberi, achifamba, achisvetuka, achirumbidza Baba vedu. ⁹Vanhu vose vakamuona achifamba achirumbidza Baba vedu. ¹⁰Vakamuziva kuti ndiye aisipemha agere paSuo Rakanaka retemberi, vakazadzwa nokushamisika nokukatyamara nezvakanga zvaitika kwaari.

Petro Anoparidza Muranda waBaba

¹¹Zvino paakanga akabatirira kuna Petro naJohani, vanhu vose vakamhanyira kwavari paberere rinonzi reSoromoni, vakakatyamara kwazvo. ¹²Paakaona izvi, Petro akati kuvanhu, “Imi vaIsraeri, seiko izvi zvichikushamisai? Munotitarisireiko, sokunge takaita kuti afambe nesimba redu pachedu kana noumwari hwedu? ¹³Mwari waAbhurahama, naIsaka, naJakobho, Mwari wamadzibaba edu, akakudza muranda wake Jesu, uyo imi wamakaisa mumaoko mukamuramba pamberi paPirato, Pirato paakanga afunga kumusunungura. ¹⁴Asi imi makaramba Mutsvene naWakarurama, mukakumbira kuti mhondi ipiwe kwamuri. ¹⁵Makauraya Muvambi woupenyu; asi Baba vedu vakamumutsa kubva kuvakafa. Isu tiri zvapupu zvaizvozvi. ¹⁶Zita rake, kubudikidza nokutenda muzita rake, rakasimbisa murume uyu—iye murume wamunoona uye wamunoziva. Uye kutenda muna Jesu kwakamupa utano huzere uhu pamberi pameso enyu chaipo.

¹⁷“Zvino hama dzangu, ndinoziva kuti makaita izvi musingazivi, sezvakaitawo vatongi venyu. ¹⁸Asi Baba vedu vakazadzisa zvavakanga vagara vataura kubudikidza navaprofita vose, kuti Kristu wavo aizotambudzika. ¹⁹Naizvozvo, tendeukai, mudzoke, kuti zvivi zvenyu zvidzimwe, ²⁰kuti nguva dzokuzorodzwa dziuye dzichibva pamberi paBaba vedu, uye kuti vatume Kristu akagadzirirwa imi, iye Jesu, ²¹uyo anofanira kugamuchirwa nedenga kusvikira zvinhu zvose zvadzorerwa, izvo Baba vedu zvavakataura kubudikidza navaprofita vavo vatsvene kare kare. ²²Mozisi akati, ‘Baba venyu vachakumutsirai muprofita akafanana neni, achabva pakati pehama dzenyu. Munofanira kumuteerera pazvinhu zvose zvaachakuudzai.’ ²³Munhu wose asingateereri muprofita iyeye achaparadzwa chose pakati pavanhu.’ ²⁴Uye vaprofita vose vakataura, kubvira pana Samueri zvichienda mberi, vakazivisawo mazuva ano. ²⁵Imi muri vanakomana vavaprofita neavesungano Baba vedu yavakaita namadzibaba enyu, vachiti kuna Abhurahama, ‘Nokubudikidza nembeu yako mhuri dzose dzenyika dzicharopafadzwa.’ ²⁶Baba vedu vakamutsa muranda wavo vakamutuma kwamuri kutanga, kuti vakuropafadzei nokutendeutsa mumwe nomumwe wenyu kubva pane zvakaipa zvake.”